2 KHANGTHUBU 10 - PATHIEN LEKHABU THIENGTHO (BSI)

Mâllam Namte Helna

¹ Chun, Rehoboam chu Shekem khuo ah a chieh a; Israel te chengcheng le Shekem khuo a lenga siem dingin a chieh ta ngâl u a.

² Nebat chapa Jeroboam, leng Solomon lau a Aigupta gama taimangpa chun zie thu chu a het in In lam ah a vaikit ta a.

³ Mâllam namte chu a sawl u a, a va sam u a; khutichun Jeroboam leh Israel te chengcheng a hung u a, Rehoboam kawmah,

⁴ “Na pa khan namkawl puokgik takin ei na puoksak a, zieziekchun na pa’n ei gawih gimna leh a puokgik tak ka chung uh a a ngak hi ei sukzang sak inla, tichun na mite dingin um ung kau,” ti’n a gen u a.

⁵ Rehoboam in a kawm u ah, “Ni thum nung leh hungkit zawu in,” a ti a. Tichun mipite chu a chiehdawk tau hi.

⁶ Leng Rehoboam in, “Zie mipite dawnna ding hin bang nei lemguotpih ding u?” ti’n a pa Solomon damlai a a kawma um sek upate chu a dawng a.

⁷ Amau chun a kawmah, “Zie mipite hi na lungsiet a, na suk kipâk a, a kawm u a thu phatak te na gen chun kumkhuo’n na mite hin au,” ti’n a gen u a.

⁸ Himahleh, upate lemguotpih na chu a zawp puoh a, amah guolpih tangval haw, a kawma um sek haw chu a dawng zaw ta a.

⁹ A kawm u ah, “Zie mipi te, ka kawma, ‘Na pa’n puokgik ka chung u a a ngak hi ei sukzang sak in’, ti a ngente hi ka dâwn dân ding bang nei lemguotpih ding u?” a ti a.

¹⁰ A guolpih tangval te chun a kawmah, “Zie mipite, ‘Na pa khan ka puok uh ahih gik sek bêk a, nang in ei sukzang sak in,’ na kawma tite kawm achun, hiti hin ti’n la, tihin a kawma u ah gen in, ‘Ka pa kâwng sangin ka khutme a lien zaw a.

¹¹ Ka pa khan puokgik tak a hun na puoksak a, ken chu na puokgik uh behlap ding ka hi: ka pa’n zêpna’n a hun na sawi a, ken chu vang aikawm a hun sawi ding ka hi,’ ti’n,” a tiu a.

Lalgam Kikhenna

¹² Khutichun Jeroboam leh mipite chengcheng chuh leng in, “Ni thum nung leh hungkit un,” ti a a hilh bang khan ni thum ni’n Rehoboam kawmah a va chieh u a.

¹³ Leng chun khauh takin a mau chu a na dâwng a, leng Rehoboam in upate lemguotpih kha a zui ta puoh a,

¹⁴ Tichun, tangval te lemguotpih bangin, “Ka pa’n na puok uh a na hihgik a ken hun behlap sak ding ka hi; ka pa’n zêpna’n a hun sawi sek a, ken vang aikawm a hun sawi ding ka hi,” a ti a.

¹⁵ Khutichun leng in mipite thugen a zawp ta puoh a: Lalpa’n Shiloh mi Ahijah mang a, Nebat chapa Jeroboam kawma thu a na gen khah a sukbutit theih na ding in; zie chuh Pathien apat a hung kipan ahi.

¹⁶ Tichun, leng in a thuu a zawp puoi tih Israel mipite chengcheng in a het un mipite’n, “David ah chanvo bang a I neih uh? Jessai chapa ah go luoh ding le I nei diek puou hi: Israel mite, na puon-In lam chiet u ah chieh u; David, na inkuon ngaihtuoh mai in,” ti’n leng chu a dâwng u a. Khutichun Israel te chengcheng chu a puon-In lam u ah a chieh tau hi.

¹⁷ Tichun, Israel suon, Juda khawpi a chêngte cheng chauh chunga lenga um dingin Rehoboam chu a taihsan tau a.

¹⁸ Tichun, leng Rehoboam chun na sema pawnggawihte lawiupa Hadoram a sawl a; amah chu Israel chate chun suongin a na sep u a, a thi ta a. Leng Rehoboam chu Jerusalem khuo a taih guon a kangtalai ah a chuong pai zieng a.

¹⁹ Khutichun mâllam Israel te chu tuni chanin David inkawte chungah a hel tau hi.