2 KHANGTHUBU 27 - PATHIEN LEKHABU THIENGTHO (BSI)

Juda Leng Jotham

¹ Chun, Jotham chu a lal pat tûngin kum sawmnih leh nga a upa ahi. Jerusalem ah kum sawmlegup vai a hawm a, a nu min chu Jerushah, Zadok chanu ahi.

² A pa Uzziah guolin Lalpa kipah lam in thilpha a hih sek a, himahleh a pa guol in Ho-In a gimlim hâl in thil a hih guo puoi. Mipite vang chun gitloh na a hih zawm zing u a.

³ Ho-In mâllam pang kawtkhak siempha chu Jotham a hi a, Jerusalem kimvela kulh bâng Ophel kiti mun a chun le nasatak in na a sem a.

⁴ Juda tâng gam ah khawpi te a siem a, gam nuoi ah gâlven in nasatak tak te leh kulh te le a siem a.

⁵ Amah chun Ammon lengte a do a, a zo a. Chun, Ammon suonte chun zie kum chun dangka talent za leh buh puok singkhat leh buhman puok singkhat a pieu a. Khutibang mah chun Amon suonte chun a kum nihna leh a kum thumna a chun le a pieu hi.

⁶ Jotham chun ginum taka Lalpa a Pathien thupiek a zawp ziek chun a hung hât deuh deuh ta a.

⁷ Tichun Jotham vaihawm dân chengcheng, a galdo dân te, a um dân chengcheng te chuh, Israel leh Juda lengte chanchin zikna bu ah a kizik hi.

⁸ A lal pat tûng in kum sawmnih leh nga mi ahi a, Jerusalem ah kum sawmlegup a lal hi.

⁹ Chun, Jotham chu a thi ta a, David khawpi ah a vui u a, chun, a chapa Ahaz’n a thasang in vai a hawm ta a.