2 LENGTE 5 - PATHIEN LEKHABU THIENGTHO (BSI)

Naaman Phâk Sukdamna

¹ Suria te sepaih lawiupa Naaman chu, Suria leng ngaihsan leh zah a kai a, a ziek chu, Lalpa’n Naaman manga Suria sepaihte chu gâl zawhna a piek sek ziekin. Sepaih hangsan tak a hi a, himahleh, phâk ahi.

² Suria te chu ahawn hawn a galdo a a pawt lai un, Israel gam apat in numei chapang neucha hih salin a hun pui u a; amah chu Naaman zi suok chun a um ta a.

³ Chun, ni khat chu, amah chun a pi kawmah, “Ka pu hi, Samari khuo a thiemgau kawmah va chieh leh ka ti e! a phâk hi a na hihdam mai ding hi ven!” a ti a.

⁴ Chun, Naaman in zie thu a zak phet chun, leng kawm achun a chieh a, zie numei chapangnu thugen chengcheng chu a va hilh ta a.

⁵ Chun, Suria leng chun, “Va chieh ngut tie, Israel leng kawm achun lehkha thâk ing ka,” a ti a. Tichun, a kipan dawk ta a, dangkaguo talent sawm leh, sana tang sanggup leh, silhlechen kithenna ding sawm a keng a.

⁶ Chun, “zie lehkha hi ana mu’n na tin, ngaitie, ka suokpa Naaman hi a phâkna na sukdam sak dingin na kawmah ka hun sawl hi,” tihna lehkha chu Israel lengpa chu a va pie a.

⁷ Chun, Israel leng chun, zie lehkha chu a vak sim phet chun, tihna ding helo in, a puon a bawtthêk a, “Suria leng hin bangti dana, zie pa hi sudam thei dinga ei gingcha a hi die aw! Pathien guola thihna leh hinna dinga thilhih theihna nei kha ei sak ahi die aw? ngaihtuoh un, ka chunga lemchâng a hawl ahi hi,” a ti a.

⁸ Chun, Thiemgau Elisha’n Israel leng in a puon a bawtthêk hi tih, a na het phet chun, leng kawm achun, “Bang ziekin ahim, na puon na bawhthek? Zie pa chu ka kawmah hun sawl in, tichun, Israel gama hin thiemgau a um hi tih a na muh sak ing ka,” a ti a.

⁹ Khutichun, Naaman chu a sakawlte tawh, a kangtalaite chu tawh a va chieh a, Elisha kawtkhak bul achun a va ding a.

¹⁰ Chun, Elisha chun, “Chieh in la, Jordan lui ah sagih vei va kisil inla, tichun, na phehlevo ngêi pukit in na tin, hung thieng ta’n la,” ti’n mi a sawl a.

¹¹ Himahlele, Naaman chu lungna takin a chieh kit ta a, “Ken lah, amah ngêi chu ka kawmah hung pawt in tin, hung ding in tin; Lalpa a Pathien kawmah paucham in tin, ka phâkna chung hi a khut in mai viel in tin, phâk hi a hun sukdam ding ahim ka ti a.

¹² Damaska lui, Abana te, Pharpar te chuh Israel gama lui chengcheng sang hin phazaw lo ding ahim? Ziehaw achun kisil in, ka kihih thiengtho thei puoh dem!” a ti a. Khutichun, a kilehhei a, lungna takin a chiehmang ta a.

¹³ Ziephet chun, a suokte chun a va naih u a, a kawmah, “Hepu, thiemgau khan thil haksa tak hun hih sak ding bang hita lele, hih mai ding hilo di? ‘Va kisil inla, va kihihthieng in’ na kawma a tih kha hih zawk kilawm hilo ahim?” a tiu a.

¹⁴ Ziephet chun, Naaman chu Jordan lui ah a va chieh a, Pathien mi gen bang chun, Jordan lui ah sagih vei a va kidieh a; tichun, a taksa chu, naupang phehlevo bang mai in a hung um ta a, a hung thieng ta a.

¹⁵ Tichun, amah leh a lawite cheng chu Pathien mi umna lam achun a vaikit tau a, a masangah a va ding u a, a kawmah, “Tuhin, Israel Pathien tih loh hi, lei chung chengcheng achun pathien dang a um puoi, tih ka he tau hi; zieziekchun, lungsiet takin hepu, kipahman hi la tie!” a tiu a.

¹⁶ Himahlele, Elisha chun, “A na ka sep sek, Lalpa hinna sâlin ka gen hi, thilpiek, bangmahcha la puo’ng ka,” a ti a. Himahlele, Naaman chun la dingin a ngên hâm hâm a; himahleh, a la nuom diek puoh a.

¹⁷ Chun, Naaman chun, “Na lak loh ding leh, na suok hi sabiltung nih puok khawp, lei tang nei puok sak in; tu a pat hin vang, Lalpa kawm tihloh ah, hâlmang thillat leh kithawihna himhim pathien dangte kawmah lân ta puo’ng ka.

¹⁸ Khutichun, ka lengpa hi Suria pathien Rimmon ho-in a ka va kitawnpih leh ka va ho hi, Lalpa’n ei ngaidam ina tih ka gingchai. Lalpa’n ei ngaidam ngêi ngêi ina,” a ti a.

¹⁹ Chun, Elisha chun a kawmah, “Lungmuong takin chieh in,” a ti a. Khutichun, Naaman chun a taihsan ta a. Gamla lo cha a chieh man chauh nalai a.

Gehazi Gitlohna leh Gawtna

²⁰ Himahlele, Elisha suok Gehazi chun, “Ka pu hin, Suria mi Naaman thil hun chawihsakte la lo in a chieh sak kit ta mai a! Suria mi thilpiek chu a lâk ding hi a, Lalpa hinna sâlin ka gen hi, delh ka ting, bang ahim khat bêk va la’ng ka,” ti’n a lungthim in a ngaihtuoh a.

²¹ Khutichun, Gehazi chun Naaman chu a delh ta a. Naaman chun khutia mi hun delh a muh chun, a na hopih guo’n, kangtalai apat chun a chawm tha a, “Apha lam thu ahi na maw?” a na ti a.

²² Chun, amah chun, “Thu phalam hi e, ka pu’n, ‘Tu tak khan Ephraim tâng gam apat in thiemgau pawl khat laka tangval nih in ei hun tawh phut u a, amau chu dangkaguo talent khat leh silhlechen, kithenna ding nih pie’n,’ ti’n ei sawl ahi,” a ti a.

²³ Ziephet chun, Naaman chun, “Talent nih hi la aw!” a ti a. Tichun, la dingin a ngên hâm a, tichun, dangkaguo talent nih leh, puonchen kithenna ding nih chu tawh, dip nih ah a khum a, a suokte nih a puok sak a, a ma achun a chieh pih tau a.

²⁴ Chun, tânga Elisha chênna a va tun u chun, Gehazi chun a lâksak a, In sung ah a puo lut a. Naaman suokte chu a sawl kit a, a chieh tau a.

²⁵ Amah chu In sung ah a lut kit a, Elisha chun a kawmah, “Khawia chieh mang kêi na hi?” a ti a. Amah chun, “Hepu, khawimah ah ka chieh puoi,” a ti a.

²⁶ Himahlele, Elisha chun a kawmah, “Hun hopih guo a, kangtalai apat a a hung kum lai tak khan, ka thagau chu na kawmah a um hilo ahim? Dangka te, silhlechente, olive huon te, grep huon te, belamte, bâwngchal te, suokpa leh suoknu haw hih lâk hun ahi puoi!

²⁷ Zieziekchun, Naaman phâk kha na chungah um in tin; kumlekhuo’n, na suonte le man zel ina,” a ti a. Tichun, a kawm apat chun, vuk banga vam a phâk in a chiehdawk ta a.