2 LENGTE 14 - PATHIEN LEKHABU THIENGTHO (BSI)

Juda Leng Amaziah

¹ Israel leng, Jehoahaz chapa Jehoash in kum nih vai a hawm kum chun, Juda leng Joash chapa Amaziah chun vai a hawm pan a.

² A vaihawm pat lai chun kum sawmnih leh kum nga ahi. Jerusalem ah kum sawmnih leh kum kuo vai a hawm a, a nu chu Jerusalem a um, Jehoaddin ahi.

³ Chun, amah chun Lalpa mitmuh in thil kitûp takin a hih sek a, a pu David vang chuh a pha puoi; a pa Joash thilhih tawbang a hih sek ziekin.

⁴ Himahleh, milim hona munte chu a hihsie diek puoh a, mipite chun kithawihna a lân u a, gimlimte a hâl zawm zing uh ahi.

⁵ Chun, Amaziah chun thuneihna a hun lâk tak tak phet chun, a milien haw, lenga a na pang, a pa a na thatte cheng chuh a that vek a.

⁶ Himahleh, a chateu vang chuh a that puoi. Mosi dân lehkhabu a Lalpa thupiek: “Chate thil sukkhelh zieka nu leh pate chu thah ding ahi puoh a, chate chu, nu leh pate thil sukkhelh ziekin thah ding ahi diek puoi; mitin, amau thil sukkhelh zieka thi ding ahiu ui,” tih chu a zawp ziekin.

⁷ Edom te chu Chi guom ah singkhat a that a, Selah khuo a do a, a la a, a min dingin Joktheel a vawh a, tuni tieng hin ahi den ta ahi.

⁸ Tichun, Amaziah chun Israel leng Jehoash kawmah, “Hung inla, kimaichangtuoh in kiho hiti,” ti’n mi a sawl a.

⁹ Chun, Israel leng Jehoash chun Juda leng Amaziah kawm achun, “Khat vei chu, Lebanon tânga ling in, Sidar thing kawmah, ‘Na chanu kha, ka chapa zi dingin neih sak tie,’ ti’n a thuthak a; chun, gamsa a hung a, lingbuk chu a hun chilgawp vek ta a.

¹⁰ Tuhin, nang Amaziah, Edom te chu na zo a, na hung chapo ahi hi. Na minthanna achun lungkim takin um hiet hiet inla, In ah um hiet hiet in. Bang zieka, na mipite chung leh, nangmah ngêi chunga buoina chawktho zel na him?” a ti a.

¹¹ Himahleh, Amaziah chun a ngaihsak nuom puoh a. Khutichun, Israel leng, Jehoash chuh a mite tawh a va chieh u a, Juda gam, Beth-shemesh khuo ah kimaichangtuoh in a kido tau a.

¹² Tichun, Amaziah sepaihte chu zawhin a um u a, a sepaih chengcheng chu a In lam hawu ah a taisie tau a.

¹³ Chun, Israel leng Jehoash chun Juda leng, Ahaziah chapa Amaziah chu Beth-shemesh achun a man a, Jerusalem khuo ah a chieh a, Jerusalem kulh chu Ephraim kulh kawtkhak apat a kulh ning kawtkhak tiengin tawng zali zet chu a hihchim ta a.

¹⁴ Chun, Ho-In leh leng In a go kawih khawmna sana leh dangka leh, ûmlebel cheng cheng, a muh takphawt a laa, galhing matte tawh, Samari khuo lam achun a chieh kit ta a.

¹⁵ Tichun, Jehoash thilhih chanchin dangte, a hansan ziete, Juda leng Amaziah a do dante chu, Israel lengte vaihawm lai thu zikna bu ah a chuong hilo ahim?

¹⁶ Chun, Jehoash chu a pilepute kawmah a ipmu a, Samari khuo a Israel lengte thân ah a vui u a, a chapa, Jeroboam nihna chun a thasang in vai a hawm ta a.

Juda Leng Amaziah Thihna

¹⁷ Chun, Juda leng Joash chapa Amaziah chuh, Israel te leng Jehoahaz chapa Jehoash thih nung chun kum sawm leh kum nga a dam a.

¹⁸ Tichun, Amaziah chanchin dangte chuh Juda lengte vaihawm lai thu zikna bu ah a chuong hilo ahim?

¹⁹ Chun, Jerusalem khuo ah Amaziah thahna dinga phielgukna a um a, tichun, Lakish khuo ah a tai a; himahlele, a melmate chun a delh zui u a, zie tak achun a va that tau a.

²⁰ Chun, a luong chu sakawl in a puou a, a pilepute thân, David khawpi, Jerusalem achun a vui tau a.

²¹ Chun, khutichun, Juda mi chengcheng te chun a chapa, kum gup mi, Uzziah chu a pa Amaziah thasang chun, leng in a siem tau a.

²² Chun, amah chun Elath khuo chu a siempha kita, Juda gam ah a telsak kita; zie nung chun Amaziah chu a pilepute kawmah a ipmu ta a.

Jeroboam Nihna Vaihawmna

²³ Juda leng, Joash chapa Amaziah chun, kum sawm leh kum nga vai a hawm kum chun, Israel leng Jehoash chapa Jeroboam in Samari khuo ah vai a hawm pan a, kum sawmli leh kum khat vai a hawm a.

²⁴ Chun, amah chun Lalpa mitmuh in thil phalo tak a hih sek a; Israel te thil gilo hih dinga pui sek pa, Nebat chapa Jeroboam gitlohna chengcheng kha haihsan himhim a nei puoi.

²⁵ Israel gam chengcheng, mâllam panga Hamath lutna apat a, simlam pang, Tuipi Thi tiengin a la kit vek a. Zie chu Lalpa, Israel Pathien in, a suokpa, Amittai chapa thiemgau Jona, Gath-hepher mi manga a thutiem kha ahi.

²⁶ Lalpa’n, Israel te gimtheih huoisiet dân chu a mu a; suok hileh, suok lo hileh, Israel te panpih dingin kuomah a um diek puoh ngâla.

²⁷ Lalpa’n, Israel te min hi, van nuoi apat thaimang kêi ina tih a gen puoh him a, tichun, Joash chapa, Jeroboam nihna mang chun a hukdawk ta a.

²⁸ Tichun, Jeroboam nihna chanchin dangte, a hansan dante, a thilhih theih zie te, a galdo thute, tuma lama Juda gam hi sek Damaska leh Hamath khuo, Israel te dinga a na lâksak kit dân thu te chu, Israel lengte vaihawm lai thu zikna bu ah a kizik vek a.

²⁹ Tichun, Jeroboam chu a pilepute kawm achun a ipmu a, chun, a chapa, Zekaria chun a thasang in vai a hawm ta a.