2 LENGTE 19 - PATHIEN LEKHABU THIENGTHO (BSI)

Isai kawma Hezekia Thuvaithak

¹ Chun, leng Hezekia’n zie thu haw chu a zak phetin, lungkham in a silhlechen haw chu a bawtthêk a, kawlladip silh in Lalpa Ho-In achun a chieh ta a.

² Chun, insung lam lawiupa, Eliakim leh, lehkhazikpa Shebna leh, thiempu upate chu saidippuon kisilh in, Amoz chapa, thiemgau Isai kawm achun a sawl a.

³ Chun, amau chun a kawmah, “Hezekia’n hiti hin a tii: ‘Tuni hi thuokgimna ni a hi a, gawt in ka um tau a, muhsit in ka um tau ahi! Numei nau nei dinga kisa a, himahleh, nau hinna dinga hatna neilo tawbang ka hi tau ui!

⁴ Asuria leng in Pathien hing gensie dingin Rabshakeh a hun sawl a. Lalpa na Pathien chun zie ho sietna thu leh gensietna thu chu hun za’n, zie tawbanga gente chu gawt hen. Zieziekchun, Pathien kawmah, ka mipite hinhawih a umsunte ding chun paucham in,’ a tii,” a tiu a.

⁵ Tichun, leng Hezekia mite chu Isai kawmah a chieh u a,

⁶ Chun, Isai chun a kawm u ah, “Na puu kawmah hiti hin gen un, na thu zak, Asuria lengpa mite’n ahun gensietnau haw kha lau ki’n.

⁷ Ngaitie, a sung ah thagau um sak ing ka ting, thuthang za’n tin; amah gam ah chieh kit ina; tichun, amah gam ngêi ah chemzâm a satlup in um sak ing ka, a tii, ti’n” a ti a.

Asuria te Vau thukna

⁸ Khutichun, Rabshakeh chu a vaikit a, Asuria leng chun Libnah khuo a buluh lai chu a va mu a; Lakish khuo apat a pawt tai tih a hetsau ahi.

⁹ Ethiopia leng, Tirhakah makaihna nuoi ah, Aigupta sepaihte chu amau haw do dingin a kipan ui tih thu, Asuria te kawm chu a hung tung ta a. Asuria leng in zie chu a het phetin, Hezekia kawmah lehkha a thâk a,

¹⁰ hiti hin: “Pathien, na kimuonpih pên chun, ka khuta puk lo dingin a hun hilh a, himahleh, zie chun hun thêm zo kihen!

¹¹ Ngaitie, Asuria lengte’n gam a suksiet guot sekteu chunga a thilhih danteu kha na he a; suokcha thei dingin na kingaihtuoh em?

¹² Nam pathiente chun ka pileputeu in Gozan khawpi te, Haran te, Rezeph te a hihsiet u a, Telassar a um Eden chate cheng a that u a, a pathienteu in khat chale a hukdawk thei puou ui.

¹³ Hamath lengte, Arpad leng te, Sepharvaim khawpi lengte, Hena lengte, Ivah lengte kha khawitak ah a um tau hi?” ti’n a ti a.

¹⁴ Leng Hezekia chun a mi sawlte khut apat chun lehkha chu a la a, a vak sim a, Tichun, Lalpa In a chun a va lut a, Lalpa umna chun a zak palh a,

¹⁵ Chun, Hezekia chu Lalpa ma ah a paucham a, “Aw Lalpa, cherub te kikala chu, Israel Pathien, Nangmah chauh hi, gam cheng chunga vaihawm na hi a, Lei leh van hi nangmah siem ahi.

¹⁶ Tuhin, Aw Lalpa, kei lam ahin na nakhang hun dawh in la, ei ngaihthak sak in! Sennacherib in, Nang Pathien hing a hun gensietna thu hi ngaitha tie!

¹⁷ Lalpa, Asuria leng in nam tampi a suksiet leh, a gamteu susie sek ngut u a,

¹⁸ A pathienteu chu mei ale a paih sek u a, ziehaw chu pathien tak ahi puoh him u a, mihing khut a siem, thing leh suong ahi zawu a; zieziekchun, a sukmangthai uh ahi.

¹⁹ Tuhin, Lalpa ka Pathien uh, Asuria te apat hin ei hukdawk tei in, ti a chu, khawvel a namtin in, Nang chauh hi Lalpa Pathien na hi tih a hun het theihna dingun,” a ti a.

Leng kawma Isai Thugen

²⁰ Zielai chun Amoz chapa Isai chun Hezekia kawmah, “Lalpa Israel Pathien chun hiti hin a tii: ‘Asuria leng, Sennacherib zieka ka kawma na pauchamna kha ka na zai,’ ti’n.”

²¹ Ziehi a chungchâng thu Lalpa’n a gen chu a hi: “Jerusalem khawpi chun a hun musita, ahun nuihsan a, nungak thiengtho Zion chanu chun a lu ahun thin khum hi.

²² Kuo a na na sukminsiet a, na gensiet? Kuo chungah ahi na aw na suksân a, na mit na hahsân Israel Mi Thiengtho chungah a puo!

²³ Na mi sawlte chu, na kangtalaite tawh, Lebanon tâng sangpente zawhna ti’n, ka masangah chapo takin na hun sawl a. Zie tak achun, thing sangpente, theipi kung phapente ka phuk in, gammâng gil tak achun ka lut tai, ti’n na chapo ta a.

²⁴ Gam dangah tui ka laidawk a, ka dâwn seka, ka sepaihte keng chun Nile luipi tui chu a tawh kang hiel hi, ti’n na chapo a.

²⁵ “Ziehaw chengcheng chu, malai pek a ka phuh ei tai tih, helo na him? Tuhin, ka kiko dawk ta ahi! Khawpi kulh neite chu, suongchang kisiekhawm bang hiela susie thei dingin thilhih theihna ka hun pie a.

²⁶ Zieziekchun, a sunga mipite chu, thilhih theihna bei ahiu a, a lau u a, a kitimchak tau ahi. Pawn lak hampa bang leh hamhing bang leh, In chunga hampa tawbang leh buh a let ma a haih vuoi tawbang ahiu hi.

²⁷ “Ken chu na chut leh na lut leh na pawt haw, ka chunga na lungnat haw hi ka he a puo!

²⁸ Himahleh, na chanchin ka he vek a, na thilhih leh, na chiehna te le. Nei cho dante le ka he vek hi! Nei cho dante a gen u chu ka mu vek a, na chapo dante le, zieziekchun tuhin, na nak achun ngakuoi vawh ing ka ting, na kam achun sakawl thikpeh vawh ing ka ting, na hungna lampi mah achun hun kai kit ding ka hi,” ti’n.

²⁹ Chun, Isai chun Hezekia kawmah, “Ziehi thil hungtung ding melchikna hi’n a, tu kum in, buhsang sen un na tin uh, kum kit lele a sang mah: chun, a kum thumna achun, buhte tuh thei ta’n na tin uh, ât un na tin uh, grep huonte bawl in a gahte le ne ta’n lau.

³⁰ Tichun, Juda inkawte laka a na suokcha te chun a suklam in zungthau intin, a to lam in gah suoh un au.

³¹ Jerusalem apat leh, Zion tâng apat in, a na thi mâwk um ngêi ding ahiu ui. Lalpa’n zie chu um ngêi dinga a na gensa ahi tai.

³² “Ziehi ahi, Lalpa’n Asuria leng chungchâng a na gen chuh: ‘Amah chu, zie khawpi hi hungtung puo’n tin, zie taka hin thalchang khatchale kap dawk diek puo’n a. Sepaihte chu phaw te tawh a khawpi kieng ah hung diek puo’n au, a khuo kimvel ahin panmun le sep diek puo’n au.

³³ Khawpi a lut lo in, a hungna lampi mah ah vaikit ina, Kei, Lalpa hin ka gen hi.

³⁴ Keimah ziekin leh, ka suok David ziekin, zie khawpi hi humbit dingin, veng ding ka hi,’ Lalpa’n a tii,” ti’n, mi a sawl a.

³⁵ Tichun, zie zan chun, Lalpa vânsâwlchâk chu Asuria te giehmun achun a va chieh a, sepaih nuoi khat leh singgiet leh sangnga a that a. A zing, zingkal mataka a va thawh u chun, ngaitie, mi thi luong ngen cha ahi mai ta a!

³⁶ Khutichun, Asuria leng, Sennacherib chu a kinungzuk a, a kilehhei a, a chieh zela, Ninevi khuo achun a chieh ta a.

³⁷ Chun, a pathien Nisrok In a amah a ho lai chun, a chapate nih, Adrammelek leh Sharezer te chun a chemzâm un a that u a: tichun, Armanea gam achun a tai lut tau a. Chun, a chapa Esarhaddon chun a thasang in vai a hawm tai.