2 SAMUEL 11 - PATHIEN LEKHABU THIENGTHO (BSI)

David leh Bathsheba

¹ Chun, hiti hi ahi a, kum khat nung in, lengte kido dinga a pawt sek hun u chun, David in Joab chu a sawl a, a mite leh Israel mi chengcheng tawh; Amon suonte chu a sumangthai u a, Rabbah khuo a sim u a, David vang chu Jerusalem ah a um a.

² Chun, hiti hi a hi a, nitâk ni nem chun a zâlkhun apat David a tho a, leng In chungah a va vak viel a: chun, In chung apat chun numei khat kisil lai chu a vak mu a; zie numei chu melhawih tak ahi a.

³ Chun, David chun mi a sawl a, zie numei chanchin chu a dawt chet sak a. Chun, “Eliam chanu, Bathsheba, Hit mi Uria zi hilo ahim?” mi khatin a tih sak a.

⁴ Chun, David chun palai a sawl a, a pui ta a; chun a kawm chu a va tung a, a na kuolpih ta a, (numei ngeina nei a kisil thieng zo pan ahi a), chun, a In lam ah a chieh kit ta a.

⁵ Tichun numei chu a hung gai ta a; “Nau ka vawp hi,” ti’n David chu mi a hilh sak a.

⁶ Chun, David chun Joab kawmah, “Hit mi Uria chu ka kawmah hun sawl in,” ti’n a thuthak a, khutichun Joab chun Uria chu David kawmah a sawl ta a.

⁷ Chun, Uria chu a kawm a va tun chun, David chun, “Joab leh mite chu bang a tiu hi, kidona achun bang a tiu hi?” ti’n a dawng a.

⁸ Chun, David chun Uria kawmah, “Na In lam ah chieh inla, na kênghaw va sil in,” a ti a. Khutichun Uria chu leng In apat chun a pawt a, leng chun thilpiekte a delh zui sak a.

⁹ Himahlele, Uria chu a pu suokte lak ah leng kawtkhak bul achun a kuol ta a, In lam achun a chieh ta puoh a.

¹⁰ Chun, David chu, “Uria a In lam ah a chieh puoi,” ti a a vak hilh phet u chun David in Uria kawmah, “Khuol apat hung hilo na hi? Bangtia In lama chieh lo?” a ti a.

¹¹ Uria chun David kawmah, “Pathien bawm leh Israel te leh Judate chu puon-In ah a um u a; chun, ka pu Joab leh ka pu mite phûllak ah a kikulh u a; kei ka In a chieh in ka ne’n ka dâwn in, ka zi kawmah ka kuol diek dinga ahim? Na hinna leh na thagau salin ka gen hi, zie chu hih hiel puo’ng ka,” a ti a.

¹² Chun, David chun Uria kawmah, “Tuni’n le zie hin um inla, zing leh chieh na ven na ti,” a ti a. Khutichun Uria chu Jerusalem ah zie ni chuleh a zing chun le a um ta a.

¹³ Chun, David chun an ne dingin a chiel a, chun, zu a dâwn kham sak kêi ta a; chun, nitâk lam chun a In lama chieh lo in a pu suokte laka kuol ding chun a pawt ta a.

¹⁴ Chun, hiti hi ahi a, a zing chun David in Joab chu lehkha a thâk a, Uria chu a puok sak a.

¹⁵ Chun, lehkhathâk achun, “Uria chu gâl khawkna pen ah pan sak unla, a thah u a a thih theihna dingin thah thau in,” ti’n a zik a.

¹⁶ Chun, hiti hi ahi a, Joab in khuo chu a huol vel lai chun, mi hangsante umna hi a a hetnau achun Uria chu a pan sak u a.

¹⁷ Chun, khuo mite chu a pawt u a, Joab chu a do u a, mi khenkhat, David mite laka mi ngêi chu a thiu a; chun. Hit mi Uria le a thi a.

¹⁸ Khutichun Joab chun mi a sawl a, kidona chungchâng thu lam chengcheng chu David a hilh a;

¹⁹ chun, a mi sawlpa kawm achun, “Leng kawma kidona chanchin chengcheng na gen zawh tieng,

²⁰ a lung a nat phut maia, ‘Bang zieka do dinga khutibang taka khuo naih achu na va chieh mai u a? Kulh apat in hun kap ngêi in au tih helo na hiu hi?

²¹ Jerubesheth chapa Abimelek kha kuo thah ahi? Buh gawihgawpna suong numei in kulh apat in a chungah a vak khie a, Thebez akhan a thi hilo ahim? Bangati a khutibanga chu kulh chincha a va chieh na hiu em?’ a tih chun, ‘Na suok Hit mi Uria kha le a thi a puo,’ hun ti’n” tin a hilh a.

²² Khutichun, a mi sawlpa chu a chieh ta a, a va tung a, Joab in a sawl na ziek chengcheng chu David a hilh a.

²³ Chun, a mi sawlpa chun David kawmah, “Mite chun ei hun nawh u a, phul ah ei hun do u a, chun, Keihaw’n a khuo lutnau kawtkhak tieng hielin ka nawh tau a.

²⁴ Chun, Thalpi kapte chun khuo apat in na suokte chu a hun kap u a, tichun leng suokte khenkhat a thiu a, chun, na suok Hit mi Uria kha le a thi tai,” a ti a.

²⁵ Khutichun David chun a mi sawlpa kawm achun, “Joab kawm achun hiti hin va gen in, ‘Zie thu hin na lung sukie diek kihen, chemzâm chun kuomah a khendang puoh ngâl a, nasa zaw sem in khuo chu do unla, hihsieu in,’ ti’n, tîl in” a ti a.

²⁶ Chun, Uria zi chun a pasal Uria a thii tih a hun het chun a pasal chu a sûn ta a.

²⁷ Chun, a sûnna hunbi a beih phet chun David chun a In lam ah a pui a, a zi dingin a nei ta a, chapa a hin sak a. Himahlele David thilhih chun Lalpa a sukipak puoi.