2 KHANGTHUBU 11 - PATHIEN LEKHABU THIENGTHO (BSI)

Shemaiah Hilhlawkna

¹ Chun, leng Rehoboam chu Jerusalem a tun in, Israel mâllam namte do a gam la kit ding in Juda leh Benjamin inkawte, mi hangsan chiet teldawk, nuoikhat leh singgiet zet a samkhawm a.

² Himahleh, thiemgau Shemaiah kawmah Lalpa thu a hungtung a,

³ Juda lengpa Solomon chapa Rehoboam kawmah leh Juda gam leh Benjamin gama Israel mi chengcheng te kawmah,

⁴ “Lalpa’n hiti hin a tii, ‘Na va chieh loh dinguh ahi, na suohpihteu le va do kiu: na In lam chiet u ah chieh kit u; zie hih keimah hih ahi’; ti’n gen ah,” a ti a. Khutichun Lalpa thupiek a zawp u a, Jeroboam do dinga a chieh guot u chu a vaikit tau hi.

Rehoboam in Kulh a Siemna

⁵ Chun, Rehoboam chu Jerusalem ah a um a, Juda gam ah kiven na ding khawpite a siem a:

⁶ Tichun, Bethlehem khuo te, Etam te, Tekoa te a tungdawk a,

⁷ Chun, Bethzur te, Soko te, Adullam te,

⁸ Gath te, Mareshah te, Ziph te,

⁹ Adoraim te, Lakish te, Azekah te,

¹⁰ Zorah te, Aijalon te, Hebron khuote; ziehaw chu Juda leh Benjamin gam a kulh nei khuo te ahiu hi.

¹¹ Chun, zie kulh haw chu a hihdet a, lawiupa te a kawih a, nek ding te, thaute, uain te a kawihkhâwm a.

¹² Chun, khaw chengah phaw te, tiengcha te, a kawih a, khuo dettak in a siem a. chun, Juda leh Benjamin gam chu a mah a ahi ta a.

Thiempu leh Levi te Juda Gam ah

¹³ Israel gamsung cheng a thiempu te leh Levi te chu a gam u apat chiet in Juda simlam achun a hung u a.

¹⁴ Levi te chun a gam u leh a umnau chu a hun pawtsan u a, Juda gam leh Jerusalem ah a hung u a: Lalpa dinga thiempu na sem lo dingin leng Jeroboam leh a chate chun amau chu a haihsak u a.

¹⁵ Tichun, amah chun, munsang a ding leh thitha hona ding leh bâwngno lim a siemte ding chun thiempu a guot ta a.

¹⁶ Khutichun, amau haw nung chun Israel nam laka a lunggil u a Israel te Lalpa Pathien hawl taphawtte chuh a pulepateu Lalpa Pathien kawma kithawi dingin Jerusalem ah a chieh uh a.

¹⁷ Khutichun Juda gam chu a sudet u a, kum thum sung chu Solomon chapa Rehoboam chu a pan pih u a: kum thum sung chuh David leh Solomon lampite chuh a zuih ziekun.

Rehoboam Inkuon

¹⁸ Chun, Rehoboam chun David chapa Jerimoth chanu Mahalath zi’n a nei a, zie chuh Jessai chapa Eliab chanu Abihail chanu a hi:

¹⁹ amah apat chun chapa thum a nei a Jeush te, Shemariah te, Zaham te.

²⁰ Chun, amah nung in Absalom chanu Maakah a nei a; a mah chun Abijah te, Attai te, Ziza te, Shelomith te a hinsak a.

²¹ Chun, Rehoboam chun Absalom chanu Maakah chu a zite leh a meite chengcheng lak achun a hehpih chuom diek a; zi sawmlegiet leh mei sawmgup a nei a, chapa sawmnih leh giet leh chanu sawmgup a nei hi

²² Chun, Rehoboam in Maakah chapa Abijah chu lawiupa’n a siem a, amah chuh lenga siem ding dân a ngaihtuoh a.

²³ Khutichun, chingthei takin a hun hih a, a chapa te chengcheng chuh Juda gam leh Benjamin gam chengcheng kulh nei khuo haw ah a um zak sak suok a; nek ding tamtak a pie a. Chun a mau dingin zi tamtak a hawl sak hi.