2 LENGTE 8 - PATHIEN LEKHABU THIENGTHO (BSI)

Shunem Numei Kilehkitna

¹ Chun, Elisha’n a chapa a sukdam sak numeinu kawm achun, “Kipan inla, nang leh na inkawte tawh, na um theih theih nau ah va um tadih un; Lalpa’n kiel hun kiek sak ding ahi, zie gam ahin kum sagih sung kiel kie ding ahi,” ti’n a gen a.

² Tichun, a thuhilh na chu a mang a, a inkawte tawh Philistia te gam ah kum sagih sung um dingin a chieh tau a.

³ Chun, kum sagih a hung kivei nung chun, zie numeinu chu Philistia te gam apat chun a vaikit ta a, a In leh a lote leng kawma ngên ding chun a va chieh a.

⁴ Chun, leng chu Elisha suokpa, Gehazi tawh a na kiho lai tak uh a va mu a, leng chun Elisha thilmak hihte he nuom a hi a.

⁵ Chun, Elisha’n mithi a sukhin kit dante leng kawma a gen lai tak chun, numeinu chun leng kawma a thil nget chu a va tun a. Gehazi chun, “Hepu, ziehi ahi numei chuh, ziehi ahi, a chapa Elisha’n a sukhin kit chuh,” a ti a.

⁶ Chun, leng in Gehazi thusim gen chu a vak dawt phet chun, a dik ahi, a tih pih ta a, tichun, leng chun a miliente a sama, amah thil neih chengcheng leh, kum sagih a vakmang sunga a thai gah man ding gûn cheng chu pie kit vek dingin a hilh ta a.

Elisha leh Suria Leng Benhadad

⁷ Chun, Elisha chu Damaska khuo ah a hung a, chun Suria lengpa Benhadad chu a dam puoh a; tichun, Pathien mi zie tak ahin a hung hi tih hilh ahi a.

⁸ Chun, lengpa’n Hazael kawmah, “Thilpiek chawi in la, Pathien mi hopih dingin va chieh in la, ka dam zawh ding leh ka dam zawh loh ding Lalpa ei dawt sak dingin va gen in” a ti a.

⁹ Khutichun, Hazael chu amah hopih ding chun a va chieh ta a. Kipahman dingin Damaska khuo a thilpha cheng, sangawngsau sawmli puok a keng a, a ma achun a va ding a, “Na chapa, Benhadad, Suria leng in, ‘Ka natna hi ka dam dawk kit dem?’ ti a na kawma hi ei hun sawl ka hi,” a ti a.

¹⁰ Chun, Elisha chun a kawmah, “Chieh kit in la, a kawmah, ‘Dam dawk kit tei ding na hi,’ a tii, va tih, amahvang chuh, thi tei ding ahi tih Lalpa’n ei hetsak ahi,” a ti a.

¹¹ Tichun, amah a dinga zahchâk um khawp hielin a enchang kêi a; chun Pathien mi chuh a kap ta a.

¹² Chun, Hazael chun, “Hepu, bang zieka kap na him?” a ti a. Elisha chun a dâwng a, “Israel chate chunga thil tizat-um tak na hun hih ding hi ka mu a, a kulhpi dettak teu chu mei in hâl siet sak in na tin, a tangvalteu chuh chemzâm in that in na tin, chun, a naupangteu chuh leivui tawh chilkhawm in na tin, a numei nauvawp teu chuh phil kek sak ding na hi ngâla,” a ti a.

¹³ Chun, Hazael chun, “Bangti’n zie bang thilhih thei chu ka hung hi dinga ahim? Bangmahlo ka hi ngâl a,” a ti a. Elisha chun a dâwng a, “Suria te chunga leng hung hi ding na hi tih Lalpa’n ei muh sak ahi,” a ti a.

¹⁴ Tichun, Elisha kawm apat in a pawt a, Benhadad kawm lam achun a chieh ta a; amah chun, “Elisha’n banga a hun na hilh chuh?” a ti a. Amah chun, “Pha dawk kit tei ina, ti’n ei na hilh hi,” a ti a.

¹⁵ Chun, a zing kit chun Hazael chun puon sah tak a la a, tui ah a dieh a, zie chun leng mai a tuom sak a, a thi ta a. Tichun, Hazael chu Benhadad thasang in Suria leng in a pang ta a.

Juda Leng Jehoram

¹⁶ Chun, Israel leng Ahab chapa Joram in kum nga vai a hawm kum chun, Juda leng Jehoshaphat chapa Jehoram chun vai a hawm pan a,

¹⁷ a vaihawm pat lai chun kum sawmthum leh nih mi ahi a; Jerusalem ah kum giet vai a hawm a.

¹⁸ A zi chu Ahab chanu ahi a, Ahab inkawte mah bang chun Israel lengte lampi phalo tak chu a hawh a,

¹⁹ himahlele, a suokpa kawma, a suonte’n vaihawm zel ding ahiu ui ti a, a thutiem ziekin, Lalpa’n Juda gam chu a susie nuom puoh a.

²⁰ Jehoram vaihawm sung chun Edom te chu Judate chungah a kiphin u a, a chung u a leng ding a kisiem kawm u a.

²¹ Tichun, Jehoram chu a kangtalai cheng tawh, Edom sepaihte’n a chutphah nau, Zair khuo zuon ding chun a kipandawk ta a. Zan lai chun, amah leh a kangtalai teu chu a susieu a, a taidawk u a, a sepaihte cheng chuh amau In lam chietah a chieh tau a.

²² Khutichun, Edom te chu Juda gam apat a a na kipuochuom him ahi tau a. Zie hun lai tak chun Libnah khawpi chule a na kiphin u a.

²³ Chun, Jehoram chanchin leh a thilhih chengcheng chu Juda lengte vaihawm lai thu zikna bu ah a kizik hi.

²⁴ Chun, Jehoram chu a pulepate kawmah a ipmu ta a, David khawpi ah a vui tau a; a chapa Ahaziah chun amah thasang in vai a hawm ta a.

Juda Leng Ahaziah chuh

²⁵ Israel leng Ahab chapa Joram vaihawm kum, kum sawmlenih kum chun, Juda leng Jehoram chapa Ahaziah chun vai a hawm pan a.

²⁶ Khutia Ahaziah chun vai a hun hawm pat kum chun amah chu kum sawmnih leh nih a upa ahi pan a; tichun, Jerusalem achun kum khat vai a hawm a. A nu min chu Athaliah ahi a, Israel leng Omri chanu ahi.

²⁷ Ahaziah chu leng Ahab inkawte tawh kichêng a, kichanau ahih ziekun, Ahab inkawte gitloh bang mah chun, Lalpa deih loh lam thil gilo a hih a.

²⁸ Chun, leng Ahaziah chun, Israel leng Joram chu Suria leng Hazael dona achun a kithuohpih a. Gilead gama Ramoth achun sepaihte a kisutuoh u a, kidona achun Joram chu a liem ta a.

²⁹ A liemna apat a kisudam ding chun Jezreel khawpi ah a vaikit ta a, chun, Juda leng Jehoram chapa Ahaziah chu Ahab chapa Joram damloh ziek chun a veh dingin Jezreel ah a va chieh a.