2 KHANGTHUBU 29 - PATHIEN LEKHABU THIENGTHO (BSI)

Juda Leng Hezekia

¹ Chun, leng Hezekia chuh kum sawmnih leh nga a upa a hih in a lal pan a; Jerusalem ah kum sawmnih leh kum kuo a lal a: a nu min chu Ahijah, Zekaria chanu ahi.

² A pu David thilhih bangte hihin, Lalpa mitmuh in thilpha a hih sek a.

Ho-In Sukthienthona

³ Hezekia chun leng a hung hih kum, tha khatna achun-Ho-In kawtkhak chuh a hawng kit a, a siempha ta a.

⁴ Thiempu lawikhat leh Levi te chu Ho-In huongsung suohlam pang achun a puikhawm a,

⁵ a kawm u ah, “Nang haw Levi chite hi kikawih chuom unla, Lalpa, na pileputeu Pathien Ho-In hi suthiengtho un. Ho-In apat chun a subuok thei thil chengcheng chu la dawk vek un.

⁶ I pileputeu kha Lalpa Pathien a dingin a na ginum ta puou a, a deihloh lam thilte a na hih tau a hi! Amau haw chun a na kiheimangsan tau a, a chênna in ngêi hile a na kihei mangsan tau hi!

⁷ Ho-In kawt chu a khak uh a, thaumeite a sumit uh a, Israel te Pathien Ho-In a gimlim hâl leh, hâlmang thilpiek chuh a na hih ta puou hi.

⁸ Zieziekchun Lalpa lungnat chuh Judate leh Jerusalem a mite chung achun a um ta a, na mit uh a na muh bang ngêi u hin, buoina te, tizat-um na te chuleh êngho ding leh nuihzatbuk dingin a na siem ta ahi.

⁹ I pileputeu chu chemzâm a thah in a na um tau a, I chanuteu leh I chapateu leh I ziteu ngêi chu sala puih in a na um tau hi.

¹⁰ “Tuhin, zie lungnatna nasatak chu a beih theihna dingin Lalpa Israel te Pathien kawmah thuthun ka guot ahi.

¹¹ Ka chate haw, limsak lo in um kiu inla, Lalpa chun nang haw hi a masanga mipite puitu a um ding leh, gimlim hâl dingin a hun tel na hi tau hi,” a ti a.

¹² Khutichun, Levi chi Kohath suonte laka Amasai chapa Mahath te, Azariah chapa Joel te, Merari chapate lak apat Abdi chapa Kish te, Jehallelel chapa Azaria te, Gershon mi laka Zimma chapa Joah te, Joah chapa Eden te;

¹³ Elizaphan chapate lak apat Shimri leh Jeiel te, Asaph chate lak apat in Zekaria leh Mataniah te;

¹⁴ Heman chate lak ah Jehuel leh Shimrei te, Jeduthun chate lak apat Shemaiah leh Uziel te chu a kipan dawk uh a.

¹⁵ A suohpihteu Levi te chu a sam khawm u a, a kisuthiengtho u a, Lalpa thu a lengpa thupiek banga Ho-In suthiengtho dingin a lut uh a.

¹⁶ Thiempute chuh a suthiengtho ding chun Ho-In insung gil lam achun a va lut uh a, Ho-In a thil nîn a muh cheng cheng u chuh inmai lam ah a la dawk uh a. Zie apat chun Levi te chun a lau a, khawpi pawlama Kidron lui lam ah a pawdawk tau hi.

¹⁷ Tichun, tha khatna, ni khat ni chun nasep chuh a pan tau a, zie tha mah ni giet ni chun Ho-In hulliep chuh a bawl tung uh a; tichun, ni giet sungin Ho-In chu a suthiengtho u a; tha khat na, ni sawmlegup ni’n a, zo suok tau hi.

¹⁸ Levi te chun leng Hezekia kawm achun, “Ho-In chu ka suthiengtho zo vek tau a, hâlmang thillat na ding maichâm leh, chângthâk kawihna dawhkân leh a matchâk chengte tawh.

¹⁹ Chuleh, lengpa Ahaz a lal lai a thil lâkmang cheng, a paih thâng ûmlebel chengcheng te le ka siem pha kit u a, ka suthiengtho vek tau ui, Lalpa maichâm masang lam ah a um hi.” a tiu a.

²⁰ Chun, leng Hezekia chu zingkal matak in a hung tho a, khuo lawiupa te chu a samkhawm a, a bawn u chun Ho-In ah a chieh u a.

²¹ Leng inkuon te leh Juda mipite ding leh Ho-In sukthientho na dinga gitloh thawihna a lat dingin bâwngchal sagih, belamchal sagih, belamno sagih leh kêlchal sagih a kai u a. Leng chun Aron suon a thiempu te kawmah gancha haw chu kithawihna a maichâm a lân dingin a hilh a,

²² Thiempute chun bâwngchal chu a that masau a, a zawhin belamchal, a banah belamno a that u a, a thisan chu maichâm ah a theh u a.

²³ Kelchate chu lengpa leh mipite kawm a chun a hun kai nai u a, a chung u ah a khut uh a ngau a.

²⁴ Thiempute chun a that u a, a thisan u chu Israel mi chengcheng dinga gitloh thawihna ding in a lân u a; Israel mi chengcheng a dingin hâlmang thillat leh gitloh thawihna siem dingin leng chun thu a pie a.

²⁵ Lalpa’n David kawm a leng thiemgau Gad leh thiemgau Nathan te manga a thupiek bangin Ho-In achun Levi te chu dakkhutbet te, pêkgitte, kingkang te tum dingin a kawih a.

²⁶ Chun, Levi te chu David siem thil tumgit haw tawh a ding u a, thiempu te pengkun tawh.

²⁷ Hezekia chun maichâm a hâlmang thillat lân dingin thu a pie a, chun, hâlmang thillat chu apat tak un Lalpa la chu pengkun leh Israel lengpa David siem thil tumgit tawh a sa pan u a.

²⁸ Taka mipi umte chun Pathien a ho u a, lasa te chun la a sau a, pengkun mûtte chun pengkun a mût u a, hâlmang thillat lat zawh masieh chu khutibang chun a hih zing u a.

²⁹ Thillat a lat zawh u chun lengpa Hezekia leh a mipi te chengcheng chun khun in Pathien a ho u a.

³⁰ Lengpa Hezekia leh milien te chun Levi te chu David leh thiemgau Asaph phuok, pahchakna la sa ding in thu a pie a, mitin chun kipâk tak in pahchak na la a sau a, a khun u a, Pathien a ho tau a.

³¹ Khutichun, Hezekia chun, “Lalpa dingin na kisuthiengtho tau a, hung nai unla, Lalpa kawmah kithawihna leh kipah thugenna thillat hun lân tiem u,” a ti a. Tichun, mipite chun kithawihna te, kipah thugenna thillat te a hun lân u a: khenkhat in a mau ut bangin hâlmang thillat a hun lân ui.

³² Mipite’n hâlmang thillat a hun lat zah u chu, bâwngchal sawmsagih leh belamchal za leh belamno zanih ahi; ziehaw chengcheng hi Lalpa din hâlmang thillat ding a hi vek hi.

³³ Thillat chengcheng chu bâwngchal zagup, belamchal sangthum ahi.

³⁴ Amahvang chuh thiempu atawm taluou a, hâlmang thillat gan chu a lip seng puou a; zieziekchun a suohpihteu Levi te’n a zawh mau chun thiempute a panpih u a. (Levi te chu thiempute sangin kisukthientho thu ah a thuchil zawu hi).

³⁵ Kithawihna dinga thillat, kihalvam suok tihloh achun, kithawihna dinga thillat mipite’n a nek sekteu laka a thau hâl ding te, hâlmang thillat tawh kilân khawm, dâwn ding thillat te chung achun thiempute chun mawh a puou hi. Khutichun Ho-In a Pathien hona chu a kipan kit ta a.

³⁶ Pathien in zie tawbang thil te chu kintaka hihdawk thei dinga amau haw a panpih ziek chun, Leng Hezekia leh mipite chu a kipâk mah mah tau hi.