2 KORINTH 9 - PATHIEN LEKHABU THIENGTHO (BSI)

Mi thiengthote Panpihna

¹ Judia gama Pathien sapchuom umte kawma panpihna kithak thu haw kha chuh, hun zik ngaiin ka he puoi.

² Panpih na nuom tak zet ui tih ka he a, Makedonia gam mite kawmah ka hun kisuonpih mah mah na hiu ui. Kum masa apat khan, “Akaia gama mite chuh panpih dingin a kisazo tau hi,” ka ti ta a. A lak u a mi tamtak chuh, nang haw utna ziek khan chawhthawh in a um ngêi ui.

³ Khutichun, zie thu a nang haw ka hun kisuonpihna thuteu kha, bangmahlo mai a suok lohna dingin, zie suohpihte hi na kawm u ah ka hun sawl ahi. Na panpihna dinguh a chuh. ka hun gen guola kha, kisazo sa a na na um theihna dingun.

⁴ Khutilochun Makedonia gama mi khat to in ei hun zuih khâk u leh, kiguo lo a ei hung muh khakpalh u chun, kei uh, nanguh ka ti puoi, zie ka hun kisuonpihna lam uh ahin, muolpho in um kha’ng kau.

⁵ Zieziekchun, suohpihte hi na kawm u a hun sawl masak a, thilpiek na tiemsau kha a na siem fel dinga hun gen masak kûl in ka hêi. Khutia chuh, ka hung tun phat leh, kinawh hât ziek hilo a, nangmau mawng in na utna ziekuh a na piek uh ahi tih a lat theihna dingin.

⁶ Himahlele, khutibang lam achun, theh tawm chun, ât tawm intin; theh tam chun, ât tam ina tih hezing un.

⁷ Mitin in, it kawma pie lo in, piek loh theih loh banga ngaia le pie lo in, a lunggil uh a a guot bang zel un pie zawu hen, Pathien in kipâk taka piete ahi, a lawp sek chuh.

⁸ Chun, Pathien in, nangmau haw sinmawh sanga tamzaw a hun pie thei a; chun, na sinmawh tin chenguh na nei thei u a; khutichun, thilpha bawlna dinga le kiting takin nei thei ding na hiu hi.

⁹ Pathien Lehkhathu’n: “Ama’n a hawm zak a; Chagahte kawmah a pie a; A diktatna chuh kumkhuo’n a um zing sek hi.” ti a a gen guol khan.

¹⁰ Chun, tuh dinga chi piepa, leh nek dinga chângthâk piepa Pathien chun, na sinmawh cheng u chuh hun pie hen la, chun, hun khansak hen la, na thilphalnau apat chun, gah tamtak hun suoh sak ta he’n.

¹¹ Hun tina, thilphal taka na um theihna dingun, hun phungvuk hen la, khutia chuh, mi tamtakin, kei uh apat a na thilpiekteu a muh phat u leh, Pathien kawma kipahthu a gen theihna dingun.

¹² Zie kilungsietna zenviel nasepna a na pannau ahin, Pathien mite tâksap âwng na huk mai uh hilo in; Pathien kawma kipahthu, nasa taka luong let in a suoh sak zaw ahi.

¹³ Zie lungsietna zenvielna nasep na sepnau hin a hun phawtchien tâk ziekin; mi tamtakin, Krista chanchin Pha dinga ginum taka nasep sek uh, leh amau haw ngêi leh, mi dangte chunga na thilphalnau a chan ziek u chun, Pathien kawmah lopina pie ding ahi ngâl u a.

¹⁴ Amau haw ngêi chun le, Pathien in hehpihna lamdang chuom diek na chunguh a a hun suklat ziekin, lungsietna nasatak hun nei kawmin hun paucham sak un au.

¹⁵ A thilthawnpiek gen theih lohte ziekin Pathien chuh pakchai tiu!