2 KHANGTHUBU 28 - PATHIEN LEKHABU THIENGTHO (BSI)

Juda Leng Ahaz

¹ Chun, Ahaz chu kum sawmnih a hih in leng in a pang a, Jerusalem ah kum sawmlegup vai a hawm hi.

² Israel lengte lampi a hawh zaw a, Baal te dingin milim sunkawm te le a siem hi.

³ Hinom luiphai ah gimlim te a hâla, Lalpa’n Israel te masanga a nawhdawk tâk nam te’n thil kihdak-um tak a hih sek bangun a chate chu hâlmang thillat in a pie a.

⁴ Milim pathien hona munte, tâng haw ah, thing hing tin nuoi haw ah a kithawi a, gimlimte a hâl sek hi.

Suria te leh Judate Kidona

⁵ Zieziekchun Lalpa a Pathien in Suria leng khut ah a pie a; a do u a, a mite tamtak salin a pui u a, Damaska ah a pui u a, chun, Israel lengpa khut ale piek a hi a, amah chun tamtak a that hi.

⁶ Remalia chapa Pekah chun Juda gam ah mi hangsan chiet nuoikhat leh singnih a that a, a pileputeu Pathien chu a kiheisan ziek uh ahi.

⁷ Ephraim mihat Zikri’n. leng chapa Maaseiah leh insung pawpa Azrikam leh Elkanah, lengpa bana pa chu a that a.

⁸ Israel suonte’n a suohpihteu nuoi nih, numeite, a chapateu, a chanuteu sal in a pui u a, gâllâk tamtak tawh Samari ah a puo mang tau a.

Thiemgau Obed

⁹ Himahleh Samari khuo achun Lalpa thiemgau Obed kiti chu a cheng a. Israel sepaihte’n Juda mite sala puih hungkit haw, khawpi a lut ding kuon u chun a va tuok a a kawm u ah, “Na suonteu Lalpa Pathien chu Juda mite chungah a lungna a, a hun zawhsak a, himahlele tun, nunsie taka na thah dân teu chu a za ta ahi.

¹⁰ Chun, Juda leh Jerusalem mite chu suoknu leh suokpa a siem na guou a: himahlele, nang haw ngêi hin le Lalpa na Pathien u chungah na sukhiel uh hilo ahim?

¹¹ Zieziekchun ka thu hi ngai un na suohpihteu sala na mat uh numei leh pasal te hile chieh kit sak un, Lalpa lungnatna nasatak mai chu na chungu ah a um ahi,” a ti a.

¹² Mâllam leng gama mapuitu mi lite: Jehohanan chapa Azaria te, Meshillemoth chapa Berekiah te, Shallum chapa Jehizkia te leh Hadlai chapa Amasa te chun le gâl mun apat hungte thilhih chu a dodal u a.

¹³ A kawm u ah, “Zie sala matte chu hun puilut kiu in, Lalpa deihloh lam hih in na na gilo tau a, ei gawt dingin ka sulungna tawk tau hi. Tuhin, ka thiemmawhnau behlap dingin bang ahim khat ei hih beh sak guo na hiu hi,” a tiu a.

¹⁴ Khutichun sepaihte chun miliente leh mipi te kawm achun salmat leh gâllâk sum te chu a piedawk tau a,

¹⁵ tichun mi li chu salmat te kawma a gâllâkteu apat a silhlechen te, pie dingin a teldawk u a. Amau chun puon te leh kengtawbekte silh ding leh buh dingin a pieu a, nek ding leh dâwn ding te-a pieu a, a liemna mateu chu olive thau a nuh sak u a, A lak u a chieh peih talo te chu sabiltung chungah a chut sak u a, salmat te cheng chu Juda gama Jerikoh khuo a, tum thing khawpi kiti achun a thak kit vek tau a. Tichun Israel te chu Samari ah a kilehkit tau hi.

Ahaz in Suria te Panpihna a Ngetna

¹⁶ Edom te chun Juda te chu a hun do pan tau a, tamtak a man tau a.

¹⁷ Khutichun leng Ahaz chun Asuria lengte kawm achun panpihna a ngên ta a.

¹⁸ Zie hun chun Philistia te chun thanglam pang tâng bula khawpi te leh simlam a Juda te chu a do u a. Beth Shemesh khawpi te a lau a, Aijalon leh Gederoth te leh Soko khawpi te, Timnah khuo te leh Gimzo leh a khawpelte a lau a, tak achun a cheng den tau a.

¹⁹ Israel leng Ahaza chun a mipite thuneihna chu a bawhsie a, Lalpa chu a muhsit ziekin Lalpa chun Juda te chung achun buoina a hun tunsak ta ahi.

²⁰ Asuria te gam vaipaw pa chun panpih malak in a na dodal a, a subuoi zaw ta a.

²¹ Khutichun, Ahaz chun Ho-In leh leng in leh mipite lawiupa haw in apat chun dangkaguo te chu a la a, gam vaipuopa kawm achun a pie ta a, himahleh a panpih diek ta puoi.

Ahaz Gitloh na

²² A lungzînna a san deuh deuh phet chun, Ahaz hin Lalpa chungah thil a sukhiel deuh deuh mai ta a.

²³ Amah melma Damaska te pathien kawm poh ah a kithawi a; “Suria lengte pathien chun amau chuh a panpih ziekin ei panpih theihna dingin a kawm u ah kithawi ding ka hi,” a ti vangvei a. Himahleh amah leh Israel mi chengcheng te chunga sietna ahi ta a.

²⁴ Ho-In a matchâk chengcheng chu a la dawka, a susie behlap na lai a. Ho-In kawt chu a khâk a, Jerusalem vel mun chengah maichâm a din ta a.

²⁵ Juda gamsung a khuo tin leh khawpi cheng achun gamdang pathiente kawma gimlim hâlna dingin milim pathien hona ding maichâm a siem a. Zie tawbang hin, a pulepate Pathien chuh a sulungna ta a.

²⁶ Ngaitie, a vaihawm hun sunga thil chengcheng chu, abul apat a tâwp chanin, Juda leh Israel lengte chanchin zikna bu ah a bawn in a kizik hi.

²⁷ Khutichun, leng Ahaz chu a pulepate kawm achun a ipmu ta a, Jerusalem khawpi ah a vui u a; himahleh, Israel lengte thân ah a vui puou hi: tichun, a chapa Hezekia chu a thasang in leng in a pang tai.