2 LENGTE 17 - PATHIEN LEKHABU THIENGTHO (BSI)

Israel Leng Hosea

¹ Juda leng, Ahaz in kum sawm leh kum nih vai a hawm kum chun, Elah chapa Hosea chun Israel te chungah, Samari khuo ah vai a hawm pan a, kum kuo vai a hawm a.

² Chun, Lalpa mitmuh in thil phalo tak a hih sek a, himahleh, a masanga Israel te leng haw bang hielin vang a hih puoi.

³ Asuria leng Shalmaneser in a vak do a, tichun, Hosea chu a kipie lut ta a, leiman te le kum chengin a pie sek a.

⁴ Chun, Asuria lengpa chun Hosea’n a phielguk thu ana hedawk ta a; Aigupta lengpa So kawmah mi a sawl a, kum chenga a piek sek bang khan Asuria lengpa chu sieh la a pie ta puoh ngâla. Zieziekchun, Suria lengpa chun kânsa’n suongkul ah a khum ta a.

Samari Khawpi Pukna

⁵ Tichun, Asuria lengpa chun gam chengcheng chu a pal suok veka, Samari khuo ah ava chieh to a; kum thum hiel a ûmkimvel ta a.

⁶ Chun, Hosea’n kum kuo vai a hawm kum, Asuria leng in a do, kum thumna achun Samari khuo chu a la ta a, Israel te haw chu Asuria gam ah salin a pui a, khenkhatte chu Halah khawpi ah, Gozan gambung khen sunga Habor lui pang ah a um u a, khenkhat chu Media te khawpi ah a umsak ta a.

⁷ Samari khuo hung sietna ziek chu, Israel chate chun Aigupta leng Pharaoh khut apat, Aigupta gam apat a puidawkpa, Lalpa a Pathien uh chung ah thil a hihkhiel u a, pathien dangte a ho ziekuh ahi.

⁸ Lalpa’n, a mipite masanga pata a na nawhdawk tâk namte thilhih dân leh, Israel lengte dân le muolte a na zuih tâk ziek un ahi.

⁹ Chun, Israel chate chun, Lalpa a Pathien uh phasak lohte chu a gûkin a hih sek u a, a khawpiu lienpen apat in, a neupen tiengin, milim pathien hona In te a sau a.

¹⁰ Tang sang tin cheng leh, thing hing tin nuoi ah suongphuh te phut in, Asher pathiente a bawl u a;

¹¹ Zie munsang haw achun, Lalpa’n a masang u a a nawhdawk sa namte hihdan bang chun, gimlimte a hâl sek u a. Lalpa lungnatna chawktho dingin, thil kihdak-umte hih in.

¹² Lalpa’n a kawm u a, “Zie bang hin bawl kiu in,” a tih milim pathiente na le a sem sek u a.

¹³ Lalpa chun, “Dan zuih ding, na pileputeu ka piek leh, ka suok thiemgaute manga ka hun hetsak bang zel chun, na umdan uh gilo hi haihsan un la, ka thupiekte leh, ka thuguot te chu pawm un,” ti’n Israel te leh Judate chu, thiemgaute leh a thu puote mang in a hetsak sek a.

¹⁴ Khutisa chun le a zawp nuom puou a, a pileputeu, Lalpa a Pathien uh gingcha lo a, genhakte bangin a genhak u a.

¹⁵ Chun, a thuguot te, a pileputeu kawma a thugawlhte, a kawm u a a thu hetsakteu chuh a khawksa nuom puou a; thil manloh maimai a pawm u a, bangmahlo mai a hung hi tau a; a chungchâng thuu a Lalpa’n, “Na kimvel u a namte hih bang chun hih kiu in,” a na tihsa, namte hih dân chu a zui u a.

¹⁶ Chun, Lalpa a Pathien uh thupiek chengcheng chu a lehngatsan u a, bâwngno lim kisung nih a siem u a, Asher pathien lim a kisiem u a, van a aksite khu a ho u a, Baal pathien na a sem sek tau a.

¹⁷ Chun, a chanuteu leh a chapateu chu, milim pathien kawma hâlmanga kithawihna dingin a pieu a, aisânthiemte leh vang ente a dawng u a; Lalpa mitmuh a thil gilo hihin a kimangzo tau a, tichun, a lungnatna chu a chawktho tau hi.

¹⁸ Zieziekchun, Lalpa chuh Israel te chungah a lungna ta mah mah a, a mitmuh apat in a chawn mang kêi ta a, Juda lenggam chauh chu a hâwi ta a.

¹⁹ Judate chun le, Lalpa a Pathien uh thupiek chu a zui diek puou a, Israel chate thil chîn sekte chu a zui zawu a.

²⁰ Chun, Lalpa’n Israel chate cheng chu deih lo in, a gawt ta a, a mitmuh apat a a delh mang macheng chun, melma gilo takte khut ah a pie ta a.

²¹ Lalpa’n Israel te chu Juda nam apat a a khenchuom nung chun, Israel te chun, Nebat chapa Jeroboam chu a leng dingun a kisiem u a. Jeroboam chun Lalpa kinungheisan in, gitlohna huoisie tak ah a puilut ta a.

²² Chun, Israel chate chun Jeroboam chu a zui u a, a thilhih gitloh chengcheng chu a hih zing u a, Lalpa’n a thiemgaute manga a na gen banga, a mitmuh phâk loh a a chawn mang macheng chun, a haihsan puou hi.

²³ Khutichun, a suok thiemgaute manga ana gen tâksa guolin, Israel chate chu a mitmuh a Lalpa’n a bawhdawk masang sieh chu zie tak achun a um den tau hi.

Israel Gama Asuria te Umna

²⁴ Chun, Asuria leng in, Babulon khuo a mite, Kuthah mite, Ava mite, Hamath mite, Sepharvaim mite a puidawk a, Samari gam khuo haw a, Israel chate umna mun haw chu a luoh sak a, tichun, Samari gam chu a luoh u a, a khuo haw achun a um tau a.

²⁵ Khutia, zie tak a a va um tûng u chun, Lalpa a ho nuom puou a, tichun, Lalpa’n a laku ah sakeibakneite a sawl a, zie chun mi khenkhat chu a pêt ta a.

²⁶ Khutichun, Asuria leng kawmah, “Na suon haw namte, Samari gam khuo haw a na lut sakte hin, a gam pathien ho dân chu a he puou a, zieziekchun, a laku ah sakeibaknei a sawl a, zie gama Pathien ho dân a het loh ziek u chun a peh sak hi,” ti’n a hilh u a.

²⁷ Ziephet chun, Asuria leng chun, “Zie, sala I puihteu laka thiempu khat hi pui un la, hung um hen la, zie gam Pathien ho dân chu sinsak hen” ti’n thu a pie a.

²⁸ Khutichun, Samari gam apat a a puihteu laka Israel te thiempu khat, Bethel khuo ah a va um a, Lalpa a ho dân dinguh a sinsak ta a.

²⁹ Himahlele, Samari khuo a mipi umte chun, amau pathien ding a kisiem chiet u a, Israel chate’n munsang a na siemnau mun haw a chun a kawih u a. Pawl tin chun, amau umna khawpi chietah milim a kisiem u a.

³⁰ Babulon mite chun Sukkoth-benoth milim pathien a siem u a, Kuth te chun Nergal a siem u a, Hamath te chun Ashima a siem u a,

³¹ Ava te chun Nibhaz leh Tartak a siem uh a, Sepharvaim te chun Sepharvaim te pathien, Adrammelek leh Anammelek min in a chateu chu a hâl sek ui.

³² Khutichun, Lalpa chu a lau u a, tichun, a lak uh a nam niem pente chu thiempu dingin a siem u a, munsang Inhaw achun a kithawihna a siem sek u a.

³³ Khutichun, Lalpa a ho u a, himahleh, a hung kipatnau gama a hihdan guol un, amau milim pathien chiet le a ho kit uh a.

³⁴ Tuma lama a hihdan bangun tuni tieng hin a hih zing nalai u a. Lalpa chu a ho nuom puou a, Lalpa’n Jakob suon, Israel ti a a vawhte kawma a piek leh thupiek bangin le a hih diek puou hi.

³⁵ Lalpa’n, amau haw chu tawh thugawlh a siem a, thu a pie a: “Pathien dang ho kiu inla, a masang uh a le khupbawk kiu inla, a nau le sem kiu inla; a kawmuh a le kithawihna lân kiu in.

³⁶ Lalpa thilhih theihna nasatak leh hât taka, Aigupta gam apat a hun puidawkpa hi nei kihchak zawk dinguh ahi a, chibai nei bûk dinguh ahi a, ka kawma na kithawih dinguh ahi.

³⁷ Tichun, dante, thupiekte, ka hun na zik sak tak haw kha kumlekhuo a na zawp dinguh ahi, pathien dangte chu na ho loh dinguh a hi a,

³⁸ chuleh, na kawm u a thu ka gawlh hi na hetngilh loh hiel dinguh ahi a, pathien dangte le na kihchak dinguh ahi puoi.

³⁹ Kei, Lalpa na Pathien uh thu hi na zawp dinguh ahi a; tichun, na melmateu chengcheng khut apat in hun hukdawk ding ka hi,” ti’n.

⁴⁰ Himahlele, zie mite chun a ngaitha diek puou a, a thil hihdan luiteu chu a sunzawm zing u a.

⁴¹ Khutichun, zie mite chun Lalpa a ho u a, amau haw milim pathiente le a ho kawp zing u a, tuni chan gei hin, a suonteu chun, zie guol chun a hih zing tau hi.