2 KHANGTHUBU 24 - PATHIEN LEKHABU THIENGTHO (BSI)

Juda leng Joash

¹ Joash a lal pat tûngin kum sagih mi a hi: Jerusalem ah kum sawmli vai a hawm hi, A nu min chu Zibiah, Beerseba mi ahi.

² Joash in thiempu Jehoiada damsung in Lalpa mitmuh in thilpha a hih a.

³ Jehoiada’n Joash chu zi nih a neihsak a, chanu leh chapa a nei hi.

⁴ Leng a hih chawmkhat nung chun Joash chun Ho-In siemphat ding a guo ta a.

⁵ Thiempu te leh Levi te chu a sam khawm a, Juda khawpi haw a chun chieh unla, kum chenga na Pathien In uh siemphat na ding, Israel mipite apat paisa a va lakhawm tiem u, khâi, muongchâng kiu in, a ti. Himahleh, Levi te chu a kinawh puou a.

⁶ Khutichun, a lawiupa pau Jehoiada chu a sama, “Lalpa umna puon in nasemte panpihna ding a Lalpa suok Mosi’n mipite kawma a phut, paisa chu Levi te hin Jerusalem leh Juda gama mite a pata a lâkkhâwm ding u hi bang zieka etpih lo na him?” a ti a.

⁷ Migilo nu Athalia zuite chun Ho-In chu a susie zo ta ngâl u a; chun, Ho-In a thil thiengtho chengcheng te chu Baal hona dingin a mang zo ta ngâl u a.

Ho-In Siemphatna

⁸ Khutichun, lengpa’n Levi te chu sum bawm siem dingin thu a pie a, zie chuh kawtkhak pawlam a chun a tung u a.

⁹ Thaleka Pathien suok Mosi Israel mite hih dinga tuok ding bi a guotsa chu Lalpa dinga hun tuok ding in Juda gam chengcheng leh Jerusalem ah thu a than viel ta a.

¹⁰ Zie thu chun miliente leh mipi te chu a sukipak ta a, a dangka teu a hun chawi u a, bawm achun a hun kawih dim tau a.

¹¹ Chun, Levi te chun lengpa miliente kawma bawm chu a hun chawih u a, dangka tamtak a um hi tih a het u chun, lengpa lehkhazikpa leh thiempu lien thasangpa chun bawm apat in a bun dawk a, a lau a, a mun achun a kawih kit u a. Khutibang chun ni cheng in a hih u a, dangka chu tamtak a dawl khawm tau hi.

¹² Tichun, leng leh Jehoiada chun paisa chu Ho-In siemphatna chunga mawhpuo te kawm achun a pieu a, a mau chun, suongsekte, thing bawl te leh thik siemte, a guoi u a.

¹³ Tichun na semte chun a bawl u a, a sem pha mah mah u a, Ho-In chu a masa tawbang in a siemphau a, a tung det kit tau hi.

¹⁴ A siemphat zawh phet un dangka a val umna lai chengcheng chu lengpa leh Jehoiada, kawmah a hun chawi u a, zie chun Ho-In a nasepna dingin ûmlebel te, van matchâk te, siemna dingin a mang u a, tichun Jehoiada damsung in Ho-In a hâlmang thillat chu a lân zing ui.

Jehoiada Thiltup Heidanglamna

¹⁵ Himahlele Jehoiada chu upatak, khûp leh kha kichih a dam in a thi ta a, A thih in kum za leh kum sawmthum a upa ahi.

¹⁶ Israel te laka Pathien chung leh a in chungchanga thil a hih phat ziekin David khawpi ah lengte lak ah a vui ui.

¹⁷ Himahleh Jehoiada a thih phet chun, Juda mi lawiupa te chun amau thu zawp dingin a thempai tau a.

¹⁸ Tichun a pileputeu Pathien Ho-In chu a kiheisan u a, Asher pathien leh milim te a ho tau a. A gitloh nau ziekin Juda te leh Jerusalem chungah Lalpa lungnatna a hung tung ta a.

¹⁹ Himahleh Lalpa’n a kawma puikit dingin a kawm u ah thiemgaute a sawl a, a dikloh zieu a hetsak u a, himahleh a bil uh a dawh nuom diek puou hi.

Zekaria Suong a Sehlup na

²⁰ Thiempu Jehoiada chapa Zekaria chungah Pathien thagau a hungtung a, Amah chu mipi muh theih ding in a ding a, a kawm u ah, “Pathien in hiti hin a tii, Bangati a na chung u a sietna tun lawh hiela Pathien thupiek na bawhsiet uh a hi? Lalpa chu na kiheisan ziekun a man le a hun kiheisan ahi,” a ti a.

²¹ Leng Joash le Zekaria thah guo lak ah a panga, lengpa thupiek in Zekaria chu Ho-In huongsung ah suongin a sep lum tau hi.

²² Khutibang chun lengpa Joash chun a pa Jehoiada nasep chu hezing lo in Zekaria chu a that tai. Chun, Zekaria chun a thih ding kuon in, “Lalpa’n na thilhih u hi a mu a, hun gawt ding ahi,” a ti a.

Joash Vaihawm Tawpna

²³ Chavang ahung hih phet chun, Suria sepaihte chun Juda leh Jerusalem chu a hun do tau a, mipi lak achun leng chate chu a hun kaidawk u a, a that tau a. gâllâk thil chengcheng chu Damaska leng kawm achun a thak vek tau a.

²⁴ Suria sepaihte chu tawmcha mai hung kuon ahiu a; a pileputeu Pathien Lalpa chu a kiheisan ziekun Lalpa’n sepaih tamtak mai te chu a khut u ah a pie a, khutibang chun leng Joash chu gawt in a um tai.

²⁵ Nasa taka sukliem in a um u a, a melmateu in a taihsan nung in, a miliente nih in a phiel guu a, thiempu Jehoiada chapa te a thahna chunga phuba la chun a zâlkhun chung achun a that tau a, David khawpi a chun vuih in a um a, himahleh lengte thân a vuih in a um puoi.

²⁶ (Ziehaw hi amah phieltute chu ahiu hi; Ammon mi Shimeah chapa Zabad leh Moab mi Shimrith chapa Jehozabad.)

²⁷ Tichun, a chapa chungchâng thu te, Ho-In a siemphat chungchâng thu te, leng chanchin hilhchetna bu achun zik ahi. A thasang in a chapa Amaziah chu a lal tai.