2 KORINTH 8 - PATHIEN LEKHABU THIENGTHO (BSI)

Gimthei Panpihna Thilpiek

¹ Chun, suohpihte, Makedonia gam sapchuom haw lawite laka Pathien hehpihna kipie chuh hun hetsak ding ka hiu hi.

² Khati a, buoina nasatak maia patepa a umna thuu leh; chagah tak mai himahleu le, a kipahnau luong let a, thilphalna nasatak mai a chan tâk zieu thute khah.

³ A theih chan un leh, a theih kal val nasan un, amau utthu’n a pieu hi tih ka hun hetsak na hiu hi.

⁴ Judai gama Pathien sapchuom umte panpihna a tel tei na ding chun, hah nget in ei ngên u a.

⁵ Zie chule, ka kinepna khel uh ahi nalai hi! Amasa’n, amau haw mawng chuh, Lalpa kawmah a kipie tha masau a; chun, Pathien deih bangin, keihaw kawmah a kipie kit uh ahi.

⁶ Khutichun, Tita, zie nasep a na panpa hi, hun sunzawm ding leh, zie lungsietna zieka thilpiek chuom kipie hi, hun subukim dinga nang haw hun panpih dingin, ka nget hiel uh ahi.

⁷ Khutichun, bang cheng, taksanna bang, thugen bang, hetna bang, na panpih utnau leh keihaw nei lungsietnau lama na neihzawh guol u hin, zie lungsietna nasepna lama chule na hauh theihna dingun thatnawp suoh dingin ka hun deih uh na hiu hi.

⁸ Thupie lam sanga ka gen ahi puoh a, mi dang phachuom ngaihna’n, na lungsietnau tak zie chule patep dinga ka hun gen zawk ahi.

⁹ I Lalpau Isu Krista hehpihna chuh, a chatgahna zieka na hung neih zawh theihna dingun, neizo mahlele, nang haw zieka, a hung chatgah tâk khah na he ngâl u a.

¹⁰ Chun, ziehi pha ka sak dân ahi, kum masa a na patsau kha hun subukim ta leu chin, nang haw adi’n pha’na. Nanguh hi a masa na hiu a, a sem ding chauh hilo in, a nasem pan te na hitau ahi.

¹¹ Khutichun, hih dinga kisakzawhna a um guol khan, tuhin hun hih buting tau in! Hih ding ti a, na guonggalh guol uh khan, zawh kal ngaklah takin um un la; na neih bang bangun tuhin hih tau in.

¹² Piek nawpna a um phawt chun, mi, a neih lohpi hilo in, a neih dungzui zela a piek chuh, Pathien in pawm sak ding ahi ngâl a.

¹³ Na chunguh a puokgik hun guon a, midang le puokgik dâwn zâng un, hun ti ka hi puoh a; himahlele, tulai taka hih, na kiningtin ziekun, mi dang tasam zaw te chuh na panpih uh kilawm ahi, ti ka hi zawi.

¹⁴ Khutichun, nang haw le tasam a na hung um tieng u leh, a kiningtin zawk u chun, hun panpih thei un au. Hitibang a hihin, kichamguol takin um thei un lau.

¹⁵ “A luok khawm tam chun a val in a nei puoh a, a luok khawm tawm chule, a kitasam diek puoi,” ti a Pathien Lehkhabu gen guol khan.

Tita leh a Guolte

¹⁶ Chun, Nanguh hun panpih ka nawp bang tak uh, Tita lunggil a piepa Pathien chuh pahchak in um hen!

¹⁷ Amah hin, ka ngetnau a pawm mai hilo in; panpih nawpna lunggil, amah a um mawng mawng a hih ziekin, na kawmuh a hung dingin, pawt ding ahi.

¹⁸ Chun, amah tawh tawn in, suohpih khat hun sawl ding ka hiu a; amah chuh, Chanchin Pha genna lama sapchuom tinin a pahchakna thuu a gen vengvung u a.

¹⁹ Zie mai chuh hilo in. Lalpa lopina ding leh, panpih ka nawp zieu suklatna dinga, zie lungsietna zenviel na ka sepnau a ka zinvielnau a ka kitawnpih dinguh a, sapchuomte’n a teldawk u leh, a guotsa him uh ahi.

²⁰ A zenviela ka pan uh, zie thilpiek thu lama hi, kuoma’n ei dem lohna dingun chingthei takin ka hih sek ui.

²¹ Ka thiltup u chuh, Lalpa ngaih maia hilo in, mihiem ngaih a thil kilawm le ka ngaihtuoh khawl sek uh ahi.

²² Khutichun, a kawm u ah, I suohpihpau sawl ding ka hiua, amah chuh thil tamtak ah mi phachuomngai tak ahi tih, ka phawtchien sau ahi tai. Tu vang hin, nang haw a hun ginchak ziekin, phachuom a ngai zawsem ahi.

²³ Tita hi chuh, ka guolpa leh, nang haw lama ka naseppih ahi a; chun, I suohpihteu hi chuh, sapchuom haw lawi sawlchak, Krista lopina tunte chuh ahiu hi.

²⁴ Zieziekchun, nanguh ka hun kisuonpihnau hi, a dik ngêi hi tih, sapchuom mite cheng chengin a het theihna dingun, a kawmuh ahin na lungsietnau a na sulang un.