2 KHANGTHUBU 5 - PATHIEN LEKHABU THIENGTHO (BSI)

¹ Tichun, leng Solomon in Lalpa in dinga a sak chu a zo thieng ta a, chun, Solomon in a pa David in thil a na pieksa chengcheng te chu a lalut a; dangkaguote, sanate, matchâk chengcheng te chu Pathien ina go kawihkhâwm na ah a kawih ta a.

Thugawlh Bawm Temple a Lâklutna

² Khutichun, Solomon in Israel upa te haw, a nam lawiupau, Israel suonte inkuon lawiupa cheng chengte chu, David khawpi Zion apat Lalpa thugawlh kawihna thingkuong zawn to dingin Jerusalem khuo ah a sam khawm a.

³ Khutichun Israel mi chengcheng te chu tha sagihna Bawkcha Kut hun chun leng kawmah a chieh khawm u a.

⁴ Israel upa te chengcheng chuh a hung u a, Levi te chun Thugawlh kawihna thingkuong chu a zawn u a.

⁵ Lalpa umna puon-In leh puon-In a ûmlebel thiengtho chengcheng te chu thiempu te leh Levi te chun Ho-In achun a kawih u a.

⁶ Leng Solomon leh Israel te kikhawm khawm chengcheng a kawm a hung kikhawm te chu Thugawlh kawihna thingkuong masang achun a um khawm u a, belam leh bâwngchal gensen guolloh leh simsen guolloh in a kithawi u a.

⁷ Tichun thiempu te chun Thugawlh kawih na thingkuong chu a um na ding mun ah a lalut u a, insung a munthiengtho pên ah, cherub te tha nuoi achun a kawih u a.

⁸ Cherub te chun bawm umna chung zawn achun a tha a zak zing u a, Cherub te chun bawm leh a zawnnate chu a khuh suok u a.

⁹ A zawnna mawngte chu Ho-In mun thiengtho apat chun a muh theih a; Himahleh pawlam apat chun a kilang puoi: (zie chuh zie tak achun a um zing hi.)

¹⁰ Zie bawm sung achun Israel chate Aigupta gama kipat a hung pawt u a Lalpa’n amau tawh kikala thu a thunna Mosi’n Horeb tânga a lak suongpek nih te tih loh chuh bangmah dang a um puoi.

Lalpa Lopina

¹¹ Tichun, zie taka thiempu te chengcheng chu kuomah khenchuom um lo in, a mau chiet a kisuthiengtho u a.

¹² Levi te lasa mi chengcheng te le a bawn un, Asaph te, Heman te, Jeduthun te, a chapa teu leh a suohpih teu tawh, patngatpuon a kivan in dakkhutbet te, tumgitte, kingkang te, tawh maichâm suohlam pang ah a ding u a, a lak u ah thiempu za leh sawmnih pengkun mût in a um ui:

¹³ Pêngkun mûtte leh lasa ten Lalpa pahchakna leh kipah-thugen na a a tumgit u chu gi khat bang mai in a kiza a; pengkun leh dâk khutbet leh thil tumgit te tawh a awu a suoh u a, “A mah chu a pha ngâla; a lungsiet na chu kumkhuo a um ding ahi,” ti a Lalpa a pahchak u leh, Lalpa Ho-In chu meipi’n a dim mepmup zieng ta a,

¹⁴ Tichun meipi ziek chun thiempute’n na a sep theih loh lawh hiel u a, Lalpa lopi na’n Pathien in chu a dim suok ta ngâl a.