2 KHANGTHUBU 22 - PATHIEN LEKHABU THIENGTHO (BSI)

Juda leng Ahazia

¹ Arab mi khenkhat te chun kidona a hun pan u a, leng Jehoram chate chengcheng, a neupen Ahazia tihloh chu a that vek u a, Khutichun Jerusalem a mite chun Ahazia chu a pa thasang in leng in a siem tau a.

² Ahazia chu kum sawmnih leh nih a hih in a lal pan a, Jerusalem ah kum khat vai a hawma.

³ A nu Athalia leng Ahab chanu, leng Omri tunu chun a thuhilh ziekin Ahazia chun le Ahab inkawte lampi chu a hawh a zie chun thil gilo lampi ah a pui ta a.

⁴ Lalpa mitmuh in thil gilo a hih a, a pa thih nung in, Ahab inkawte chu thu pie a a pan ziekun a sietna dinga kaihuoitu a hi tau hi.

⁵ A kaihhuoi nau bang bang in a um a, Ramoth-gilead ah Suria lengpa Hazael do dingin Israel lengpa Ahab chapa Jehoram kawmah a chieh a; Suria te’n Jehoram chu a na suliem tau a,

⁶ Tichun, Suria lengpa Hazael tawh Ramah khuo a a kidonau a liemna ziekin Jezreel ah kisudam dingin a kileh kit a, zielai chun, Juda leng Jehoram chapa Azariah chu Jezreel ah Ahab chapa Jehoram damloh zieka va veh dingin a chieh suka.

⁷ Pathien in Joram vehthak a a um na chu Ahazia puksiet na ding in a mang ta a. Ahazia zie a a um lai tak chun, a mah leh Joram chu Nimshi chapa Jehu chun a hun do ta a, zie pa chu Lalpa’n Ahab inkawte sukmangthaina dinga a guot chu ahi.

⁸ Chun, Jehu’n Pathien vaihawm sak na dinga lengte a do lai chun, Juda lawiupa te leh Ahazia suohpihte chate hawn Ahazia kitawnpihte chu a mu tau a. Jehu chun a bawn un a that ta a.

⁹ Ahazia chu a hawl viel u a, tichun, Samari khuo a kisel chu a mu tau a, Jehu kawmah a pui u a, a that tau hi; Himahlele a luong chu a pu Jehoshaphat, a thih chan a Lalpa nasem sek pa ziek chun a vuih thawh tau a. Ahazia inkawte leng gam vaihawm thei ding khatchale a hinghawih puou hi.

Juda gama Lengnu Athali

¹⁰ Leng Ahazia nu Athalia chun a chapa thih thu a het phet chun leng insung mi phawt chu thah ding ti’n thu a pie ta a.

¹¹ Ahazia chun suohpih numei khat a nei a, Jehosheba ahi a, thiempu Jehoiada tawh kichêng ahi. Amahnu chun Ahazia chapa te lak a khat Joash chu leng chate lak apat chun a gudawk a, tichun a enkawl ding tawh zâlkhun pindan a chun a selgu ta a, (amah chu Ahazia suohpihnu ahi) Athalia muh theih loh dingin a selguu a, tichun, amah chu a that ta puoi.

¹² Chun, amau kawm achun a uma, amah chu kum gup sung Pathien in ah a kisel a, tichun, Athalia chun gamsung achun vai a hawm tai.