2 LENGTE 22 - PATHIEN LEKHABU THIENGTHO (BSI)

Juda Leng Josia

¹ Josia chu, Judate chunga a vaihawm tûng lai chun, kum giet mi a hi a, Jerusalem ah kum sawmthum leh kum khat vai a hawm a. A nu min chu Jedidah, Bozkath khuo a Adaiah chanu ahi.

² Chun, Josia chun Lalpa mitmuh in thil diktak a hih sek a, a pu David lampi hawh chengcheng chu a hawh sek a, changlam ahim veilam ahim ah a petsan kha himhim puoi.

Dan Lehkhabu Muhdawkna

³ Chun, leng Josia vaihawm, kum sawm leh kum giet kum chun, Meshullam cha Azaliah chapa lehkhazikpa Shaphan chu Ho-In ah a sawl a:

⁴ “Thiempu lienpen Hilkiah kawmah va chieh inla, thiempu, kawtkhak ngakte’n, mite kawm apat a a na lâkkhâwm uh, dangka zah va la hen la.

⁵ Zie chu, Ho-In siempha lawiupate kawma chu va pie dingin hilh in. Amau haw chun,

⁶ thingkuong siemte, In sate, thing nawtte kawmah pieu hen la, In siemphatna a mat ding, thing leh suongte chawkna’n mang u hen.

⁷ Himahleh, nasep enkawlte chu a ginum ziekun, a khut u a dangka a piek teu chuh a endik chuom puou hi,” ti’n.

⁸ Chun, thiempu lalpen Hilkiah chun lehkhazikpa Shaphan kawmah, “Lalpa In ah Dan lehkhabu chu ka mudawk tai,” a ti a. Chun, Hilkiah chun lehkhabu chu Shaphan a pie a, amah chun a sim ta a.

⁹ Tichun, leng kawmah a chieh kit a, a va hilh ta a, “Na suokte chun, Ho-In a dangka chu a lau a, Ho-In siempha haw enkawlte khut achun a pieu ui,” a ti a.

¹⁰ Chun, lehkhazikpa Shaphan chun, “Thiempu Hilkia’n lehkhabu ei na piei,” ti’n lengpa chu a hilh a. Chun, Shaphan chun lengpa masang achun a sima.

¹¹ Chun, leng chun Dan Lehkhabu kisim a hun zak chun, hiti hi ahi a, a puonte a bawtthêk a.

¹² Zie thute hi thiempu Hilkiah te, Shaphan chapa Ahikam te; Mikaiah chapa Akbor te, lehkhazikpa Shaphan te, leng sawntawlawi Asahiah te kawm achun pie a:

¹³ “Kei leh mipite leh, Judate chengcheng hi, zie lehkhabu kimudawk sunga thu um thu a hin, Lalpa ei va dawtsak tiem u! Zie lehkhabu a kizik haw cheng hi I pileputeu in ana zawp loh ziekun I chung u ahin Lalpa lungnatna chu a hah nasat mah mah ta hi,” a ti a.

¹⁴ Khutichun, Hilkiah, Ahikam, Akbor, Shaphan leh Asai te chu thiemgau numei, Hulda kiti dawng ding chun a chieh tau a, amahnu chu Jerusalem a Misne a chêng ahi. (A pasal chu Harhas chapa, Tikvah cha Shallum ahi a, Ho-In a thiempute silhlechen enkawla pang ahi.)

¹⁵ Chun, amahnu chun a kawm u ah, Lalpa, Israel te Pathien in hiti hin a tii: “Ka kawma hun sawlpa hi hilh un,

¹⁶ Lalpa’n hiti hin a tii: Ngaitie! zie muna hin leh, a sunga chengte haw chunga hin, thil phalo tak hun tunsak ding ka hi. Juda leng in lehkhabu a thu a sim haw bang tak khan;

¹⁷ Ei hengilh u a, pathien dangte kawmah gimlim a hâl u a, a khutsuok u a ei suklungnat ziekun, zie muna hin ka lungnatna so sang ding ahi a, mit thei mai ding ahi puoi.

¹⁸ Himahlele, Lalpa dawng dinga hun sawl, Juda leng kawm achun hiti bang hin gen un: Lalpa, Israel te Pathien in, na thu zak chungchâng thu achun hiti hin a tii.

¹⁹ ‘Zie mun leh a sunga chêngte hi gawt leh, hansie dawl in hung um un au, tih thu ka gen kha na zak a, na lunggilte a nem a, Lalpa masanga na kingaihniem a, na puonte na bawhthek a, ka masanga na kah ziekin, Ken le na thu chu ka na zai,’ Lalpa’n a tii.

²⁰ Khutichun, ngaitie! na pilepute kawmah hun pui ing ka ting, thân ah lungmuong taka puih in um in na tin, zie muna thil phalo tak ka hun tunsak ding chu na mitin mu suok puo’n la, a tii, ti’n,” a ti a. Tichun, thu chu leng kawmah a va tun kit u a.