2 LENGTE 2 - PATHIEN LEKHABU THIENGTHO (BSI)

Elija Van a Lâktoha a Umna

¹ Elija chu Lalpa’n van a chinpeia a puih toh ding lai chun hiti hi ahi a. Elija leh Elisha chu Gilgal apat in a pawtdawk u a,

² Chun, lampi achun Elija chun Elisha kawmah, “Zie taka hin a na um in; Lalpa’n Bethel tienga chieh dingin ei sawl hi,” a ti a. Elisha chun, “Lalpa hinna leh na hinna sâlin ka gen hi, hun taihsan hiel puo’ng ka,” a ti a. Tichun, Bethel ah a chieh suk khawm tau a.

³ Chun, Bethel a um thiemgau pawl khatte chuh Elisha kawmah a chieh u a, a kawmah, “Tuni hin Lalpa’n na lawiupa pa hi hun lâkmang sak ding ahi tih na he?” a tiu a. Elisha chun, “Hi, ka he a puo; himahleh thip hiet hiet un,” a ti a.

⁴ Chun, Elija chun Elisha kawmah, “Taka hin a na um in, Lalpa’n Jerikoh a chieh dingin ei sawl ahi,” a ti a. Himahleh, Elisha chun, “Lalpa hinna leh nangmah hinna sâlin ka gen hi, hun taihsan hiel puo’ng ka,” a ti a. Tichun, Jerikoh khuo ah a chieh khawm tau a.

⁵ Chun, Jerikoh a um, thiemgau pawl khat chun, Elisha a va naih u a, a kawmah, “Tuni hin Lalpa’n na chunga lawiupa hi hun lâkmang sak ding ahi tih na he’m?” a tiu a. Amah chun a dâwng a, “Hi, ka he a puo! himahleh ana thip hiet hiet un,” a ti a.

⁶ Chun, Elija chun, Elisha kawmah, “Zie taka hin a na um in, Lalpa’n Jordan a chieh dingin ei sawl ahi,” a ti a. Himahleh, Elisha chun, “Lalpa hinna leh na hinna sâlin ka gen hi, hun taihsan hiel puo’ng ka,” a ti a. Tichun, a nih un a chieh khawm zel tau a.

⁷ Thiemgau chapate laka mi sawmngate chun Jordan lui tieng chun a zui u a. Elija leh Elisha chu lui pang achun a ding u a, thiemgau sawmngate chu gamla deuh ah a ding u a.

⁸ Chun, Elija chun a puon chu a laa, a tu lawm a, tui chu a vak khên a, tichun, lehlam lehlam ah a kikhen ta a, tichun, Elisha chu tawh leichak ah a chieh kai tau a.

⁹ Chun, a galkaih nung u chun hiti hi ahi a, Elija’n Elisha kawmah, “Na kawm apat lâkmang a ka um masang hin, bang ahim ka hun hihsak ding nei ngên in?” a ti a. Elisha chun, “Na thagau chan nih chang leng la!” a ti a.

¹⁰ Chun, Elija chun, “Thil haksa tak na nget ahi hi, haksa mahleh, na kawm apat lâkmang a ka um lai tak nei muh chun, chang in na tin, nei muh loh le chu vang chang puo’n la,” a ti a.

¹¹ Chun, a chieh kawm zel u a, a holim lai u chun hiti hi ahi a, ngaitie, mei kangtalai, mei sakawlte a hung kilangphut a, a kikal tak u ah a hung kie a, a kikhen sak ta a; tichun, Elija chu chinpei in, van lam ah a puito ta a.

¹² Chun, zie chu Elisha chun a mu a, “Hepa, hepa! Israel te kangtalai leh sakawl chung chuong te lawiupa!” ti’n a kiko a. Elija chu a mu kit ta puoh a. Tichun, amah a mu thei ta puoh a, chun, amah puon chu a la a, phel nih in a bawtthêk a.

¹³ Chun, Elija puon hung ketha chule a la a, a vaikit a, Jordan lui pang achun a ding ta a.

¹⁴ Chun, Elija puon hung ketha a lâk chun tui chu a vak zêp a, “Lalpa, Elija Pathien chu khawitak ah a um hi?” a ti a. Tui chu a vak zêp kit leh, tui chu aleh lam gel achun a hung kikhen ta a, Elisha chu a chieh gâlkai ta a.

¹⁵ Chun, Jerikoh khuo a thiemgau pawl khat, a gal langkhat a umte’n a vak muh u chun, “Elija thagau chu Elisha chungah a chu ngut hi,” a tiu a. Amah hopih dingin a va chieh u a, a masang achun leisi’n a chibai u a.

¹⁶ Chun, amau chun a kawmah, “Entie, zie na suokte hin, mi thahat taktak sawmnga ka umpih u a, chieh hi ting un, na pu chu va hawl hitiu. Lalpa thagau in a puito a, khawitak tâng ahim, a hihloh leh khawitak guom ahim a a khiekthak khatto hi’n a,” a tiu a. Elisha chun, “Chieh hiel kiu un,” a ti a.

¹⁷ Khutia, amah a dinga zahchâk um khawpa a nget nung u chun, “Chieh suk tau u leh,” a ti a. Khutichun, mi sawmngate chu a chieh u a, ni thum a hawl u a, himahleh a mu zo ta puou a.

¹⁸ Chun, Jerikoh khuo a amau haw ngaka a na um lai chun a kawmah a hung vaikit u a, Elisha chun a kawm u ah, “Na kawmuh akhan, ‘Chieh kiu in’ ka hun ti hilo maw?” a ti a.

Elisha Thilmak hih a Nihna

¹⁹ Chun, Jerikoh khuo a mi khenkhatte chu Elisha kawmah a chieh u a, a kawmah, “Hepu, na hetsa guolin, zie tak hi khawpi nuom tak a hi a, himahleh, a tui hi a pha puoh a, a gam hile a gahsuoh puo a, nausietna gam ahi,” a tiu a.

²⁰ Chun, amah chun, “Tui-ûm thak ah chi hun khum un la ei hun chawih sak tiem u,” a ti a. Tichun, a hun chawih sak u a.

²¹ Tichun, tuikhuk ah a va chieh a, chi chu a vak theh lut a, “Lalpa’n hiti hin a tii: ‘Zie tui hi ka hih thieng tai, tu a kipat hin, thihna leh nausietna um ta puo’n a,’ a tii” ti’n.

²² Khutichun Elisha gen bang chun, tuni tieng hin tui chu a thieng den tai.

²³ Chun, Elisha chun Jerikoh chu a pawtsan a, Bethel ah a va chieh to a; lampi a a chieh lai chun, khuo apat pasal naupangte a hung pawt u a, a kawmah, “Nang lukawlhpa, pawt dawkin, nang lukawlhpa, pawt dawkin,” a tiu a.

²⁴ Chun, Elisha chu a vak kinunghei a, amau haw chu a en a, Lalpa min in hansie a buokkhum ta a. Tichun, gammâng apat in savawmnu nih a hung pawt u a, a lak u a naupang sawmli leh nih chu a hung petlum tai.

²⁵ Chun, zie apat chu Karmel tângah a chieh a, zie apat chun Samari khuo ah a chieh kit tai.