2 KHANGTHUBU 31 - PATHIEN LEKHABU THIENGTHO (BSI)

Hezekia huna Halhthakna

¹ Zie Chiehkân kut guolvakna a kichaih phet chun, Israel mipite chengcheng chu Juda gama khawpi tin achun a chieh u a, suong phuh te a susieu a, Asher pathien te kawma milim latte chu a phuk u a, milim hona mun leh maichâm te a suchim u a. Zie tawbangmah chun Juda gam khuo dang haw, Benjamin gamte, Ephraim gam te, leh Manasseh gam te a hih u a, tichun, mi chengcheng chu a khuo lam chiet u ah a vaikit tau a.

² Leng Hezekia chun thiempu te leh Levi te kizawpna ding chu a siemthak kit a, zie nuoi achun na septum a pie chiet a, zie lak achun hâlmang thillat te, kipawlkhawmna thillat te, Ho-In a Pathien hona a sem dingte, Ho-In a mun chuom chuom a kipah thugen leh pakcha dingte a um u a.

³ Lalpa dana kizik bangin, zinglam leh nitâk lam hâlmang thillat dingte, chawlhni leh tha thak leh hunbi nei kut a mat dingin a mah gan guol lak apat a pie dawk a.

⁴ Zie bana chun leng Hezekia chun Jerusalem a mipite chu, Levi te leh thiempu te chanvo dinga guot thillat te hun pie dingin a tîlkhoh a, ti a chu Lalpa danbu a hih dinga umte hih na ding a a hun chenguh a piek theihna ding un.

⁵ Zie thupiek chu a hung zak phetin Israel chate chun a buhteu, uain te, thau te, khuoizu te, a lo u a thai gah masapen te chu a hun pieu a; chun, a neih cheng lak u a sawma-khat le a hun pieu hi.

⁶ Israel suonte leh Juda suonte, Juda khuo haw a umte chun a bâwng u leh belam sawma-khat te, Lalpa a Pathien uh chanvo a a kawihchuom uh sawma-khat te a hun pieu a, a kawihkhâwm gei gui mai u a.

⁷ Tha thum na ah a kawihkhâwm pan u a, tha sagihna chanin a kawihkhâwm zo u a.

⁸ Hezekia leh a miliente chun a vak muh u chun Lalpa leh a mi Israel te chuh a vangsak u a.

⁹ Khutichun Hezekia’n a thil kawihkhâwm chungchâng thuu chu thiempute leh Levi te kawm achun a gen a,

¹⁰ Zadok mi thiempu lien Azaria chun a kawmah, “Mite’n Ho-In a thilpiek a hun chawih tung u a pat in I ne zel u a, Lalpa’n a mite a vangsak ziekin, a val a um gei guia, ziehaw hi I nek val uh ahi hi,” a ti a.

¹¹ Lalpa In pindan te siem behlap dingin thu a pie a.

¹² Zie tak achun thilpiekte leh sawma-khat te chu bit takin a kawih u a.Levi chi lak a khat Konaniah kiti chu a enkawl dingin a kawih u a, a suohpihpa Shimei chu a kithuohpih dingin a guot u a.

¹³ A nuoi u a sem ding chun Levi te sawmkhat a guot u a: Jehiel te, Azariah te, Nahath te, Asahel te, Jerimoth te, Jozabad te, Eliel te, Ismakiah te, Mahath te, Benai te ahiu. Zie chengcheng hi leng Hezekia leh Thiempu lien Azaria thuneihna nuoi a kibawl ahi.

¹⁴ Levi mi Imnah chapa Kore, suohlam kawtkhak vengpa chu Lalpa dinga thilpiek leh thil thiengtho hawp dawkna lama mawhpuo ahi.

¹⁵ Khawpi dangte, thiempu te chênna munte achun Levi dangte chun ginum takin a panpih u a, ziete chu Eden te, Miniamin te, Jeshua te, Shemaiah te, Amaria te, Shekania te ahiu ui. A mau chun a suohpih Levi te kawm achun nek ding kibang chiet in, a nasep dungzui zel u chun a hawm u a.

¹⁶ Zie bana chun, pasal kum thum apat a chunglam khangthu bu a dungzui in nichenga Lalpa In a sep ding pawimawh nei a Inkuon dungzui u a chieh sekte simloh in.

¹⁷ Thiempute chu a inkuon uh khangthu zikna dungzui in, Levi te chu kum sawmnih apat a chunglam cheng a pawl-apawl a nasep piek ahiu.

¹⁸ A bân achun a zi teu leh a chateu leh a inkuoteu chengcheng chu ziklut vek ahiu a, bang hun a le a nasep ding teu chu sem zing thei dinga kiguo zosa a a um zing uh a ngaih ziek in.

¹⁹ Aron suon khawpi sunga nasepna piek a umte leh, khawpel a um, thiempu te leh Levi te zikna a kizik ta phawtte an chanvo pie ding mi guot chuom a um u a.

²⁰ Khutibang chun, Juda gam chengcheng ah Hezekia chun Lalpa a Pathien mitmuh a pha leh dik leh ginum in thil a hih sek a.

²¹ Dan zawp chungchangte, Ho-In chungchangte leh, a thilhih cheng a Pathien kawma kipumpiek tak leh, lungthim ginum taka a hih ziekin a lawh ting mah mah ta a.