2 KHANGTHUBU 32 - PATHIEN LEKHABU THIENGTHO (BSI)

Sennacherib in Jerusalem a Vaunau

¹ Chun, Leng Hezekia’n ginum taka Lalpa na a sepna chung a thil um chengcheng nung chun, Asuria te lengpa Sennacherib chun Juda gam a hun do ta a, kulhpi a ki-um khawpi te chu a hun sim a, a sepaihte chu kulh bângte susie dingin thu a pie a.

² Hezekia chun Sennacherib in Jerusalem le a hun do guoi tih a het phet chun,

³ Asuria ten Jerusalem a hun naih tieng u leh tui a muh loh na ding un khawpi pawlama tui lawng te chu suktan dingin a kiho tau a.

⁴ Khutichun, mi tamtak a kipunkhawm u a, tui chengcheng leh gamsung a lui luong te chu a tingtan u a, Asuria lengte chuh hunglut in, bang zieka kiningting taka tui nei zing ding ahiu em?

⁵ Leng chun khawpi vengte a suhat thak a, bângte a siem phau a, gâl ven inte a sau a, kulh pawlam bângte a siem phau a. Zie bân achun, David khawpi Millo chu a siempha a, matchâk leh phawte tamtak a siem beh a.

⁶ Khawpi a mi chengcheng chu sepaih lawiupa nuoi ah a kawih a, khawpi kawtkhaka mun âwng a um khawm dingin thu a pie a, a kawm u ah,

⁷ “Dettak leh muong takin um unla, Asuria lengte chu lau kiu inla, a sepaih hun puihte chu kihcha diek kiu in. Eihaw lam a pang chu amau haw lama pang sangin a hatzaw ahi.

⁸ Amah lama pang chu mihingte sepaih ahiu a, ei uh ei panpih ding leh ei do sak dinga ei u lam a pang chu vang Lalpa I Pathien uh ahi ngâl a,” ti’n lungmuon na thu a gen a. Mipite chu a lengpau thu gen chun a tha muon ta a.

⁹ Zie nung chun Asuria te lengpa Sennacherib chun a mah leh a sepaihte chu Lakish ah a um lai un, Juda lengpa Hezekia leh Jerusalem a Juda mi chengcheng te kawm achun,

¹⁰ “Asuria lengpa Sennacherib in hiti hin a tii, Jerusalem lak chu banga na ginchak lohnau chuh?

¹¹ Hezekia’n, ‘Lalpa I Pathien un Asuria lengpa khut apat ei hukdawk ina,’ ti’n gilkiel leh dangchâk a na thihna mai dinguh a a hun thep hilo ahim?

¹² Hezekia mah hi hilo ahim, a munsangte leh a maichâm te suchim a Juda mi leh Jerusalem a mite kawma, ‘Maichâm khat ah Pathien ho un na tin, gimlim hâl unlau,’ ti a thu hun pie khah?

¹³ Kei leh ka pu ten gamtin namtin chunga ka thilhih teu kha na he puou a ahim? Bang nam pathien inle ka khut apat a gam u chuh a hukbit sak theilo hilo maw?

¹⁴ Kuo nam pathien ahim ka pute’n a sukmangthai uh ka khut a pata a gamte hukdawk thei um a, Nang haw Pathien inle ka khut apat a a hun hukdawk theih chuom na ding uh?

¹⁵ Zieziekchun, Hezekia hin hun thêm dah henla, khutibang chun hun thêm kihen la, amah chu gingcha kiu in; bang nam pathien leh bang gam pathien inle a miteu ka khut apat in leh ka pute khut apat hukdawk thei a um puou a; bangti’n ahim na Pathien u chun ka khuta pat a hun hukdawk theih diek ding?” ti’n Jerusalem ah mite a sawl a.

¹⁶ Asuria miliente chun zie sanga nasa zaw chun Lalpa Pathien leh a suok Hezekia chung châng thu a phalo lam in a gen u a.

¹⁷ Tichun, Israel te Lalpa Pathien sulungna lam leh a gensie lam in lehkha a zik a, “Gamtin, namtin pathien te’n ka khut apat in a miteu-a hukdawk theih loh mah bangin, Hezekia Pathien inle ka khut apat in a mite hukdawk hiel puo’n a,” ti’n.

¹⁸ Miliente chun, Jerusalem a mite, khawpi kulh bâng chung a chute chuh a suklauh theihna dingun Hebrai pau in a vau u a, ti a chu khawpi chu baihlam taka lak ahih theihna dingin.

¹⁹ Chun, khuo a lak theihna ding u a sulau ding leh sulungkham dingin Jerusalem Pathien chu mihiem khuta siem, khawvel pathien bangphet in a gen u a.

²⁰ Khutichun lengpa Hezekia leh Amoz chapa thiemgau Isai chu zieziekchun a paucham u a, panpihna a ngên tau a.

²¹ Lalpa’n van sawlchak a sawl a, zie chun Asuria lengpa giehna mun a mihat hangsan chengcheng te, mapui lawiupa te chu a that a. Tichun zakcha tak melpu’n a gam lam ah a vaikit tai. Ni khat chu a pathien in a a va chieh lai in amah chate ngêi in chemzâm in a na that tau hi.

²² Khutibang chun Lalpa’n Hezekia leh Jerusalem a mite chu Asuria lengpa Sennacherib khut apat leh mi dang chengcheng te khut apat chun a hukdawk a, a kimvel u a mite apat in a veng hi.

²³ Mi tamtak in Jerusalem ah Lalpa ding in thilpiek a hun chawi u a, thil man tamtak tak te Juda lengpa Hezekia chu a hung pieu a; zie apat chun namtin mitmuh in limbawl in a um tai.

²⁴ Zie hun lai chun Hezekia chu a hung damlo ta a, a thi vang hiel a, a paucham a, tichun Lalpa’n a thih lohna dinga tiemtehna chu a pie ta a.

²⁵ Himahleh Hezekia chu, Lalpa’n amah dinga a thilhih chung a a kipahna sulang ding chun a chapo ta mah mah a, zieziekchun Juda leh Jerusalem a mipite chu a hung kingainiem tau a,

²⁶ A tâwp chun, Hezekia leh Jerusalem a mipite chu a hung kingainiem tau a, khutichun Hezekia damsung chun Lalpa’n mipite chu a gawt ta puoi.

Hezekia Neihzawhna leh Lopina

²⁷ Leng Hezekia chu a hung neizo mah mah ta a, mitin in a zah tau a; a dangkaguo te, sana te, suong mantam te, gimlim te, phaw te, a thil neih man tam dangte kawihna ding In a sa a.

²⁸ Zie bân a chun a buhte, uain te leh olive thaute kawih na In ding a sa a, a ganguol te in ding leh a belam huong ding te a sa a.

²⁹ Ziehaw chengcheng tih loh chun, Pathien in belam leh ganguol te a pie a, hauhsakna tamtak tawh khawpi tamtak a sa a.

³⁰ Leng Hezekia mah hin Gihon lui a tingtan a, a tui chu Jerusalem kulhbang sung lam ah a la lut a tichun Hezekia chu a thilhih chengah a lawh ting zel a,

³¹ Babulon gam apat a palai a gama thilmak umte dawng dinga a hung un le, Pathien in a nungchang patepna dingin amah thu thun a thah tha zaw ta ahi.

³² Leng Hezekia thilhih dang chengcheng te, Lalpa dinga a kipiek dân te chu, Amoz chapa thiemgau Isai kilâkna bu te, Juda leng leh Israel lengte chanchinbu ah a kizik hi.

³³ Tichun, Hezekia chu a thi a, lengte thân, David chate laka a phatna pên achun a vui tau a, Juda mite chengcheng leh Jerusalem a mite chengcheng chun a thih ni chun zahna nasatak a pieu a. A chapa Manasseh chu a thasang in leng in a pang tai.