2 KHANGTHUBU 35 - PATHIEN LEKHABU THIENGTHO (BSI)

Josia huna Chiehkân Kut

¹ Leng Josia chun Jerusalem ah Lalpa limbawl na dingin Chiehkân Kut a manga; Chiehkân kut na ding chu tha khatna, ni sawmleli ni’n a that u a.

² Thiempu te chu a na sep uh a guotsak a, Ho-In a phataka na sem dingin a tîl a.

³ Israel mite sinsaktu, Pathien a dinga kawihchuom Levi te kawmah; “Israel lengpa David chapa Solomon In sak achun Thugawlhna thingkuong thiengtho chu kawih un; na liengko uh a ding a puokgik ahih loh na dingin, Lalpa na Pathien u leh a mi Israel te na sem zaw tau in.

⁴ Israel lengpa David hun piek bang leh, a chapa Solomon hun na piek bangin, na inkuon uh lawiupa bang zelin a pawl pawl in kiguonggalh un.

⁵ Na suohpihteu inkuon lawiupa hihna bang zel in Levi te dinga chanvo nei in mun thiengtho ah um un.

⁶ Chiehkân Kut na ding belamno leh kêlchal chu that unla, kisuthiengtho unla, Mosi manga Lalpa gen banga na suohpihteu in a hihna dingun kithawih na guonggalh un,” a ti a.

⁷ Leng Josia chun zie tak a mi um chengcheng te chun Chiehkân kut a a lat dingun amah ganhawn lak ah belamno leh kelno singthum leh, bâwngchal sangthum a pie a.

⁸ A miliente chun mipite, thiempute, Levi te lat ding chu a pieu a. Pathien Ho-In lawiupa Hilkiah te, Zekaria te, Jahiel te chun Chiehkân kut a lat dingin belamno leh kelno sangnih leh zagup leh bâwngchal za thum thiempute a pieu a.

⁹ Levi te lawiupa, Konaniah te, a suohpih Shemaiah leh Nethanel te, Levi te lawiupa Hashabia te, Jeiel te, Jozabad te’n le Chiehkân kut a lat dingin Levi te chu gan no sangnga leh bâwngchal zanga a pieu hi.

¹⁰ Tichun Chiehkân kut na ding a guonggalh u a, lengpa thupiek bangin thiempute chu a mun u ah a ding u a, Levi lawi haw chu a lawi uh dân bang zel in.

¹¹ Belamno leh kêlchal a thah zawh u chun, Levi te chun a vun a lip u a, thiempute chun thisan chu maichâm a chun a theh viel u a.

¹² Mosi lehkhabu a kizik banga, a inkuon uh kikhen dân bang zel a Lalpa kawm a a lat theihna ding un, hâlmang thillat ding chu a lân u a.

¹³ Levi te chun dân guolin Chiehkân kut kithawihna sa chu mei ah a em u a, chun, thillat thiengtho te chu bel te, bel lien te, thil kanna bel te ah a huon u a, kintakin a sa chu mipite kawmah a hawm zak u a.

¹⁴ Zie chu a hih zawh phet un, Levi te chun a mau a ding leh Aron suona thiempute dingin sa chu a siem u a, a ziek chu thiempu te chu hâlmang thillat hâl ding leh thillat sathau te hâla chu zan khuo a a buoi sek ziekun.

¹⁵ Asaph chate, Levi chi, thil tumgit tumte, leng David in a sepna ding mun uh a guotte chu ziehaw hi ahiu; Asaph, Heman, leh leng thiemgau Jeduthun te ahiu ui. Ho-In kawtkhak vengte chun a mun uh a nutsieh uh a ngai puoi, Levi te chun a chiehkân kut mat na ding a guonggalh sak ziek un.

¹⁶ Khutichun lengpa Josia thupiek bang in, Chiehkân kut mat na ding leh, maichâm a hâlmang thillat lat ding te leh Lalpa nasep na thil chengcheng chu a guonggalh u a.

¹⁷ Israel suon, zie taka umte chun zie ni chun Chiehkân kut a nei u a, chângthâk chawl sawhloh kut chu ni sagih a mang u a.

¹⁸ Thiemgau Samuel damlai apat Israel gam ah chiehkân kut khutibang himhim chu a nei kha puou a; Israel leng kuomah in Josia leh thiempute leh Levi lawi haw leh Juda chengcheng leh Israel te’n le zie tawbang hin a nei kha puou hi.

¹⁹ Zie Chiehkân Kut hi Josia vaihawmna, kum sawmlegiet kum a, a mat uh ahi.

Josia Vaihawm Tawpna

²⁰ Tichun, ziehaw chengcheng nunga Josia’n Ho-In ding a guonggalh zawh chun, Aigupta lengpa Neko chu Karekish do dingin Euphrates lui ah a va chieh to a; chun, Josia chun a va do a.

²¹ Himahlele a mah chun, “Nang Juda lengpa, kei leh nang banga I kinakna ding um? nang hun do dingin ka hung puoh a, a do sa nung do ding zawn a puo ka hung, Pathien in kin dingin thu ei pie a, kei lam a pang Pathien a hi a, ei na nang kitie, hun sumangthai khan a,” ti’n palai a sawl a.

²² Himahleh Josia chun do a guo hâmhâm a. Leng Neko manga Pathien thugen chu a niel a, khutichun, a kisiem zatchuom a, Megiddo phai zawl achun kido dingin a chieh ta a.

²³ Kido lai chun leng Josia chu Aigupta te thalpi chang chun a kapkha ta a. A suokpa kawm achun, “Ei puo mang in ka liem nasa mah mah hi,” a ti a.

²⁴ Khutichun a suokte chun kangtalai apat chun a la dawk u a, a kangtalai dangah a kawih u a, Jerusalem ah a pawtung u a. Chun, a thi a, a pilepute thân ah a vui tau a, tichun, Juda mi chengcheng leh Jerusalem a mi cheng cheng in Josia chuh a sun tau hi.

²⁵ Thiemgau Jeremia chun leng Josia sûnna la a phuok a, zie la chu Israel gama pasal, numei lasa te’n a mah a sûn cheng u leh a sa zing sek ui. Zie chuh kahla achun a kizik hi.

²⁶ Chun, Josia thilhih dang chengcheng, Lalpa dân a kizik banga a thilhih phatte,

²⁷ A masapen leh a nunung pên te le, Israel leng leh Juda lengte chanchin bu ah a kizik hi.