2 SAMUEL 10 - PATHIEN LEKHABU THIENGTHO (BSI)

Amonte leh Suria te Zawhna

¹ Chun, hiti hi ahi a, zie nung chun Amon suonte leng chu a thi a, a chapa Hanun chun a thasang in vai a hawm a.

² Chun, David chun, “A pa khan ei na lungsiet bangin ken le Nahash chapa Hanun chu lungsiet ing ka,” a ti a. Khutichun David chun a pa chungchâng thu a lungmuon dingin amah mite a sawl a. Chun, David mite chu Amon suonte gam a va tung u a.

³ Himahlele Amon suonte leng haw chun a puu Hanun kawm achun, “David hin na pa a zah zieka thamuonna thu gen ding na kawma a hun sawl hih na gingcha? David hin a mite hi khuote hun hihsie dinga enviel leh entha dinga na kawma a hun sawl hilo ahim?” a tiu a.

⁴ Ziephet chun Hanun chun David mi sawlte chu a man a, a khabemul uh langkhat a met sak chiet a, a silhlechen hawu chu a lai tak ah a tawbak uh supha phetin a tan sak a, a sawlmang ta a.

⁵ Chun, David a vak hilh u chun, a muok dingin mi a sawl a; amau chu In tun ding chu a zakcha mah mah u a, leng chun, “Na khabemul uh a hung sauh kit man Jerikoh ah um tadih unla, zie zawh tieng chuleh hung na’n lau,” a ti a.

⁶ Chun, Amon suonte chun David lungnatna a hih kha tau hi tih a hung kihet phet un, Beth-rehon a Suria te leh Zobah a Suria te, sepaih singnih leh, leng Maakah sepaih sangkhat tawh, Tob mite singkhat leh sangnih tawh a thuthak u a, a guoi tau a.

⁷ Chun, David in zie chu a zak in Joab leh sepaih hangsan cheng chengte a sawl a.

⁸ Chun, Amon suonte chu a hung pawt u a, Rabbah khuo lutna kawt khâk lam achun panmun a kibawl u a: chun, Jobah leh Rehob a Suria te haw Tob leh Maakah mite chu a chuom in phul ah a um u a.

⁹ Khutichun malam leh nunglam a hun do ding ahiu hi tih Joab in a het phet chun Israel mite laka a hât hât a teldawk a, Suria mite do ding chun panmun a na guonggalh ta a:

¹⁰ chun, mi dang chengcheng chu a suohpihpa Abishai khut ah a kawih suok kêi a, Amon suonte do dingin panmun le a siem a.

¹¹ “Suria mite chu ka zawh loh chun nangin nei panpih inla, chun, nangin Amon suonte na zawh loh chun ken hun panpih ing ka.

¹² Hangtakin um unla, I miteu leh I Pathien khawpiu huk in kimek tak hitiu; chun Lalpa phasak bang zelin hi hen,” a ti a.

¹³ Khutichun Joab leh a kawma mite chun Suria mite do ding chun kidona mun lam chu a va naih u a; Suria te chu a masang u achun a taisieu a.

¹⁴ Chun, Amon suonte chun Suria mite a taihsiet uh a muh phet un amau chule Abishai masang achun a taisie tau a, khuo achun a lut u a. Chun, Joab chun Amon suonte chu a nusieh a, Jerusalem ah a chieh ta a.

¹⁵ Chun, Suria mite’n Israel mite’n a zo ui tih a kihet phet un a sepaihteu chengcheng a sam khawm u a.

¹⁶ Chun, Hadadezer chun mi a sawl a Euphrates luipi suohlam a Suria mite chuh a puidawk a, Hadadezer sepaih lawiupa Shobak chun ma a pui a; Helam ah ahung u a.

¹⁷ Chun, zie chu David a hilh u a; amah chun Israel mite chengcheng a samkhawm a, Jordan lui a galkai u a Helam achun a hung u a. Chun, Suria mite chun David do dingin panmun a na siem u a, a na do tau a.

¹⁸ Chun, Suria mite chuh Israel te ma achun a taisie tau a; chun, David chun Suria mi kangtalai zasagih chunga chuong leh sakawl chung chuong mi singli a that a, a sepaih lawiupa Shobak le a that a, zie tak achun a thi ta a.

¹⁹ Khutichun Hadadezer nuoia um leng chengcheng ten Israel te masangah a chan uh a sie tai tih a hun het phet un; Israel te tawh kichamna a siem u a, a na sem in a um tau a. Khutichun Suria mite chun Amon suonte chu a panpih ngam ta puou hi.