1 TIMOTHE 2 - PATHIEN LEKHABU THIENGTHO (BSI)

Sapchuom a Pathien Hona

¹ Khutichun, amasapen in, thil nget pauchamna te, pauchamna himhim te, kipauchamsakna te, kipah thugenna te, mi chengcheng dingin, Pathien kawma latsak dingin ka tîl na hi.

² Lengte leh panmun liente chengcheng dingin le; Pathien khawksak leh, kilungtuok a, lungmuong taka I khawsak theihna dingun.

³ Zie chuh, ei hukdampau Pathien mitmuh in, a pha’n, pawm tâk ahi;

⁴ amah chun mi chengcheng hukdama um ding leh, thutak he dingin a deih ahi.

⁵ Pathien khat mai a um a; Pathien leh mihiemte kal a palai le khat mai a um a; amah chuh mihiem, Krista Isu,

⁶ Mi chengcheng tatna dinga kipiepa chuh ahi.

⁷ Zie taksanna thu leh thudik chuh, Jentel te kawma phuong dinga sawlchak leh sinsak dinga guot ka hi. Lepchieh thu gen ka hi puoh a, thudik ka gen zawk ahi.

⁸ Khutichun, pasal haw’n, sapchuom nasepna achun, khut thiengtho tungin, lungna lo leh kiniel lo in paucham leu ka deih ahi.

⁹ Khutibang mah in, numei haw le, hawihtak a um a, a silhlechen thuu a chuh chingthei taka um a; kitûp taka kichei a, samphek ahim, sana kicheinate ahim, tuikawkchang mantam ahim; puon mantam tak haw a kichei lo in,

¹⁰ Numei Pathien khawksak kitite chuh, nasep phatin kizêm leu ka nuom hi.

¹¹ Numeite chun kingainiem tak leh thipkêi in sin u hen.

¹² Numei in a sinsak ahim, pasal chunga thu a neih uh ahim chuh ka phal puoi, thipkêi in um zawu hen.

¹³ Adam chuh siem masak ahi a, zie nung chun Evi chuh siem ahi ngâl a.

¹⁴ Adam chuh thep in a um puoh a, numei chuh thep in a um a, tichun, Pathien dân chuh a bawhsie ta a.

¹⁵ Himahlele, numei chuh, taksanna leh, hehpihna leh thienthona nei a, lungthim thieng tak tawh mahni kithununa a um zing u chun, cha neihna ah hukdam in um un au.