2 KHANGTHUBU 2 - PATHIEN LEKHABU THIENGTHO (BSI)

Temple sa dinga a Kiguotna

¹ Tichun, leng Solomon in Lalpa hona ding leh a mah a dingin leng In sa dingin a kisa ta a.

² Khutichun, thil gik puo mi singsagih leh tâng a thing tan ding singgiet leh amau haw veng dingin mi sang thum leh zagup a guot a.

³ Chun, amah chun Tura leng Huram kawmah, “Ka pa David in sakna dinga sidar thing haw na na tuok sak bang khan kei le ei hun tuok sak ah aw.

⁴ Ngaitie, Lalpa ka Pathien limbawlna ding leh, gimlimhaw a masanga hâlna ding leh, chângthâk kawih zing na ding leh, zing leh nitâk ale, chawlhni haw ale, tha thak haw ale, Lalpa I Pathien uh kut haw a hâlmang thilpiek na dingin, Ho-In sa ding ka hi a. Ziehi Israel te kawma kumkhuo a hih dinga thupiek chu ahi a.

⁵ Ka temple sak guot hi lopi tak ahi a, I Pathien u hi Pathien dang chengcheng sang a lopi zaw ahi.

⁶ Kuoma’n Pathien a dingin temple sa thei tak tak puo’n au, van sangpen khun le a dawlloh ziek in. Pathien kawma gimlim hâl na ding tihloh ngâl, amah a dingin Ho-In bangti’n ka sa thei dem?

⁷ Khutichun, Judai gam leh Jerusalem a mi khutthiem te ka pa David in a na gawihsa haw, tu a ka kawma um haw laka sem dingin dangkaguo te, sumeng te, thik lam khawihthei, puon sandup te, san dang te, a dumte siem thiem, bang hitalele hih thei mi khat ei hun sawl sak ah.

⁸ Lebanon apat Sidar thing te, châk thing te, algum thing te le ei hun thak in; na mite chu Lebanon thing phuk a thiem ui tih ka he ngâla,

⁹ thing tamtak ei guonggalh sak dingin ka mite chu na mite tawh um untin; In ka sak ding chu lopi tak leh maktak hi ding ahi ngâl a.

¹⁰ Chun, na mi thing sui haw chuh changbuong tehna singnih dim tawh, buhman tehna singnih dim leh uain bath singnih dim leh, thau bath singnih dim na pie’ng ka,” ti’n mi a sawl a.

¹¹ Tichun, Tura leng Huram chun, “Lalpa’n a mite a hehpih ziekin a leng ding u a ahun siem na hi” ti’n Solomon chu lehkha’n a dâwng a.

¹² “Lalpa Israel te Pathien, lei leh van siem pa, leng David chapa ching tak pie, lemhetna leh hetthiemna a a thuom a, Lalpa a ding leh a mah dinga In sa ding piepa chu pahchak in um hen.

¹³ Mi khutthiem, chitna leh hetna nei, a min Huram ka hun sawl hi,

¹⁴ Dan suona numei khat cha ahi a, a pa chu Tura khuo a um, sanate, dangkaguote, sumeng te, thingte, suongte, puon sandupte, a dumte, patngatpuonte, san dangte haw siem thiem, suktuoh thawh bang cheng le thiem, thil tin cheng thiem a hi a; mi khutthiem haw leh na pa David mi khutthiem haw lak achun sep sak in.

¹⁵ Khutichun, buhte, thau te, uain te, ka pu’n a gen haw chu a suokte hun thak hen;

¹⁶ tichun, kei un Lebanon thing chu na deih zat zat a na phuk ung ka ting, tuisuohgiet ah Joppa chan in hun tawl sak ung kau. Zie tak apat chun nang Jerusalem ah puo to inla,” a ti a.

Temple Sakpatna

¹⁷ Solomon in Israel gam a a pa David in zawhsa, nam dang mi chengcheng chu a sim a, nuoi khat leh singnga leh sang thum leh zagup ahiu hi.

¹⁸ Tichun van gik puo mi singsagih leh tâng a thing phuk mi sing giet leh, mipite sep dan hilh ding sang thum leh zagup a guot ta a.