2 LENGTE 6 - PATHIEN LEKHABU THIENGTHO (BSI)

Heicha Chang Muh kitna

¹ Chun, ni khat chu, thiemgau pawl khatte chun Elisha kawmah, “Ka chênnau mun hi kei u dingin a kibingtiek taluo a.

² Jordan luia va chieh a, thing ka va sat theihna dingun ei chieh sak in, chênna ding In, ka bawl theihna dingun,” a tiu a. Elisha chun, “Aphai, chieh tau u,” a ti a.

³ Chun, a laku a mi khat chun, “Nang le ka kawm u ah hung in,” a ti a. Tichun, lem a sa a, “Hung ing ka,” a ti a.

⁴ Khutichun, a kawm u ah a chieh ta a. Tichun, Jordan lui a tun u chun thing chu a vak phuk pan tau a.

⁵ Chun, mi khatin thing a vak phuk lai tak chun, a heicha chang chu tui lak ah a kie ta a, amah chun, “E khai! hepu mi a ka khelh ei ve!” ti’n a kap ta a.

⁶ Ziephet chun Pathien mi chun, “Khawitaka a kiek na?” a ti a. Amah chun a kiekna mun a etsak a. Tichun, thingtuoi a vak sat a, tak achun a khawh lut a, tichun, heicha chu a hung kilap dawk ta a.

⁷ Chun, amah chun, “Lah le,” a ti a. Khutichun, a vak bân a, a la ta a.

Suria Sepaihte Guollahna

⁸ Chun, Suria leng chun Israel te a do a. A miliente chu hopih in, a panmun khawhna dinguh a guonggalh ta a.

⁹ Himahlele, Pathien mi chun Israel leng chu, Suria te’n lambut dinga a chânguk ziek u chun, zie mun chu va naih lo dingin a hilh ta a.

¹⁰ Chun, Israel leng chun Pathien mi’n ana hilh tâksa mun chu mi a va etthâk sak seka; zie tak achun khatvei, nihvei mai le hilo in ana kihumbit seka.

¹¹ Tichun, zie thu achun Suria leng chu a lungdawng ta a; a miliente chu a sama, a kawm u ah, “I lak uh a hin kuo hi a Israel te lama pang, nei hilh nuom puoh ding um?” a ti a.

¹² Chun, a lak u a mi khat chun, “Kuomah ka pang puou hi, aw lengpa hepu, Israel gama um, thiemgau Elisha hin, na indan sunggil a na gente hih Israel leng hi a hilh zel ahi zawi,” a ti a.

¹³ Ziephet chun leng chun, “Khawitak a um ahi? Va hawl tiem u, va matsak ing ka,” a ti a. “Elisha chu Dothan khuo ah a um hi,” ti’n a hilh u a.

¹⁴ Khutichun, sakawlte, kangtalaite, sepaih tamtak te, zie tak achun a sawl a, zan in a va chieh u a, khuo chu a huol tau a.

¹⁵ Chun, Elisha suokpa chu, zingkal mataka a va thawh a, In apat a va pawtdawk phet chun, Suria sepaihhawn chu sakawl tawh, kangtalai tawh, khawpi a huolkhum uh a mu ta a. Tichun, Elisha kawmah a chieh kit vak a, a kawmah, “E khai! hepu, bang I ti ta die?” a ti a.

¹⁶ Chun, amah chun, “Lau dah ta, amau haw lama pang sangin, ei lama pang a tamzawu a puo!” a ti a.

¹⁷ Ziephet chun, Elisha chu a paucham a, “Aw Lalpa, a mit sukvak sak inla, muh sak in,” a ti a. Lalpa’n a pauchamna chu a dâwng a, tichun, Elisha suokpa chun tâng panga sakawl hawn leh mei kangtalai, Elisha kimvela um chu a mu ta a.

Suria Sepaihte Mit Sukdûkna

¹⁸ Tichun, Suria te’n amau lam a hun zawt suk u chun, Elisha chu Lalpa kawmah a paucham a, “Ziete haw hi a mit uh hun sukdûk sak in,” a ti a. Chun, Elisha thu bang chun a mit uh a hun hih dûk sak ta a.

¹⁹ Chun, Elisha chu a kawm u ah a va chieh a, “Ziehi lampi a hi puoh a, khawpi le a hi diek puoi. Ei hun zui un, na mi hawlpau kawm achun hun pui ing ka,” a ti a. Tichun, Samari khuo ah a pui ta a.

²⁰ Chun, Samari khuo sung a va tun u chun, Elisha’n, “Lalpa, ziete haw hin a hun muh theihna dingun a mit uh vak hih vak sak in,” a ti a. Chun, Lalpa’n a mit uh a vak sukvak saka, a mu tau a; ngaitie, Samari khawpi sunga um ana hizing mai u a.

²¹ Chun, Israel leng chun Suria mite chu a muh chun, Elisha kawmah, “Hepu, amau haw hi ka that die? Ka that die?” a ti a.

²² Amah chun a dâwng a, “That lo e! chemzâm leh thalpi a na sal matte chu na thah loh ding ahi. Chângthâk leh tui hun luih sak inla, neu in, dâwn u hen la, a puu kawm lam ah chieh kit u hen,” a ti a.

²³ Tichun, Israel leng chun nek ding phatak in a bawl sak a, a nek u a, a dâwn zawh u chun, Suria leng kawmah a chieh sak kit vek ta a. Zie a kipat chun, Suria te chu Israel gam achun a gâl kuon kit ta puou hi.

Samari Kielpi

²⁴ Zie nung chawmkhat hal chun, Suria leng Benhadad in a sepaih chengcheng a sam khawm a, Samari khuo chu a ûmkimvel ta a.

²⁵ Chun, a ûmkimvel ziek u chun Samari khuo achun kiel a huoisie mah mah ta a; sabiltung luguh-hawm hi sekel sawmgiet in a zuok u a, vakhu êk hile khawn khat sekel nga’n a zuok hiel uh ahi.

²⁶ Chun, Israel leng chu kulh chunga a kalh toh lai chun, numei khatin a kawmah, “Aw lengpa, hepu, ei panpih in,” ti’n a sama.

²⁷ Chun, amah chun, “Lalpa’n a hun panpih loh ngâl chun, ken khawi apat in em ka hun panpih ding? Buh ahim, grep tui ahim, ka nei a ahim?” a ti a.

²⁸ Chun, lengpa mah chun a kawmah, “Bang na ti a ahim?” a ti kit a. Amahnu chun a dâwng a, “Zie numei hin ka kawmah, ‘Tuni hin na chapa hi I nek dingun tuok inla, zing leh kei chapa hi ne nai tiu,’ a ti a.

²⁹ Tichun, ka chapa chu ka huon u a, ka neu a; a zing chun ken a kawmah, ‘Na chapa chu I nek dingun tuok tah le,’ ka tih phetin, a chapa chu a selgu a ahi,” a ti a.

³⁰ Chun, leng chun zie numei thugen chu a zak chun, lungkham in a puon a bawtthêk a, (kulhpi chunga vakviel lai ahi a) mipi kulh bâng naih a umte chun a puon nuoia kawlladip puon a silh chu a muu a.

³¹ Tichun, amah chun, “Tuni hin Shaphat chapa Elisha hi a luchang tan a hihloh chun, Pathien in a lawh lawh ei lawh mai hen la, zie sanga nasa zaw chun le,” a ti a.

³² Tichun, Elisha chu a In ah a chu a, upa haw le a chuu a; chun, lengpa chun a kawmah mi khat a sawl a, himahleh, a mi sawlpa chun a kawma ahung tun ma’n upahaw kawm achun “Zie tuolthatpa chapa ka lu la dingin mi a hun sawl hi tih nangun le na heu em? Ngaitiem u, a mi sawlpa chu ahung tun phat phat leh, kawt ana khâk un la, kawtkhak khan ana nang chak kêi u; a nung achun a pu tuol tawh git le a kihe zieng ngâl hilo ahim,” a ti a.

³³ Chun, khutia amau haw a hopih zing lai chun, ngaitie, a mi sawlpa chu a hungtung suk ta a; chun, lengpa chun, “Ngaitie, zie thil phalo hih Lalpa hun sawl ahi hi; bang dinga Lalpa hungaih nalai ding ka him?” a ti a.