2 LENGTE 12 - PATHIEN LEKHABU THIENGTHO (BSI)

Juda Leng Joash Vaihawmna

¹ Jehu’n kum sagih vai a hawm kum chun, Joash chun Judate chungah vai a hawm pan a; Jerusalem khuo ah kum sawmli vai a hawm a. A nu min chu Zibiah, Beer-sheba khuo a mi ahi.

² Chun, thiempu Jehoiada’n Joash chu a sinsak ziekin, a damsung cheng chun Lalpa mit muhin thilpha a hih sek a.

³ Himahleh, milim hona munte chu suksiet zawh vek ahi diek puoh a, mipite chun kithawihna leh thil gimlim hâl chu a sunzawm zing u a.

⁴ Chun, Joash chun thiempute chu a sama, “Ho-In a thil thiengtho, kithawihna dinga lak lutte tatna sum chengcheng te, dân ngeina guola kithawihna chunga te leh mah nawpthua kipiete chu kawihpha dingin thu a pie a.

⁵ Thiempu cheng chu, amau kawma hung kithawite thilpiek hun chawih chunga mawhpuo hiu in tin, ziehaw chu a pawimawh dung zuia Ho-In siemphatna dinga mat hi’n a,” ti’n.

⁶ Himahlele, Leng Joash chun kum sawmnih leh kum thum vai a hawm nung in le, thiempute chun Ho-In chu a siempha diek puou a.

⁷ Ziephet chun, leng Joash chun thiempu Jehoiada leh thiempu dangte chuh a sama, a kawm u ah, “Bangati a, Ho-In sietna haw chuh siempha lo na hiu hi? Tu a pat hin na dangka muh teu kha kawihheh ta kiu inla, Ho-In siemphatna dingin pie dawk zaw tau in,” a ti a.

⁸ Chun, thiempute chun, mite kawm apat dangka lak takloh ding leh, In siempha a pan loh chu pha a sau a.

⁹ Tichun, thiempu Jehoiada chun thingkuong a siem a, a sin chu a gei vang a, Ho-In lutna changlam pang, maichâm kawm achun a kawih a. Zie a chun, Ho-In a Pathien ho dinga hungte paisa hun piekte chu, thiempute chun a na kawih zel u a.

¹⁰ Khutichun, thingkuong a dangka chu a tam deuh tak leh, leng lehkhazikpa leh, thiempu lienpen chu a va chieh u a, a sim u a, a chûn tup u a.

¹¹ Chun, dangka a sim zah u chuh a tiemteh zawh phat u leh In sate chunga lawiupate a pieu a, amau chun Ho-In sate, thing nawtte leh In sate lawh leh suong sêkte leh suong laidawkte lawh dingin leh,

¹² Ho-In sietna lai haw siemphatna dingin leh, suong sêkte leh In bawlnaa mamawhna phawt ah a mang sek u a.

¹³ Himahlele, Ho-In sunga a dangka hun chawihteu chu, Ho-In a dinga dangkaguo khawnte, thaumei phita chehna te, kuongte, pengkunte, sana umlebelte, dangkaguo umlebelte siemna dingin vang a mang puou hi.

¹⁴ Nasemte piek ding leh, Ho-In siemphatna dinga matchâk pawimawhte chawkna dingin a mang zaw sek ui.

¹⁵ Chun, nasem enkawlte chun ginum taka a etkawl ziekun, tuoklawmte chu etdik ngai se lo in a enkawl sek uh ahi.

¹⁶ Bawhsiet kithawihna thillat te leh, gitloh thawihna dangkate chu thingkuong achun a kawih puou ui, thiempute chanvo a hih ziekin.

¹⁷ Zielai chun, Suria leng Hazael chun Gath-khuo a do a, a zo ta a; tichun, Jerusalem do zawm zel a guo ta a.

¹⁸ Chun, Juda leng Jehoash chun, a masanga leng, Jehoshaphat te, Jehoram te, Ahaziah te a na latsa, thil thiengtho cheng leh, amah thillat te leh, Ho-In leh leng In a go kawih khawmna a sana um chengcheng te chu a lakhawm a, Suria leng Hazael chu a thâk ta a; tichun, Jerusalem apat chun a sepaihte chu a zûk kit ta a.

¹⁹ Tichun, Joash chanchin dangte leh, a thilhih cheng chengte chu, Juda lengte vaihawm lai chanchin zikna bu ah a chuong hilo ahim?

²⁰ Chun, Leng Joash chu a miliente’n a phielguu a, a lak uh a mi nih, Shimia chapa Jozakar leh Shomer chapa, Jehozabad chun, Jerusalem suohlam panga Silla zawt sukna lampi a Beth Millo In achun a that tau a.

²¹ Tichun, Joash chu a pute thân ah, David khawpi achun a vui u a, tichun, a chapa, Amazia chu a thasang in a lal ta a.