2 KORINTH 1 - PATHIEN LEKHABU THIENGTHO (BSI)

¹ Paul, Pathien deihlam a Krista sawlchak leh, I suohpihpau Timothe apat chun, Korinth khuo a Pathien sapchuom haw kawm leh, Akaia gamsung a um mi thiengtho chengcheng te kawm achun:

² Pathien I pau leh Lalpa Isu Krista kawm apat, lungsietna leh chamna na kawm u ah um hen.

Pathien kawma Kipahthu Genna

³ I Lalpau Isu Krista Pathien leh Pa, khuotuohna cheng Pa leh lungbihna cheng Pathien chuh, pahchak in um hen.

⁴ Amah chun, mi dang buoina tin cheng thuokte I lungmuon theihna dingun, eimau mawng in Pathien kawm apat I muh sek uh, lungmuonna kha mang in, I buoina teu achun ei lungmuon sek ngâl a.

⁵ Krista thawkna tin chengte kikawppih I hih mah bang u hin, Krista zâla Pathien panpihna nasatak changte le I hiu ui.

⁶ Himahlele, ka thawkgim phawt u leh, nang haw thamuonna ding leh, hukdamna ding ahi ngâl a;, keihaw’n panpihna ka muh phat u leh, nang haw le panpih in na um u a, keihaw’n, gimtheihna ka thawk tum sek uh bangmah hi, na thawk zawh theihna dingun, hatna piek in na um sek uh ahi.

⁷ Khutichun, nangmau a ka kinepnau hi a lîng ngei puoh a; ka thawkgimnau a nei thawkpih mah bang u hin, panpihna ka muh teu changte le na hi ngâl u a.

⁸ Suohpihte, Asia gama, ka chung u a thawkna tung thu khah na het loh uh ka nuom puou. Khati a, nasa taka, thawk zawh loh khawp a, hin nasan kinemlo khawp hiela delh den a ka um u khah.

⁹ Ahi, Ka chunguh a, thihna vaihawmna tung ahi tai, ka na ti hiel u a! Himahlele, zie thil haw chuh, keimau leh keimau chunga kinga lo a, mithi kaithopa, Pathien chung maia chuh ka kingak theihna dingun hungtung ahi.

¹⁰ Zie Pathien chun, khutibang thihna ding, lauhthawng-um, tizat-um tak lak apat chun ei hukdawk ta a; ei hukdawk kit intin; amah a ginna I ngak ziek u chun, ei hukdawk kit zel ding ahi;

¹¹ Nang haw’n, na pauchamnau a nei na kithuohpih ziekun. Khutichun, mi tamtak te’n kei u dinga a pauchamna teu chuh dâwn in um intin, tichun, Pathien in ei vangsak intin; chun, mi tamtakin, keihaw dingin, a kawmah kipahthu gen un au.

Paul Thil Guonggalh Kisanna

¹² Ka kipahna pên u chuh, zie khawvel a ka hindan u leh, nang haw tawh I kizawpnau hi, Pathien apat a, thieng tak leh dikna leh; mihing chitna hilo in, Pathien hehpihna thilhih theihna ahi tih, ka sie leh pha hetnau hin ei hetpihna hi ahi.

¹³ Tuhin vang, na sim theih ding u leh, na hêtchet theih dingteu mai ka hun zikuh ahi. Chun, tuhin, ka thugen uh, na he kim thei nai puou a, himahlele, na het bukimna hun uh hungtung intin;

¹⁴ I Lalpau Isu ni a chun nanguh ka kipahnau na hih ding guol mah un, kei u le na kipahnau hiding ka hiu hi tih hetna na neih bangun, ka thuu chuh a tawp chana na hetsak uh ka kinem hi.

¹⁵ Khutibang kinepna chuh nei in, a lehnih a hamphatna na chan theihna dingun, nang haw hung tawhtha masa leng ka tih ahi.

¹⁶ Makedonia gama chieh kawma nang haw hun tawhmalam a, chun, Judia gama ka chiehna dinga nei hung panpih theihna dinguh a, ka hungkit lam leh hun tawh kit ding tih, ka na guonggalh zawhsa chuh ahi tai.

¹⁷ Khutibang ka lunggulh ziek chun, ka lungthim detloh zie sulang ka hileh? Ahihloh leh, thil ka guonggalh tieng leh; keimah deih dana, “A hii” tih leh “A hi puoi” ti gel dingin ka hih dinga ahim?

¹⁸ Bang hita leh, Pathien taksan a um bangin, nangmau haw lam ah, ka thuu hi, “A hi” tih leh “A hi puoi” tih ahi gêl gêl puoh ngâl a.

¹⁹ Pathien chapa Isu Krista, a thu, kei leh Silvanas leh Timothe’n, na lak uh a ka gen u khah; “A hi” tih leh “A hi puoi” tih ahi gêl gêl puoh ngâla; Pathien achun, “A hii” tih ahi zawi.

²⁰ Pathien thutiem haw chuh bang zat hita lele, amah achun, “A hii” tih chuh a um ngâl a. Zieziekchun ahi, Pathien lopina dinga, Isu Krista vangin, “Amen” tih a hih sek hi.

²¹ Chun, nangmau haw tawh Krista a pumkhata ei siempa leh, kei uh thau ei nuh pa chuh Pathien ahi.

²² Amah chuh, amah a ngêi I hih uh hetna dinga, tiemtehna mawhuol ei nam khumpa leh, I lunggil u a Thagau ei piepa chuh ahi kit hi.

²³ Himahlele, ei hetpih dingin Pathien ka sama, amah chun ka lunggilte a he ngâl a! Nangmau haw hun hawl dingin ahi, Korinth khuo a chieh talo dinga thupukna ka siem zawk khah.

²⁴ Na taksan tei dinguh ahi ti a, na chung u a hun hih ka hi puou a; taksanna achun na ding det ui tih ka heu a. Nangmau mawng kipahna dingin. nang haw tawh sem khawm ka hi zawu hi.