2 KHANGTHUBU 17 - PATHIEN LEKHABU THIENGTHO (BSI)

Juda leng Jehoshaphat Vaihawmna

¹ Jehoshaphat chu a pa Asa thasang chun leng in a pang ta a, Israel mite do dingin a kisuhat a.

² Chun, Juda gama kulh nei khuo chengcheng ah sepaih te a kawih a: Juda gam leh a pa Asa’n a na lak Ephraim gama khuo haw achun gâl veng mite a kawih a.

³ Khutichun, A pu David lampi chu a hawh a, Baal na sem lo a a um ziekin Pathien in Jehoshaphat chu a vangsak a.

⁴ Himahleh, a pileputeu Pathien hawl a, Israel mite hih bang hilo a a thupiek te a zawp zawk ziekin.

⁵ Zieziekchun Lalpa’n a gam chu a khut ah a hihdet a, tichun Juda gama mi chengcheng in Jehoshaphat chu kipahman te a hun pieu a, a hung neizo in a hung lopi mah mah a.

⁶ Chun, a lunggil Lalpa lam a nga a; chun, Juda gam a pata milim hona munte leh Asher pathien limte a paihmang vek a.

⁷ Chun, kum thum a lal kum in, a milien Benhail te, Obadia te, Zekaria te, Nethanel te, Mikaiah te chu, Juda gam khawpi haw a mite sinsak dingin a sawldawk a.

⁸ Chun, Levi mi, Shemaiah te, Nethania te, Zebadiah te, Asahel te, Shemiramoth te, Jehanothan te, Adonijah te, Tobijah te, Tob Adonijah te, Levi te a tel u a, chun, thiempu nih Elishama leh Jehoram le a tel ui.

⁹ Khutichun, Lalpa dân bu a chawi u a, Juda khuo chengcheng a tawh u a, mite a sinsak u a.

Jehoshaphat Thilhih theihna

¹⁰ Chun, Juda gam vel chengcheng a mite chun Lalpa a lauh ziekun Jehoshaphat chu a do ngam puou hi.

¹¹ Chuleh, Philistia, mi khenkhat in Jehoshaphat chu kipahman a hung pieu a, sieh dingin dangkaguo te le a hung pieu a; Arabia mite’n le gan hawn, belamchal sangsagih leh zasagih leh kêlchal sangsagih leh zasagih a hun kaihsak u a.

¹² Tichun Jehoshaphat chu a hung lopi mah mah ta a, Juda gam ah kulh te leh thil kawihkhâwm na te a siem a,

¹³ Juda gam khuo haw chu nek leh châk kawihna dingin a siempha a; chun, sepaih hangsan haw chuh Jerusalem ah a kawih a.

¹⁴ Chuleh, ziehi a pulepateu dungzui a kisim dân chuh ahi: Judate laka sepaih sang chunga hotu lienpen Adnah, chun, mihat hangsan nuoithum a puihuoi a.

¹⁵ a banah sepaih hotu Jehohanan ahi a, amah chun nuoi nih leh singgiet a lawi a;

¹⁶ chun, a bân kit ah Zikri chapa Amasiah chu kiphal taka Lalpa dinga kipie’n, mihat hangsan nuoinih a lawi a;

¹⁷ Chun, Benjamin inkuote mihat hangsan Eliada’n thal leh phaw mang mi nuoi nih a lawi a;

¹⁸ a bân ah Jehozabad in galkap dinga kiguo zosa zing nuoikhat leh singgiet a lawi a.

¹⁹ Ziehaw chengcheng hih Juda gama kulh nei khuo a leng in a kawih te tih loh a lengpa kawma um zing te ahiu hi.