2 KHANGTHUBU 21 - PATHIEN LEKHABU THIENGTHO (BSI)

¹ Chun, Jehoshaphat chu pulepate kawm achun a ipmu a, David khawpi a a pilepute thân achun a vui tau a, a chapa Jehoram chu a tha sang in a lal ta a.

Juda Leng Jehoram

² Juda leng Jehoshaphat chapa Jehoram chun chapa gup a nei a; Azariah te, Jehiel te, Zekaria te, Azariah te, Mikael te, Shephatia te ahiu hi.

³ A pau in thilpiek lopi tak tak dangkaguo te, sana te, thil mantam taktak te, Juda gam a kulh nei khuo haw a pie a. Himahleh Jehoram chu a cha upapen a hih ziekin, a thasang in a siem a.

⁴ Khutichun Jehoram in a pa gam a luoh phet in, a suohpih te chengcheng chemzâm in a that vek a, Israel te lak a lawiupa tamtak te tawh a that ta a.

⁵ Jehoram chu kum sawmthum leh nih ahih in a lal pan a; Jerusalem ah kum giet a lal hi.

⁶ Israel lengte thil gilo hih chu a entawn a, Ahab chanu chu a kichênpih a, Lalpa mit muh a thil phalo chu ahih ta a.

⁷ Himahleh Lalpa David suon vaihawmna chu a hihsie nuom puoi, David kawma thugawlh siem a, na suonte chun vai hun hawm zel un au a na tih tâk ziekin.

⁸ Jehoram vaihawm lai in Edom te Juda te apat in a hel u a, lal gam a kineih chuom tau a.

⁹ Tichun Jehoram chu a milien te tawh a kangtalai chu mite tawh a kipan dawk u a, Edom te a va do tau a. Zie tak achun Edom sepaih ten a huol kimvel khum tau a, himahleh zan lai chun a na suokcha thei tau a.

¹⁰ Khutichun, Edom te chu tuni chan hin Judate chungah a hel zing tau hi; chun, Lalpa a pileputeu Pathien chuh a kiheimang san ziekun, zie hun lai mah chun Libnah khuo chule a chung ah a hel ta a.

¹¹ Juda tânggam te a chun milim pathien hona munte a sa a, Juda mite leh Jerusalem a mite chu Lalpa chunga thil gilo hih dingin a puimang ta a.

¹² Thiemgau Elija chun hiti hin Jehoram chu lehkha a thak a; “Na pu Asa te leh na pa leng Jehoshaphat lampi hawhte chu zui lo a, na um ziekin nang hun suonpa David Pathien chun mawh a hun chan na hi.

¹³ Israel lengte lampi na hawh a, Ahab leh a suonte’n, Israel chate Pathien a ginumlo dinga a puih mang guol a, Juda te leh Jerusalem a mite Pathien a ding a ginumlo dingin na puimang zaw ta a. Nang sanga phazaw na suohpihte nasan na that a;

¹⁴ Zieziekchun, Lalpa’n na mipite leh, na chate, na zite, leh na neih chengcheng chu hipi’n gawt in a.

¹⁵ Nang ngêi le gil natna nasatak in hun gawt intin, a ni a ni’n gim deuh deuh inla,” a ti a.

¹⁶ Khutichun, Ethiopia te naih a cheng, Philistia mite leh Arabia te lungthim chu Jehoram do dingin Lalpa’n a chawktho a.

¹⁷ Judate a va do tau a, leng in te a luh u a, leng zi leh a chate cheng a cha naupang pên Jehoahaz tihloh chu a puo mang vek tau a.

¹⁸ Ziehaw chengcheng nung chun Lalpa’n leng chunga chun gil natna nasatak a hun tunsak ta a.

¹⁹ Kum nih sung chu awl awl in a na deuh deuh ta a, atawp in lungkham tak in a thi ta a. A suontute’n a hih bangin, amah sûnna chun a mite chun meipi a tik puou hi.

²⁰ Jehoram chu kum sawmthum leh nih a hih in a lal pan a, Jerusalem ah kum giet vai a hawm hi. A thih phetin kuomah a it a um puou ui. David khawpi ah vuih in a um a, himahleh lengte thân a vang vuih in a um puoi.