2 KORINTH 3 - PATHIEN LEKHABU THIENGTHO (BSI)

Thugawlh Thak Nasemte

¹ Eimah kigen phat pan kit ding I hi tau maw? A hihloh leh, na kawmuh a piek ding ahim, na kawmuh apat genphatna lehkha, mi khenkhat a dinga a ngaih bang hin, kei u dingin le ngai ding maw?

² Nang u hi ka lehkhathawn uh, ka lungthim uh a zik; mi chengcheng het leh sim chuh na hiu ie.

³ Krista lehkha, eimau haw manga a thak; lehkhatui a zik hilo, Pathien hing Thagau a zik zawk; suong pêk a zik hilo, phehlevo lunggil pêk a zik ahi zawi tih, chien taka latsak ahi ngâl a.

⁴ Krista zâla Pathien lama ngamna I neih ziekun, zie chuh I gen ngam uh ahi.

⁵ Bang hileh keimau apat a pawt dingin kei uh mai hi ka buting ui ti ka hi puou a, I butinnau chuh, Pathien apat ahi zaw ngâl a.

⁶ Amah mah chun thugawlh thak zenviel dingin ei butin sak a; dân lehkhathu mai hi zenviel ding hilo in, thagau lam zenviel dingin le ahi zawi. Lehkhathu mai chun a that sek a, thagau chun vang a suhing sek hi.

⁷ Dan chuh, suongpek chunga lehkhamal a zik ahi a; zie chuh pieka a um lai in, Pathien lopina chuh a kilak a. Mosi maichang apat-vakna chuh mang hiei hiei mah leh, a hât bêk ziekin, Israel chate’n a mel chuh châng takin a en ngam puou hi. Dan mat a hih laia thihna tuntu mai bawn, zie tawbang taka lopi a a hung chun.

⁸ Thagau zenvielna chuh bangti pheta nasa’n a hungtung ta dem!

⁹ Mawh chansakna zenvielna bawn, a lopi chun, hukdamna zenvielna chuh, lopina lam achun nasa zaw mah mah ding ahi ngâl a.

¹⁰ Zie lam thu a chun, vak lopi tak mai kha, a sanga lopi zaw a um tâk ziekin a lopi zing zing ta puoi.

¹¹ Mang hiei hiei ding bawn, lopi taka a tun chun, kumsawt a ding lopina chuh, gamchenga lopi zaw ding ahi!

¹² Khutibang kinepna chuh I neih ziekun. I hangsan mah mah sek uh ahi.

¹³ Ei u vang, Israel-chate’n a vakna mang hiei hiei a, beimangpai ding a muh lohna ding u a, mai khuhna a, a maichang khuh, Mosi tawbang kha I hi puou ui.

¹⁴ A lungthim hawu chuh khak in a um a; tuni tieng hin le, thugawlh lui kha a sim cheng u leh, zie mai khuhna mah khan, a lungthim uh khuh in a um zing tai. Zie khuhna chuh Krista achun sukbeih in a um tai.

¹⁵ Tuni gei hin le, Mosi Danbu a sim tieng u leh, zie khuhna chun. a lunggil uh khuh in a um sek.

¹⁶ Himahlele, a lunggil u chuh Lalpa lama a ngat tieng leh, khuhna chuh lâkmang hi ta’n a.

¹⁷ Chun, “Lalpa” kiti hi Thagau ahi a, Lalpa thagau umna taka chun, chamtatna a um sek.

¹⁸ Khutichun, eihaw vang chuh, mai khuh loh in, I bawn un lim-et banga Lalpa lopina a salhvak a um in; zie lopina mah, Lalpa apat a hung, Thagau mawng chun, lopina apat lopi sawn in, amah kibatpih a suklamdan in I um uh ahi.