2 LENGTE 18 - PATHIEN LEKHABU THIENGTHO (BSI)

Juda leng Hezekia

¹ Chun, Israel leng, Elah chapa Hosea’n kum thum vai a hawm kum chun, Juda leng, Ahaz chapa Hezekia chun vai a hawm pan a.

² A vaihawm pat lai chun, kum sawmnih leh kum nga a hi a, Jerusalem ah kum sawmnih leh kum kuo vai a hawm a, a nu min chu Abijah, Zekaria chanu ahi.

³ Chun a pu David thilhih taphawtte chu hihin, Lalpa mitmuh in thil phatakte chu a hih sek a.

⁴ Milim pathien hona munte chu a hihsie a, suongphuh te a hihchim a, Asher pathiente a phuk a, Mosi sumeng gûl siem, Nehushtan kiti chu a sugawp suok a. Zielai hun tieng chun Israel chate’n a limbawlna dingin, gimlimte a na hâl sek nalai uh ahi.

⁵ Amah chun Lalpa Israel Pathien chuh a muong a; khutichun, a nunga Juda lengte chengcheng lak ah amah tawbang kuomah a um puou a; a masang inle a um diek puou hi.

⁶ Lalpa chu a tuchak kêi a, a thupiekte a bawhsie kha puoh a, Lalpa’n Mosi kawma thu a piekte chu pilvang takin a vawp zing sek hi.

⁷ Tichun, Lalpa chu a kawmah a um a, a thilhih taphawt ah a lamzang zel a, Asuria leng chungah a kiphin a, a kawma kipiek ding chu a ut lo ahi.

⁸ Philistia te haw chu zo in, Gaza khuo tiengin, khuo neu leh, a khawpi teu cheng chu a zo vek a.

⁹ Khutichun, leng Hezekia chun kum li vai a hawm kum tak, Israel leng, Elah chapa Hosea’n kum sagih vai a hawm kum chun, Asuria gam apat in, Shalmaneser chun Samari khuo a vak do a, a huol ta a.

¹⁰ Chun, kum thum a dona kum chun Samari chu a la ta a, zie chu, Hezekia vaihawm kum gup kum, Israel leng Hosea vaihawm kum kuo kum tak ahi.

¹¹ Khutichun, Asuria leng chun Israel chate chu Asuria gam lam achun salin a pui a, khenkhatte chu Hallah khawpi ah a um u a, khenkhatte chu Gozan gamsung a Habor lui pang achun a um u a, khenkhatte chu Media khawpi a chun a um tau a.

¹² Chun, amau chun Lalpa a Pathien uh thu chuh zawp lo a, amau haw tawh a thugawlh chuh a bawhsieu a, a suok Mosi manga Lalpa’n dân a piek a zawp loh ziek un Samari khuo chu a puk ta a.

Asuria te’n Jerusalem a Vaunau

¹³ Chun, leng Hezekia’n kum sawm leh kum li vai a hawm kum in. Asuria gam leng, Sennacherib chun, Juda gama khuo kulh nei chengcheng chu a do a, a la ta a.

¹⁴ Chun, Juda leng Hezekia chun Lakish khuo a leng kawma chun, “Thil ka na hihkhiel tai, nei do hi hai inla, nei ngek taphawt chu hun pie zel ing ka” ti’n thu a thâk a. Suria leng chun Juda leng Hezekia chu dangka talent zathum leh sana talent sawmthum a ngên a.

¹⁵ Tichun, Hezekia chun, Ho-In a dangka um chengcheng leh, leng in a go kawih khawmna a cheng chu a pie ta a.

¹⁶ Zie hun mah chun Hezekia chun Ho-In kawtkhaka dangkaguo leh, amah ngêi in, khuom sana a luonkhumte chule a la vek a, Sennacherib chu a thâk ta a.

¹⁷ Chun, Asuria leng chun sepaih lawiupa Tartan te, Rabsaris te leh, Rabshakeh te chu sepaih tamtak tawh Lakish khuo apat in, Jerusalem khuo leng Hezekia kawm achun a sawl a. Tichun, Jerusalem khuo chu a va tung u a. A va tun u chun, puon siemte nasepna lampi a dîl chungnung zaw tui lâkna kieng achun a um u a.

¹⁸ Chun, lengpa chu a vak sam u a, tichun, a miliente, Hilkiah chapa Eliakim te, lehkhazikpa Shebna te, chanchin zikpa Asaph chapa Joah te chu a kawm u ah a va chieh u a.

¹⁹ Chun, Rabshakeh chun a kawm u ah, “Hezekia kawmah vak gen tiem u, Leng lopitak, Asuria leng chun hiti hin a tii, na ginna na kimuonpih hi bang ahi?

²⁰ Kidonaa ding chun lemguotthiemna leh hatna ka nei ui na ti a; himahlele, zie chu paukam mai ahi. Kuo na gingcha a ka chunga kiphin na hi?

²¹ Ngaitie, zie luong mawlh gawp tawbang Aigupta te hi hun panpih dinga kinem hi ding na hi a, zie chu Aigupta leng in, mi a chunga kinemte a bawl dân chu a hi him hi.”

²² “Ahihloh leh, Lalpa ka Pathien chunga kinga ka hi, na tih uh ahim? Zie chu, Lalpa umna leh maichâm, Hezekia’n, Jerusalem maichâm chauha Pathien na ho dinguh ahi ti a, a suksiet sak kha ahi.

²³ Khutichun, ka pu, Asuria leng hi tawh thu tiem un, tichun, sakawl sangnih hun pie’ng ka, a chunga chu ding na muh theih ding phawt chun.

²⁴ Bangti’n a kangtalaite leh sakawl chung chuong mite thu ah Aigupta chunga kimuonpihna nei in, ka pu mite laka neupen lawiupa khat hile na nan zawh mai zên ding?

²⁵ Chun, Lalpa thu lo a, na gam hi hun do a, hihsie ding hin nei ngaihtuoh ahim? Lalpa ngêi chun, do ding leh hihsie dingin ei hilh ahi,” a ti a.

²⁶ Ziephet chun, Hilkiah chapa Eliakim leh Shebnah leh Joah chun miliente kawm achun, “Hepu, Aramaic pau in gen in, ka he thei ngâl u a. Hebrai pau in gen ki’n, kulh bâng chunga mipite hin a ngaithau ahi,” a tiu a.

²⁷ Himahlele, Rabshakeh chun a kawm u ah, “Ka puu chun, na puu kawma leh nanguh kawm mah ah zie thu gen ding hin ei sawl a ahim? Kulh chunga umte, nang haw leh, amau haw êk kinek dingte leh, amah zun hun kidawn dingte kawma hin le ei sawl hilo ahim?” a ti a.

²⁸ Chun, Rabshakeh chu a ding a, Hebrai pau in aw ngeih tak in a kiko a, “Leng lopi tak, Asuria leng thu hi ngaithau in!

²⁹ Leng chun hiti hin a tii, Hezekia thepthak in um kiu; amah chun a khut apat in hun hukdawk thei lo ding ahi ngâl a.

³⁰ Hezekia chun, Lalpa’n ei humbit tei in tin; chun zie khawpi hi Asuria lengpa khuta piek hi puo’n a,” ti’n Lalpa chu hun kimuonpih sak kihen.

³¹ “Hezekia thugen hi ngaitha kiu inla, Asuria leng chun hiti hin a tii: Ei kichampih un la, ka kawma hin hung suk un; tichun, nangmau grep gui apat in neu un na tin, mitin in amah theipi gah kinek intin, mitin in amah tuibel apat in tui dâwn ina.

³² Ka hunga nanguh gam tawbang, buh leh uain tamna gam, chângthâk leh grep huonte, khuoizu leh olive tamna gama, thihna gam hilo, damna gama ka hun puihlut masang sieh chu, Hezekia’n, Lalpa’n ei hukdawk ina, ti a a hun thep un le zawp kiu in.

³³ Namte pathien kiti himhim in, a gam u chu Asuria leng khut apat in a hukdawk kha ngei um?

³⁴ Hamath leh Arpad pathiente kha khawi ah a um u? Sepharvaim te, Hena te, Ivah te pathiente kha khawi ah a um tau hi? Samari khuo kha ka khut apat in a hukdawk um?

³⁵ Gam tin pathien chengcheng laka khan, kuo a, a gam uh ka khut apat a hukdawk kha? Lalpa chun Jerusalem a hukdawk thei hi tih hi, bangin a hun ngaihtuoh sak ahim?” ti’n a ti a.

³⁶ Amau haw chu vang a thip kêi u a, kam khatcha’n le a dâwng puou ui: leng thupiek dân chun, “Amah chu dawng kiu in,” tih a hih ziekin.

³⁷ Khutichun, Hilkiah chapa Eliakim te, lehkhazikpa Shebna te, chanchin zikpa Asaph chapa Joah te chun a silhlechenteu chu a bawtthêk u a, a chieh u a, Rabshakeh thugen chu leng kawmah a va hilh tau hi.