2 PETER 1 - PATHIEN LEKHABU THIENGTHO (BSI)

¹ Simon Peter, Isu Krista sawntawlawi leh sawlchak apat chun I Pathien uh leh Hukdampa Isu Krista diktatna vanga, taksanna lul tak ka chan bang uh changte kawmah:

² Pathien leh Isu I Lalpau na hetna ziekuh chun, lungsietna leh chamna na chungu ah sukpun in um hen.

Pathien Sapna leh Tel dawkna

³ Amah lopina leh phatna zâla ei sampa, a chanchin het ziekin, a Pathien thilhih theihna’n, hinna leh Pathien khawksakna lam thu ah chun, thil chengcheng ei pie ngâl a.

⁴ Zie tawbang chun, a thutiem lul tak leh lopi nasatak chuh ei piek I hiu a; khutichun, utchakna zieka van nuoia sietna hung um hi I taihdawk san theihna dingun leh, Pathien nunlekhan kikawppihte I hung hih theihna dingun.

⁵ A hii, zie lang tak chun thatnawp himhim suoh in, na taksannau achun phatna tel sak unla, na phatnau achun hetna tel sak unla;

⁶ na hetnau achun kidêkna tel sak unla, na kidêknau achun thuokhatna tel sak unla, na thuokhatnau achun Pathien khawksakna tel sak unla;

⁷ Na Pathien khawksaknau achun suohpih kilainatna tel sak unla, na suohpih kilainatnau achun, hehpihna tel sak un.

⁸ Ziehaw hi phatna na sinmawhteu chuh a hi a, na neih uh chun, I Lalpau Isu Krista hetna lam achun kiting taka, gah suoh takin hun siem ding ahi.

⁹ Kuole, zie thil haw neilo chuh mitdûk a hi a, naicha a mi ngen a mu thei a, a malai gitlohna haw apat sukthiena um ahi tai tih a hengilh sek hi.

¹⁰ Zieziekchun. suohpihte, Pathien hun sapna leh hun têlna chuh sudet dingin thatnawp suoh zawsem un; ziehaw chuh na hih uh le vang, bangmah tikin puk puo’n lau.

¹¹ Khutibang chun, I Lalpau leh Hukdampa Isu Krista kumkhuo lalgam a lutna dinga thuneihna bukim chuh pieka um ding na hiu hi.

¹² Chun, thutak na muh uh khah na hetsau leh, zie a chuh dettaka um hita mahleu chin le, zie thu haw khah hun hetsak kit zing ding ka hi.

¹³ Zie bâwkcha a ka um sung cheng hin, nang haw hun hetzing a, hun chawhhalh zing hi pha ka sak ahi.

¹⁴ I Lalpau Isu Krista’n ei hilh bang khan, ka bâwkcha kawihmangna ding hun tung vak ding ei tai tih ka he ngâl a.

¹⁵ A hii, ka chiehdawk nung leh, zie thil haw chuh na hetzing theihna dingun, hahpi a bawl ding ka hi.

Krista Lopina Muhna

¹⁶ I Lalpau Isu Krista thilhih-theihna leh, a hung kitna ding thu nanguh ka hun hetsak lai khan, lungthim thiem a suktuoh a siemkawm thusim zui ka hi puou a, a lopina chungnung, mit ngeia mu leh hetpihte ka hi zawu a puo!

¹⁷ Amah chun, Pa Pathien kawm apat limbawlna leh lopina a mu a, zielai chun lopina nasatak apat chun, zie tawbang aw hi a kawmah a hungtung a “Ziehi, ka chapa deihtak, ka lungkimna mah mah chuh ahii,” ti’n.

¹⁸ Chun, tâng thiengtho chunga a kawma ka um lai uh khan, zie aw chuh van apat a hung pawt, keimau mawng in ka zak uh ahi.

¹⁹ Zieziekchun, thiemgaute thu genlawk haw akhan muonna det zawsem ka neih uh ahi. Zie chuh, na lunggil uh a Zingsawl aksi a hung vak masang sieh in, khawvak ma a thaumei vak tawbang in zie thu chuh na lungthim uh salhvakna’n mang leu chin pha ding ahi.

²⁰ Ziehaw bân achun Pathien Lehkhabu a hilhlawkna thu haw hi, kuoma’n amah mai hetna’n a hilhchien thei puoi tih hi hezing un.

²¹ Hilhlawkna thu himhim hi, mihiemte deihna a pawt ahi puoh a, Pathien mi thiengtho te’n Thagau Thiengtho puihhuoi bang zela ahun gen sek uh ahi zawi.