2 JOHAN 1 - PATHIEN LEKHABU THIENGTHO (BSI)

Chibai bûkna

¹ Upa keimah apat, Numei pha kiteng nu leh, a chate, tih tak zet a ka lungsiet te kawmah. Kei mai hilo in, thutak he ta chengin le a hun lungsiet uh ahi,

² thutak chuh keimau a a um zing ziekin leh, kumlekhuo a le a um zing ding ziekin.

³ Pa Pathien leh, Pa, Chapa Isu Krista kawm apat, hehpihna te, zahngaihna te leh chamna te chuh thutak leh lungsietna’n I kawm u ah um hen.

Thutak leh Lungsietna

⁴ Pa kawm apat thupiek I muh guol uh khan, na chate khenkhat thutak a um ka muh ziekin, ka kipâk ten mai hi.

⁵ Khutichun, numei pha; I bawn un kihehpih tuoh chiet hitiu. Ziehi, thupiek thak, na kawmuh a ka hun zik ahi puoh a; a tung apat a thupiek I neihsau khah ahi zawi.

⁶ Chun, ziehi hehpihna ahi; amah thupiek dungzuia I um uh hih. Thupiek, a tung apat na zak guol uh chuh ziehi ahi; na bawn uh a lungsietna a na hin zing dinguh chuh.

⁷ Themtu tamtak, Isu Krista chuh taksa pu’n a hung hi, tih panpih lote khah, khawvel ahin a hung suok dawk ta ngâl uh a. Khutibang mi chuh ahi, milem leh Krista dodilpa chuh.

⁸ I sep dawksa chenguh khah, mansak lo a, kipahman chuh a bukima I muh theih zawkna dingun, kivêng phau in.

⁹ Kuole, Krista sinsakna thu a um zing lo a, chieh khel chun, Pathien a nei puoi. Kuole, zie sinsakna thu a um zing vang chun. Pa leh Chapa chuh a neih thuoh ahi tai.

¹⁰ Kuole, zie sinsakna thu chuh hun keng lo in, na kawm u ah hung leu, na In u ah tun sak kiu inla, “Na chunguh ah lungmuonna um hen,” ti’n a kawm u ah gen diek kiu.

¹¹ Kuole, thamuonna deihsak pa chuh, a thil phalo hih achun a tel ahi.

Thu Tawpna

¹² Na kawm u ah thu tamtak gen ding ka neih ziekin, lehkha leh lehkhatui maia zik ka nuom puoi; ka lawp uh a bukim theihna dingin, na kawmuh a hung a, kimaichangtuoh a holim ka kinep zawk ahi.

¹³ Na suohpih deihtak nu chate hin a hun chibai ui.