2 LENGTE 3 - PATHIEN LEKHABU THIENGTHO (BSI)

Israel te leh Moab te Kidona

¹ Chun, Juda leng Jehoshaphat vaihawm, kum sawm leh kum giet na a chun, Ahab chapa Jehoram chun Israel te chungah, Samari khuo ah vai a hawm pan a; kum sawm leh kum nih vai a hawm hi.

² Chun, Lalpa mitmuh in thil gilo tak a hih sek a, himahleh, a nu Jezebel leh a pa Ahab bang hielin vang a hih puoi. Amah hin chu a pa Baal suong thiengtho hona siemte kha a paih dawk a.

³ Himahlele, Israel te thil hihkhelh sakpa, Nebat chapa Jeroboam gitlohna haw chu a haihsan puoh a, Israel chate chu a gitloh thil hihnau apat chun a chawlhsak diek puoi.

Israel te chunga Moab Kiphinna

⁴ Moab leng Mesha chu belam vulh mi a hi a; amah chun Israel leng kawmah belamno nuoi khat leh belamchal nuoi khat mul haw chu zie hin a pie sek a.

⁵ Himahleh, leng Ahab thih nung chun, Mesha chuh Israel te leng chungah a hung kiphin ta a.

⁶ Chun, khutih lai chun, leng Jehoram chu Samari khuo apat in a pawt a, a sepaihte chengcheng chu a sam khawm ta a.

⁷ Tichun, Juda leng Jehoshaphat kawmah, “Moab leng ka chungah a kiphin a, Moab te nei vak dopih nuom die?” ti’n mi a sawl a. Amah chun, “Hun dopih nuom e! kei leh nang, ka mite leh na mite chu pumkhat I hiu a, ka sakawlte chu na thu thu a na mat theih a puo!” a ti a.

⁸ Chun, amah chun, “Khawitak lampi ah ahim I chieh dinguh?” a ti a. Jehoram chun a dâwng a, “Edom thalek lampi lam ah,” a ti a.

⁹ Khutichun, leng Jehoram leh Juda leng chu Edom leng chu tawh a chieh tau a. Ni sagih zet a chieh nung u chun, sepaihte haw leh a gancha puihteu tui dâwn ding a um ta puoh a.

¹⁰ Chun, Israel leng chun, “E khai, Lalpa’n, ei uh leng thum te hi Moab te khuta piek dingin ei puikhawm ahi ta hi!” a ti a.

¹¹ Himahlele, Jehoshaphat chun, “Zie taka hin Lalpa ei dawtsak ding, thiemgau kuo ahim bêk umlo ahiu em?” a ti a. Leng Jehoram sepaih liente laka khat chun a dâwng a, “Elija khut tui buok sakpa, Shaphat chapa Elisha, zie tak ahin a um a puo!” a ti a.

¹² Chun, Jehoshaphat chun a kawmah, “Thiemgau diktak ahi,” a ti a. Khutichun, Israel leng leh Jehoshaphat chu Edom leng chu tawh, Elisha kawm achun a va chieh tau a.

¹³ Chun, Elisha chun Israel leng kawm achun, “Bang zieka hun panpih ding ka him? Chieh inla, na nu leh na pate’n thiemgau a dawt sekteu kha va dawng in,” a ti a. Jehoram chun a kawmah, “Chieh lo e, leng thum te hi Lalpa’n Moab te khuta piek dingin ei pui khawm uh ahi hi,” a ti a.

¹⁴ Ziephet chun, Elisha chun, “A na ka sep sek, Sepaihte Lalpa hinna sâlin ka gen hi, Juda leng Jehoshaphat hi zah lo hi leng chuh, nang kawm a hin chuh hih ding bangmah neilo mah hi veng!

¹⁵ Abang hileh, kingkang tum thiem ei hun sap sak tiem u,” a ti a. Tichun, kingkang tum thiem in a hun tum phet chun, Lalpa thilhih theihna chu a chungah a hung um ta a,

¹⁶ Chun, amah chun, “Lalpa’n hiti hin a tii: ‘Zie guom chengcheng hi laikuok chelchul unla;

¹⁷ Lalpa mah in hiti hin a tii: Huih himhim mu puou un na tin, guoh him him le mu diek puou un na tin; himahleh, zie guom hi tui in hung dim vek in tin, tichun, nang haw leh na gancha teu in dâwn un lau,’” a tii.

¹⁸ Chun, Elisha chun, “Ziehi, Lalpa a dinga thil baihlam tak ahi a, Moab te chung achun le guolzawhna hun pie ding ahi.

¹⁹ Chun, kulhpi nei khuo chengcheng leh, khawpi pha chengcheng chuh hihsieu un na tin; thing pha cheng chu phuk un na tin; tuikhuk cheng chu hih bing un na tin, mun pha chengcheng chu, suongin sep sie suok vek un lau,” a ti a.

²⁰ Chun, a zingkal kita, zingkal kithawih hun lai vel chun, Edom gam lam apat in tui a hung luong a, a gam chuh tui in a hung dim ta a.

²¹ Chun, Moab te cheng chun, amau haw do dingin leng thum te a hung kuon to ui tih a na zak phet u chun, galdo thei cheng a kisamkhawm u a, gamgi ah a na pang tau a.

²² Tichun, zingkal kita a hung thawh dawk u chun, nisa’n tui a vak salh chu, Moab te chun, a zawn u a tui chu thisan bang mai in a mu tau a.

²³ “Thisan ahi khu, lengte hi amau leh amau a kido u a, amau leh amau kithat tuoh hitei un au; hung tiem u Moab te haw giehbuk va luh hitiu,” a tiu a.

²⁴ Himahleh, giehmun a va tun u chun, Israel te chu thakhat in a kipan u a, a na leh nawh kit tau a. Israel te chun a delh zui kawm u chun a that zel u a, a gam u ah a lut tau a.

²⁵ Tichun, a khawpiteu chu a hihsieu a; a lo mun phalai teu achun suong a sep dim u a, suong a dim suok macheng chun, a tuikhukteu chu a subing u a, thing pha cheng chu a phuk sak tau a. Atawp in, Kir-hares khawpi chauh a sît u a, zie chule vaisuongseh sep lawi in a huol u a, a do u a.

²⁶ Chun, Moab leng chun, a kido u chu zo dingin a kigingcha ta puoh a, tichun, Suria leng kawm tung dinga taih dawk pek guo’n, chemzâm chawi lawi mi, zasagih a puidawk a, himahlele, a hithei diek ta puoh a.

²⁷ Tichun, a chapa upapen, a thasanga hung vaihawm ding chuh, kulhsip a chun Moab pathien kawma hâlmanga kithawihna’n a mang ta a. Zie chu, Israel te chun a lau mah mah tau a, tichun khawpi chu a taihsan u a, a gam lam u ah a vaikit tau hi.