2 LENGTE 10 - PATHIEN LEKHABU THIENGTHO (BSI)

Ahab Suonte Thah a a Umnau

¹ Chun, Ahab in Samari khawpi achun chapa sawmsagih a nei a. Jehu chun lehkha a zik a, zie chu khawpi a vaihawm lawiupa miliente leh, Ahab suon enkawlte kawm achun a thâk a, a lehkha zik achun:

² “Nang haw chu leng suonte chunga mawhpuote na hiu a, kangtalaite, sakawlte leh gâlvan haw chu na nawp nawp u a mang thei na hiu ui. Zieziekchun, zie lehkhathâk hi na muh muh u leh,

³ leng suonte laka a phapen na tih u chu teldawk unla, leng in siem un la, amah venna dingin do un,” tih a zik a.

⁴ Himahlele, Samari khuo vaihawmte chu a lau mah mah tau a, “Bangti’n ziehaw hi I nang thei ding um? Leng Joram leh leng Ahazia’n le a zawh loh uh ahi a,” a tiu a.

⁵ Tichun, leng insung lawiupa pente, khawpi vaihawmte, upate haw leh, leng suonte a na enkawlte chu tawh Jehu kawmah, “Na suokte ka hiu hi, hih dinga nei hilh takphawt chu hih zel ung kau, kuomah leng in siem puo’ng kau; nangin pha na sak bang bangin hihin,” ti’n mi a sawl u a.

⁶ Chun, Jehu chun, “Kei lama pang na hih u a, ka thu na zawp ding u chun, leng Ahab chapate lu hun lau un la, zing, tuphat vel hin Jezreel khuo ah kei kawmah hung un,” ti’n lehkha a thâk kit a. Leng chapate chu sawmsagih ahiu a, khawpi miliente, amau haw enkawlte kawma chu um a hiu hi.

⁷ Chun, Jehu lehkha chuh a muh phet un, leng chapate chuh a man u a, sawmsagih chu a that u a, a luchang hawu chuh pâlbâwm ah a siem u a, Jezreel khuo a Jehu kawmah a thâk tau a.

⁸ Chun, thangko a hunga, “Leng chapate lu chu a hun la tau,” ti’n a hilh a. Chun, Jehu chun, “Kulh lutna kawtkhak bul ah tien nih in tieng unla, zing tieng in um u hen,” a ti a.

⁹ Chun, a zingkal chun hiti hi ahi a, a va pawt a, mi chengcheng kawm achun, “Mi fel tak na hiu hi; ngaitiem u, ka pu chu ka phielgu a, ka na that ngut ta a; ahihleh, ziehaw cheng hi kuo thah ahi leh?

¹⁰ Lalpa’n Ahab inkawte chung thu a gen, Lalpa thu chu leisiet ahin luong mang hiel puo’n a tih heu un; Lalpa’n a suok Elija manga a gen khah a hun tun sak ahi ta hi,” a ti a.

¹¹ Khutichun, Jehu chun Jezreel khuo a Ahab inkawte, a na um chengcheng te leh, a miliente cheng leh, a guolte cheng leh, a thiempute chuh, khat chale hing hawih lo in, a that vek ta a.

Leng Ahaziah Insung mite Thahna

¹² Chun, Jehu chun Samari khuo a chieh dingin, Jezreel chu a pawtsan ta a. Lampi a belam pute belam mul metna In a va tun chun.

¹³ Jehu chun Juda leng Ahaziah suohpihte chu a mu a, “Kuo na hiu hi?” a ti a. Amau chun, “Ahaziah suohpihte ka hiu hi, leng chate haw leh, lengnu Jezebel chate haw chibai va bûk ding ka hiu hi,” ti’n a dâwng u a.

¹⁴ Chun, Jehu chun, “A hing in man un,” a ti a. Tichun, a hing in a man u a, belam mulmette kawkhuk kawm achun a that u a, sawmli le nih zet ahiu a; khat chale a hing hawih puou hi.

Ahab Insungmi Umsunte Thahna

¹⁵ Chun, zie apat chuh a pawt nung chun, Rekab chapa Jehonadab, amah muok dinga hung chu a va mu a; tichun, chibai a bûk a, a kawmah, “Na chunga lunggil dik ka put bang hin, lunggil dik, nangin ka chungah na pu die aw!” a ti a. Jehonadab chun, “Pu e!” ti’n a dâwng a. “A hih leh, na khut ei hun pie tie,” a ti a. Tichun, a khut chu a vak pie a, tichun, amah chun a kangtalai chungah a kailut a.

¹⁶ Chun, amah chun, “Ka kawmah hung inla, Lalpa a dinga ka phachuomngaih zie hi hung mu mawng tie!” a ti a. Khutichun, a kangtalai chung achun a chu khawm u a, Samari khuo ah a chieh tau a.

¹⁷ Chun, Samari khuo a va tun u chun, Ahab inkawte, Samari khuo a umsunte chuh a sukmangthai suok macheng chun a that zel ta a. Elija kawma Lalpa thugen bang ngêi khan.

Baal Hote Thahna

¹⁸ Chun, Jehu’n mipite cheng chu a sam khawm a, a kawm u ah, “Ahab khan Baal na hi tawmcha a sem a, Jehu hin chu vang, nasa takin ahi a sep chuh.

¹⁹ Khutichun, Baal thiemgaute leh, a hote cheng leh, thiempute cheng chu ka kawma hin hun sam khawm tiem u; kuomah a hung lo um kiu hen; Baal kawma hin kithawihna lopitak bawl ding ka hi; kuole, a hung lo taphawt chu thah ding ahiu,” a ti a. (Himahlele, Jehu chun Baal hote chu suklup guo a, a lepbawl ahi.)

²⁰ Tichun, Jehu chun, “Baal min in Kutpi phuong un!” a ti a. Tichun, zie thu chuh a than viel tau a.

²¹ Chun, Jehu’n Israel gam chengcheng ah a thâk viel ta a. Khutichun, Baal ho chengcheng chu a hung khawm tau a, a tello himhim a um puou. Tichun, Baal hona In achun a lut u a; Baal In chu kawtkhak apat in bângtawm tiengin a dim chak kêi tau a.

²² Chun, Jehu chun, thiempu kivanna puon enkawlpa kawm achun, “Baal hote cheng hi, kivanna puon hun lak sak in,” a ti a. Tichun kivanna puonhaw chu a hun lak sak a.

²³ Chun, Jehu chu Rekab chapa Jehonadab tawh Baal In achun a lut u a; Baal hote kawm achun, “Zie taka hin, Baal hote tihloh, Lalpa mite khatto a na um kha’n au, hawl unla, en viel tiem u!” a tiu a.

²⁴ Tichun, kithawihnate leh hâlmang thillat te lân dingin a lut tau a. Jehu chun pawlam ah mi sawmgiet a din sak zing a, “Zie mipite hi na thah vek dinguh ahi, kuole mi suohchak sak pên chun, a suohchak sakpa hinna sik chun amah hinna chan ina,” a ti a.

²⁵ Chun, Jehu chun, hâlmang thillat a lat zawh phet chun, a gâlveng sepaih leh a lawiupate kawmah, “Va lut unla, va that un! kuomah pawt sak kiu un!” a ti a. Tichun, chemzâm in a satlum u a; gâlveng sepaih leh a lawiupateu chun pawlam ah a paih dawk u a, chun, khawpi sunga Baal In achun a chieh u a, Ho-In mun thiengtho sung lam achun a chieh pek u a.

²⁶ Khutichun, Baal In a milim pathien haw chu a ladawk u a, a hâltum u a.

²⁷ Chun, Baal lim chu a suchim u a, Baal In chuh a susieu a, dailenna In dingin a mang tau a, tuni tieng hin a mang den tau hi.

²⁸ Khutibang chun Jehu chun Israel gam apat in Baal chu a hihmang tai.

²⁹ Himahlele, Nebat chapa Jeroboam gitlohna Israel te thilhihkhelh saka a hih haw chuh Jehu chun a haihsan diek puoh a, zie chu Bethel leh Dan a sana bâwngno limte ho ahi.

³⁰ Chun, Lalpa chun, Jehu kawmah, “Ka mit tung taka thil na hih ziekin leh, ka lunggil duhthusam bang taka Ahab inkawte chunga na hih ziekin, na chapate chu suon lina tiengin Israel lalchutphah achun chu’n au,” a ti a.

³¹ Himahlele, Jehu chun Lalpa Israel Pathien dân chu a lunggil cheng chengin a zawp puoh a; Jeroboam, Israel te haw thil hihgilo dinga puipa gitlohna kha a haihsan diek puoi.

Jehu Thihna

³² Zie lai chun Lalpa’n Israel gam chu a thahtha pan ta a. Tichun, Suria leng Hazael in, Israel gam chengcheng chu a zo ta zel a.

³³ Jordan apat a suohlam, Gilead gam chengcheng, Gad te haw, Reuben te haw, Manasseh te haw, Amon luia Aroer apat a Gilead leh Bashan gam na tiengin a la ta a.

³⁴ Chun, Jehu chanchin dangte, a thilhih chengcheng te, a hansan dante chu Israel lengte vaihawm lai thu zikna bu ah a chuong hilo ahim?

³⁵ Tichun, Jehu chu a pilepute kawm achun a ipmu a, Samari khuo ah a vui tau a. Chun, a chapa Jehoahaz chun a thasang in vai a hawm ta a.

³⁶ Chun, Samari gama Israel te chunga Jehu vaihawm sung chu kum sawmnih leh kum giet ahi.