2 SAMUEL 1 - PATHIEN LEKHABU THIENGTHO (BSI)

Saul leh a Chapate Thihna

¹ Chun, hiti hi ahi a, Saul thih nung in David chu Amalek te va zo in a hungkit ta a, Ziklag ah ni nih a um a.

² Chun, ani thum ni chun mi khat, van sie taka kivan, a luzâng a nin bek lemlum hi Saul kawma a panmun u apat in a hung a; David kawm a hung tun chun leia khupbawk in chibai a bûk a.

³ David chun a kawmah, “Khawi apat a hung na hi?” a ti a; amah chun a kawmah, “Israel te panmun apat hung taidawk ka hi,” a ti a.

⁴ David chun a kawmah, “Bang tawbang in thil a um zel hi? Ei hilh tie,” a ti a. Amah chun a dâwng a, “Kidona apat mite chu a taisieu a, mi tampi chu a pûk u a, a thiu a; chuleh, Saul leh a chapa Jonathan te le a thiu hi,” a ti a.

⁵ David chun a hilhpa tangval kawm achun, “Bangti’n ahim Saul leh a chapa Jonathan chu a thiu hi tih na het?” a ti a.

⁶ Amah chun, “Bangti ahim in Gilboa tâng achun ka na um kha khelkhel a, chun, ngaitie, Saul chu a chemzâm chunga kingaia ding ka mu a, chun, kangtalaite leh sakawl chung chuong mite chun a hun delh sausau u a.

⁷ Chun, a nung lam a hun ngat chun, ei hun mu a, ei hun sama. Chun, ken, ‘Zie hin ka um hi,’ ti’n ka dâwng a.

⁸ Tichun ka kawmah, ‘Kuo na hi?’ ei ti a. Kei chun, ‘Amalek mi ka hi,’ ti’n ka dâwng a.

⁹ Chun, amah chun, ‘Ka kawm ahin hung ding inla, ei vak that mai tie, ka liem nasa ten in, thi tho tho ding ka hi ngâl a,’ a ti a.

¹⁰ Khutichun a kieng achun ka ding a, khutia a pukthak hiel phat chun dam dawk zo diek dinga ka het loh ziekin ka that ta mai a, a luchang a a lallukhuk leh a bana bânbuh chu ka la a, ka pu kawmah, zie tak ahin ka hun chawi hi,” a ti a.

¹¹ Khutichun David chun a silhlechen haw chu a tu a, a bawtthêk a; zie bang mah chun a kawma mi um cheng chengte chun le a hih u a:

¹² Tichun, amau chun Saul leh a chapa Jonathan leh Lalpa mite leh Israel inkawte chu kidona a thah a a um tâk ziek u chun, a sûn u a, a kah u a, nitâk lam tiengin an a ngawl u a.

¹³ Chun, David chun a hilhpa tangval kawma chun, “Khawilam mi na hi?” a ti a. Chun, amah chun, “Gamchuom mi, Amalek mi chapa ka hi,” a ti a, a dâwng a.

¹⁴ Chun, David chun a kawmah, “Lalpa thaunuh bangti dân a that ngam na hi?” a ti a.

¹⁵ Khutichun David chun tangval khat a sama, “Va naih inla, va that in,” a ti a. Khutichun a va sat a, a thi ta a.

¹⁶ Chun, David chun a kawmah, “Na thisan mawh chu nangmah lu chung ngêi ah um hen; nangmah kam ngêi in, ‘Lalpa thaunuh chu ka that hi,’ ti’n na phuong ngâl a,” a ti a.

David in Saul leh Jonathan a Sunna

¹⁷ Tichun David chun Saul leh a chapa Jonathan chu zie kah la hin a kah a;

¹⁸ chun, thalpi kah la chu Juda suonte sinsak dingin a ngên a, Jashar lehkhabu a zik ahi.

¹⁹ Aw Israel, na lopina chu na munsang haw ah a that u a! mihatte a puk tak mai u hih!

²⁰ Gath achun gen kiu inla, Ashkelon kawtthêlhaw achun puong kiu in; Khutilochun Philistia chanute kipâk untin, zektan loh chanute nuomsa’n kiko kha’n au.

²¹ Nang haw Gilboa tângte haw, Na chungu ah dâitui leh guohtui kie kihen, thil lat dingte le pawtsak diek kihen; Zie tak achun milien phaw chu kihdak-um takin a paih ngâl u a, Saul phaw, thau nuh loh phaw bang mai in.

²² Thahte thisan apat leh mi milien thau apat in, Jonathan thal chu a vaikit puoh a, Saul chemzâm chu a thawn in a vaikit kha puoi.

²³ Saul leh Jonathan umdan chu a deihum in a hawih a, A thih un le a kikhen puou, Mupite sangin a chanpha zawu a, Sakeibakneite sangin a hât zawu hi.

²⁴ Nang haw Israel chanute haw, Saul chu kah un, Puonsan hawihte a hun silh sak a, Na puonhawu a sana zêphawih hun belh sakpa chu,

²⁵ Kido lai taka mi liente a na puk tâk mai u chu, Aw Jonathan, na munsang haw ah thah in na um hi.

²⁶ Ka suohpihpa Jonathan, na chung thu a hin ka lungzîng ahi: Ka chungah na pha mah mah sek a, Nei hehpihna chu a mak a, Numei hehpihna a khup ahi.

²⁷ Miliente chu a puk u a, Kidona gâlvante le a mangthai zo tau hi.