2 KHANGTHUBU 6 - PATHIEN LEKHABU THIENGTHO (BSI)

Temple a Solomon Thugen

¹ Khutichun, Solomon chu a paucham a, “Lalpa’n, thim sah mepmup leh meipi lak chu chênna dingin na tel a.

² himahleh na chênna dingin, kum khuo a na um na ding Ho-In chu ka hun na sak sak tai,” ti’n.

³ Zie tak achun Israel mipi te chu a ding u a, Leng chu amau haw lam achun a kihei a Pathien vangsakna a nget sak a.

⁴ A mah chun, “Lalpa, Israel te Pathien, ka pa David kawma amah kam ngêi a,

⁵ ‘Aigupta gama kipat ka mite ka puihdawk ni a pat in Israel te nam lak ah khawimah khuo ka min umna ding In sakna dingin ka tel ngei puoh a; ka mi Israel te chunga lawiupa ding mi kuomah le ka tel kha diek puoi;

⁶ Amah vang chuh ka min umna dingin Jerusalem ka na tel ta a, ka mi Israel te vaihawm sak dingin David ka na tel tai,’” ti a; a gen pa, a mah khut ngêi a hun pititpa hi pahchak in um hen.

⁷ “Ka pa David khan Israel te Pathien, Lalpa Ho-In ding a na sak guo sek a.

⁸ Himahleh Lalpa’n ka pa David kawmah, ‘Ka Ho-In ding in sak na guo sek a, zie tawbang lunggil na put hi a phâi;

⁹ himahleh nang in vang Ho-In chu sa puo’n la; na chapa, nangmah chapa ngêi chun ka Ho-In ding hun sa zawn a,’ a na ti ta a.

¹⁰ “Lalpa’n a thugen chu a hun guitun sak ta a, Lalpa tiem sa bang ngêi in ka pa David mun ka hun luoh a, Israel lalchutphah ah ka hung chu a, Israel te Pathien, Lalpa Ho-In chu ka na sa tai.

¹¹ Zie tak a chun Israel te kawma a na thun, Lalpa Thugawlh kawih na thingkuong chu ka kawih tai,” a ti a.

Solomon Pauchamna

¹² Solomon chu Lalpa maichâm ma ah, Israel kikhawmkhawmte, chengcheng muh in a ding a, ban zak in a paucham a,

¹³ (Solomon in sumeng dawhkhâng a sauhlam tawng nga, a letlam tawng nga, a san lam tawng thum a siem Ho-In huongsung lai taka a tun chung a chun a chu a, Israel kikhawmkhawmte chengcheng ma achun a khupdin a, van lam nga’n a bân a zaka,)

¹⁴ “Aw Lalpa, Israel te Pathien, lei leh van ah nangmah bang him Pathien a um puoi, a lunggil chengcheng u a na lampi hawh na suokte chung a chun thuthun guitun sak in, na hehpih sek a;

¹⁵ na suok ka pa David kawma na thutiem chu na guitun sak a; ahi, na kama na gensa chu tuni hin na khut in na subuting ta a.

¹⁶ Khutichun aw Lalpa, Israel te Pathien, na suok ka pa David kawmah Na suonte nang um banga um dingin a umdan u a a chittheih phawt u chun, ka mitmuh a Israel te lalchutphah a chu ding chu kitasam puo’n la, ti a na tiem kha guitun sak in.

¹⁷ Khutichun Lalpa Israel Pathien, na suok David kawma thu na gen chu tuhin lawhtit sak tei in.

¹⁸ “Himahleh Pathien chu lei a hin mihing lak ah a cheng takzet na dem? ngaitie, Van haw, van haw van ale dawllo na hi a, zie ka In sak a hin bangti’n na um thei die?

¹⁹ Himahlele aw Lalpa, ka Pathien, na suok in a hun sapna leh a pauchamna hi ngaihthâk sak in, na suok pauchamna leh ngetna hi hun ngaihsak in:

²⁰ Zie Ho-In mun lam nga a na suok a pauchamna chu ngaitha’n la, ‘zie chun ka min chu um ina,’ na tih na mun ngêi, In lam a hin sun leh zan a na mit na hah zing theih na ding in.

²¹ Na suok leh na mi Israel te hin zie mun lam hi ngaa a paucham tieng u leh a ngetna teu chu a na ngaihthak sak sek in, Na chênna mun van a pat in a na ngaitha’n la; ngaidam in.

²² “Mi kuon le a vengte chungah thil hihkhiel in, kipautiemsak hiel hung ngai leh, zie muna na maichâm ma a hin hung kitiem leu,

²³ nangin van a pat in na ngaitha’n la, migilo chu a gitloh zieka thiemloh chansakin, mi dik chu a dikna zieka thiemchan sak in na suokte vaihawm sak in.

²⁴ “Na mi Israel te hin na chung a thil a sukkhelh ziek u a a melmate laka a hung guollah u a, nang lam a hung ngat kit u a, na min a panpih u a, zie In a paucham a thil a hun nget u chun,

²⁵ nang in van a pat in na ngaihthak sak inla, na mi Israel te gitlohna ngaidam inla, a mau leh a pileputeu na piek gam ah puikit in.

²⁶ “Na chunga thil a sukkhelh ziek u a van a hung bin a, guoh a hung zuk loh a, zie mun lam nga a a paucham u a, na min a panpih u a, amau haw na sukgimtheih zieka a gitloh na teu a kisik u chun,

²⁷ Nang in van a pat in na ngaitha’n la, a chiehna dinguh lampi pha kâwkmuh in na suokte leh na mi Israel te gitlohna ngaidam in na mite a go chan ding u a na piekna gam ahin guoh hun zuk sak in.

²⁸ “Ka gam uh a hin kielte ahung kiek a, hipi te ahung lên a, gawt na ahim, muotna ahim, khaupe ahim, lung ahim ahung um a, a melma teu in a khuou haw a hun um u a, hipi bang hileh natna bang hi leh a hungtun chun,

²⁹ a hivei uh ahim, a lungkham nau ahim heta phawt in, zie In lam hi nga a ban zaka mimal ahim, Israel mipi te ahim in pauchamna leh ngetna a hun tut u chun,

³⁰ na umna van a pat in na ngaitha’n la, ngaidam inla, mitin a um dân chiet uh bangin lawhtit sak in, nangin mitin lunggil chu na he chiet ngâl a;

³¹ Ka pileputeu na piek, gama a umsung cheng u a; na lampi hawh uh a a hun kihchak theihna dingun.

³² “Na mi Israel te hilo, nam dang mi, na min lopi tak leh: na khut hattak leh na bân zak zieka gamla tak a pata hunga zie In lam nga a hi a hung paucham tieng u leh,

³³ nangin na umna van a pat in na ngaitha’n la, nam dangte’n a hun sap dân bang tak un a chung u ah hihin; tichun na mi Israel te mah bang in khawvel a namtin in na min hun heu intin uh, hun kihchau intin, zie Ho-In ka sak hin na min a chuong hi tih he’n au.

³⁴ “Na mite’n a melma teu chu na sawlna lam chengah a do u a, na khawpi tel leh na min dinga Ho-In ka sakna lam nga a na kawm a a paucham u chun,

³⁵ nangin a pauchamnau leh a ngetnau chu van a pat in na ngaitha’n la a thuu a chun panpih zel in.

³⁶ “Na chunga a hung gitloh u a (Kuomah gilo lo a um puoh ngâla) a chung u a na lungnat a, a, melma te khuta na piek a, gamla tak ahim, nai deuh ahim sal a a puih un le,

³⁷ Sala a puihna gam u a a kingaihtuoh dawk u a, a kisik u a, ‘Ka na gilo tau a, diklo tak leh gitloh huoi tak in thil ka na hih tau hi’ ti a,

³⁸ a tannau gam apat a a hun nget u a, sal a pui ten a puih uh a tannau gama a lunggil tak u leh a lungthim tak u a nang lam a hung ngat u a, a pileputeu gam lam leh na khawpi tel leh na min a Ho-In kisa lam nga a na kawma a paucham u chun,

³⁹ a pauchamnau leh a ngetnau chu na umna van apat in na ngaitha’n la, a thuu achun panpih zel inla, na chunga ana gilo ta, na mite chu ngaidam in.

⁴⁰ “Aw ka Pathien, lungsiet takin na mit hun hak inla, zie mun a pauchamna lam ahin na bil hun dawh in.

⁴¹ Aw Lalpa Pathien, na Ho-In mun achun chieh to in, nang leh thugawlh kawihna thingkuong chu lut in, Aw Lalpa Pathien, na thiempu te hukdamna’n van inla, na mi thiengtho te chu phatna achun kipâk u hen.

⁴² Aw Lalpa Pathien, na thau nuh mel chu kiheimang sak ki’n la, na suok David thilpha hihte chu hezing in,” a ti a.