2 KHANGTHUBU 13 - PATHIEN LEKHABU THIENGTHO (BSI)

Abija’n Jeroboam a Dona

¹ Jeroboam kum sawmlegiet a lal kum, in Juda te chung ah Abijah a lal pan a,

² Jerusalem ah kum thum a lal a, A nu min Mikaiah ahi a, Gibeah mi Uriel chanu ahi. Abijah leh Jeroboam kal achun kido na a hung um ta a.

³ Abijah chun kido thiem, sepaih hangsan nuoili a nei a; chun Jeroboam in mihat hangsan chiet nuoigiet kitieng in a na do a.

⁴ Chun, leng Abijah chu Zeremian tâng achun a dinga, zie chu Ephraim tâng ahi a, Nang Jeroam leh Israel mi cheng cheng in ei na ngaitha tiem u, a ti a.

⁵ “Lalpa Israel te Pathien in Israel gam chu David leh a chate kawmah thuthun in kumkhuo a din a piei tih hi helo na hiu maw?

⁶ Himahlele Nebat chapa Jeroboam, a pu Solomon chunga hel dingin a hung kipan mai a.

⁷ Chun, Rehoboam chu chapang, lungthim dâwng ahih lai a a na do theih loh lai khan Solomon chapa Rehoboam kalh in mi manloh te, Belial chate a kikhawm u a.

⁸ “Tuhin, Lalpa’n David suonte kawma a piek, leng thuneihna chu do na guou a, sepaih tamtak na nei u a, Jeroboam in na pathien uh a ding a a siem sana bâwngchal chule na nei ngêi u a.

⁹ Aron suon Lalpa thiempute chu na nawhdawk u a, Levi te chuh na nawhmang u a. Nam dang te hih guolin a mun luoh dingin thiempute na kisiem u a. Kuole, bâwng chal tawh ahim, belam sagih ahim tawh hung taphawt te chu na pathien teu dinga thiempu hi dingin kawih chuom theih ahi zel u a.

¹⁰ “Himahleh kei hawn vang, Lalpa ka Pathien uh na ka sem u a, amah chu ka nungngatsan puou hi, Aron suon a thiempute chun na a sem u a, Levi te chun a panpih uh ahi.

¹¹ Amau chun zingkal leh nitâk cheng in Lalpa dingin hâlmang thilpiekte, gimlim te a hâl sek u a; dawhkân thiengtho chungah chângthâk thiengtho a kawih zel u a. Chuleh, sana thaumei kawihna a thaumei te nitâk lam chenga hâl dingin: Kei haw’n vang Lalpa ka Pathien uh thupiek chu ka zawp zing u a, himahleh, nang hawn vang amah chu na nungngatsan ui.

¹² Pathien chun ka mau pui in ka kawm u ah a um a, chun, Thiempute chu nang haw hun do dinga pengkun mût dinga kisazo san tak ahin aum ui. Aw Israel suonte, Lalpa na pileputeu Pathien chu do hiel kiu; zo lo hiel ding na hi ngâl u a,” a ti a.

¹³ Chun, zielai chun, Jeroboam chun a sepaih khenkhat chu Juda sepaih te na lambut ding chun nung lam ah a sawl a, a dangte chun malam ah a do u a.

¹⁴ Juda te chu a vak kilehhei u leh, gâl in a nung lam u leh a malam u ah a na um u a. Lalpa chuh a sam tau a, thiempu te chun pengkun a mût tau a.

¹⁵ Khutichun Juda te chuh a kiko zuoh zuoh u a; Abijah chun ma kai in a do u a. Lalpa’n Jeroboam leh Israel te chengcheng chu a guollah sak ta a.

¹⁶ Tichun Israel chate chu Juda te masang achun a taise tau a, Pathien in a khut u ah a pie tai.

¹⁷ Khutichun, Abijah leh a lawite chun nasatak in a that tau a: tichun, Israel mi teldawk chiet nuoinga a that ui.

¹⁸ Israel te chu Juda suonte chun Lalpa a pileputeu Pathien a a kingak ziekun a zo tau hi.

¹⁹ Abijah in Jeroboam sepaihte chu a delh a a khuo hawu a lak sak a, Bethel a khawpel haw tawh, Jeshanah a khawpel haw tawh, Ephron a khawpel haw tawh.

²⁰ Abijah vaihawm hun sungin Jeroboam in din dawk kitna a nei ta puoh a, atawp in Lalpa’n a gawta a thi tai.

²¹ Abijah chu vang a hung hât deuh deuh a. Zi sawmleli a nei a, chapa sawmnih leh nih leh chanu sawmlegup a hing hi.

²² Abijah chanchin dangte leh a um dân te, a thugen te chu thiemgau Iddo hilhchetna bu ah a chuong hi.