2 KHANGTHUBU 8 - PATHIEN LEKHABU THIENGTHO (BSI)

Solomon Minthanna

¹ Chun, Solomon in Ho-In leh amah In a sak na a kum sawmnih a mat beih phetin hiti hi a hung hi a.

² Leng Huram in Solomon kawma khuo ana piekte chu a tungdawk a, Israel chate a chen sak a.

³ Tichun, Solomon in Hamath-zobah ava do a, a zo a.

⁴ Chun, gamthip ah Tadmor khawpi a sa dawk a, Hamath a thuomphuo kawih na khuote tawh a sa a.

⁵ Chun, Solomon in ziehaw hile a sa a, Beth-horon saknung zaw leh thangnung zaw le, kulhte, kawtkhakte, a kamnate nei in a sa dawk a;

⁶ chun, Baalath khawpi te, thuomphuo kawihna khuo chengcheng te, a kangtalai kawihna khuo te, a sakawl chung chuong mite umna khuote, Jerusalem leh Lebanon leh a gamsung chengcheng ah Solomon in a tup bang bang in a sa dawk vek ta a.

⁷ Chun, Israel suonte hilo, Hit te, Perez te, Hiv te, Jebus te suon a um nalaite chungchâng thu ah,

⁸ Himahleh, Israel suonte’n a sukmangthai loh uh, zie gama ana umte chu Solomon in suok nasem in a kawih a, tuni chan hin a um zing u a.

⁹ Israel chate vang chuh kuomah a nasem dingin suok in a pan sak puoh a, ahih ziekin galdo ding bang, a sepaih lawiupate laka alienpen bang leh, a kangtalai leh sakawl chung chuong mite laka lawiupa bangin a pang zawu hi.

¹⁰ Chun, ziehaw chu leng Solomon lawiupate laka a lienpente ahiu a, mipite chunga vaihawm a pang mi zanih leh sawmngate chu ahiu ui.

¹¹ Chun, Solomon in Pharaoh chanu chu David khawpi a pat in amah dinga In a sak sak achun a puito a, “Ka zi chu Israel leng David leng In a a um ding a hi puoi, Thugawlh kawihna thingkuong um na ahi a; mun thiengtho ahi,” a ti a.

¹² Khutichun Solomon in Ho-In malam a a siem, maichâm achun Lalpa kawmah hâlmang thil latte a lân a;

¹³ Mosi thupiek, ni cheng a dinga bithieh bang zel in chawlhni te, tha thak ni te, kut bi nei, kum khata thum vei, chângthâk chawl sawhloh kut te, chawlhkal kut te, bâwkcha kut te haw achun a lân a.

¹⁴ Chun, a pa David in ana guot bang khan, thiempu lawite leh Levi te, a chanmun chiet u a ni chenga sep khawk bang zela pakcha dingte, thiempute ma a zenviel ding bang in a guot u a; chun kawtkhak chengah a pawl pawl a veng dingte a guot a, khutibang chun Pathien mi David chun thu a pie a.

¹⁵ David in thiempu te, Levi te thu a piek chu bang lam hileh, sum thu haw a le a hi ding bang takin ahih zel u a.

¹⁶ Tichun, Lalpa In a sak pat u a pata a zawh chan un Solomon in a na guonggalh bangtak in a zo ta a. Tichun Ho-In chu zawh a hi tai.

¹⁷ Khutichun Solomon chu Edom gam a tuisuohgiet panga Ezion-geber leh Eloth lawng chawlhna mun achun a chieh ta a.

¹⁸ Chun, leng Huram in a suokte, tuisuohgiet a tawihdan he mi, kuong haw tawh a sawl a; Solomon suokte tawh Ophir gam ah a chieh u a, zie a chun sana talent zali leh sawmnga a hun puou a, leng Solomon kawmah a hun tun u a.