2 LENGTE 24 - PATHIEN LEKHABU THIENGTHO (BSI)

Juda Leng Jehoiakim

¹ Jehoiakim vaihawm lai chun, Babulon leng Nebuknezar chun Judate chu a hun do a, tichun, Jehoiakim chu a thu nuoi ah kum thum a um a, zie nung chun a chungah a hung kiphin ta a.

² Chun, Lalpa’n Kaldai te, Suria te, Moab te leh Amon suonte chu Jehoiakim do a, Juda gam susie ding chun a sawl ta a. A suok, thiemgaute manga a gen Lalpa thu guolin Juda gam susie dingin a sawl a.

³ A muhphak loh a chawnmang ding thu chu Lalpa thupiek in Juda gam chungah a hungtung ngêi ta a; Manasseh gitlohna leh a thilhih chengcheng leh,

⁴ pawikhawihlo thisan a suoh a, Jerusalem chu pawikhawih lo te thisan a a sukdim ziekin Lalpa’n a ngaihdam nuom loh ahi.

⁵ Tichun, Jehoiakim chanchin dang leh, a thilhih cheng chu, Juda lengte vaihawm lai chanchin zikna bu a chu zik hilo ahim?

⁶ Khutichun, Jehoiakim chu a pilepute kawmah a ipmu a; chun, a chapa Jehoiakin chun a thasang in vai a hawm ta a.

⁷ Chun, Aigupta leng chu a gam apat in a hung pawt kit ta puoh a, Babulon leng chun Aigupta gambung neute leh, Euphrates lui apat Aigupta tawh gamgi mâllam pang chengcheng, a thu nuoia a kawih tâk ziekin.

Juda Leng Jehoiakin

⁸ Jehoiakin chu a vaihawm pat lai chun, kum sawm leh kum giet a hi a; Jerusalem ah tha thum vai a hawm a, a nu min chu Nehushta, Jerusalem khuo a Elnathan chanu ahi,

⁹ Chun, a pa thilhih dante zui in, Lalpa mitmuh in thil phalo takte a hih seka.

¹⁰ Zie hun lai chun, Babulon leng Nebuknezar mite chu Jerusalem ah a va chieh to u a, khuo chu a huol tau a.

¹¹ Chun, khutia mite’n a do lai u chun Nebuknezar chu Jerusalem achun ava chieh a,

¹² Tichun, Juda leng Jehoiakin chu, a nu tawh, a chapate tawh, a miliente tawh, a leng In enkawlte chengcheng chu tawh, leng kawm achun a kipie tau a. Nebuknezar in a vaihawm, kum gietna achun Jehoiakin chu a man a.

¹³ Chun, Ho-In leh leng In a go cheng chu Babulon lam ah a puo mang vek ta a. Lalpa’n a na gen guol in, Nebuknezar chun, leng Solomon in Ho-In matchâk, sanati a a siem chengcheng chu a sugawp vek ta a.

¹⁴ Chun, Nebuknezar chun, Jerusalem a mipi chengcheng, miliente, mapuitu cheng, singkhat zet chu a puimang a. Chuleh, mi khutthiemte, thiksêkte tawh a puo mang a, Juda gam achun mi chagah te haw chauh chu a taihsan ta a.

¹⁵ Chun, Nebuknezar chun Jehoiakin chu Babulon ah a pui a; chun, lengnu te, lengpa zite, a miliente leh Juda gama mihat hangsante chu tawh salin a pui vek ta a.

¹⁶ Chuleh, Nebuknezar chun, pasalpha sang sagih leh, khutthiem leh thiksêk mi sang khat, mihat cheng leh kido thei mi chiet chu, Babulon ah salin a pui vek a.

¹⁷ Chun, a pa suohpih Mattaniah chu Babulon lengpa chun a thasang in a lâksak a, amin chu Zedekiah ti’n a then saka.

Juda Leng Zedekiah

¹⁸ Zedekiah chu a vaihawm pat lai chun, kum sawmnih leh kum khat a hi a, Jerusalem ah kum sawm leh kum khat vai a hawm a. A nu min chu Hamutal, Libnah khuo a Jeremia chanu ahi.

¹⁹ Leng Jehoiakin thilhih cheng hihin, leng Zedekiah chun Lalpa mitmuh in thil phalo tak a hih sek a.

²⁰ Tichun, Jerusalem leh Judate chung achun Lalpa a lungna ta a, tichun, a mit muh phâk loh ah a nawhmang ta a. Zedekia chu Babulon lengpa chungah a kiphin zing a.