1 SAMUEL 9 - PATHIEN LEKHABU THIENGTHO (BSI)

Saul Lenga têlna

¹ Benjamin gama Benjamin suon pasal khat mihat hangsan tak hi a um a amin chu Kish ahi a, amah chu Abiel chapa ahi a, amah chu Zeror chapa ahi a, amah chu Bekorath chapa ahi a, amah chu Aphiah chapa ahi a, Benjamin suon mi neizo tak ahi a;

² Chun, amah chun chapa a nei a, a min chu Saul ahi a, tangval melhawih tak ahi a, Israel te lak ah amah sanga melhawih zaw himhim a um puou a: kuomah a liengko khel le a um puou hi.

³ Chun, Saul pa, Kish sabiltung haw chu a mang u a. Chun, Kish chun a chapa Saul kawm achun, “Kipan inla, suokte laka khat pui inla, sabiltung haw va hawl tie,” a ti a.

⁴ Khutichun Ephraim tânggam haw chu a tawh viel a, chun, Shalisha gam haw le a tawh suok a, himahlele a mu puou a: tichun Shalim gam a tawh viel kit u a zie chun le a mu puou a: chun, Benjamin mite gam a hawl kita, himahlele a mu diek ta puou hi.

⁵ Chun, Zuph gam a tun u chun Saul chun a kawma um a suokpa kawm achun, “Hung tie, vaikit mai hiti, dân leh ka pa’n sabiltung haw buoipih ta lo in ei te nih ei na lungkham pih zaw khâna,” a ti a.

⁶ Chun, suok chun a kawmah, “Ngaitie, zie khuo ahin Pathien mi a um a, mi zahum tak ahi a; a gen taphawt chu ahung tung ngêi ngêi sek ahi: hung tie, zie chun chieh hiti, I chiehna ding haw ei na hilh thei kha mawh die,” a ti a.

⁷ Khutichun, Saul chun a suokpa kawma chun, “ Ahih leh, va chieh ta leh hing zie pa chu banga I chawihsak ding? I bawma chângthâk lah a bei ta a. Pathien mi chu thilpiek piek ding aum ta hiel puoi: Bang I nei die aw?” a ti a.

⁸ Chun, suokpa chun Saul chu a dawng kita “Ngaitie dangka sekel mun li a khena mun khat chu ka nei a; zie chuh Pathien mi chu pie’ng ka I chiehna ding lam ei hilhna dingin” a ti a.

⁹ (Tuma lam chun Israel gam ah Pathien thil dawt nawp a neih tieng u leh, “Hung tie, mutheipa kawmah chieh hiti,” a kiti sek uh a: tulai a Thiemgau a tih sek u hih tuma lam chun Mutheipa a tih sek uh ahi).

¹⁰ Khutichun Saul chun a suokpa kawm achun, “Apha khel khel chu, va chieh hiti aw le,” a ti a. Khutichun, Pathien mi umna khuo achun a chieh tau a.

¹¹ Khuo zawt tohna a a chieh toh lai u chun nungak tui khai dinga hung pawt haw a vak muu a, a kawm u ah, “Zie hin mutheipa chu a um hi?” a tiu a.

¹² Chun amau chun, “A um hi, na masang chau a kha hung ahi. Kin un; mipite munsang a a kithawih ziek uh a tu mah mah a chu khuo a hi hung ahi:

¹³ Khuo na lut lut u leh munsanga an ne dinga a chieh masang in vamu zieng inlau; kithawihna chu a vangsak ding ahih ziekin ahung masang sieh mipite’n an nelo ding ahiu hi; zie nung chuleh a mi chielteu chun a nek sek uh ahi. Zieziekchun chieh to meng leu chin, va mu pai zieng inlau,” a tiu a.

¹⁴ Tichun khuo achun a chiehto tau a; chun, khuo a lut phet un, ngaitie, Samuel chu tawh a kituok u a, munsanga chieh ding ahi a.

¹⁵ Chun, Saul hung masang ni khat achun Lalpa’n ziehi Samuel kawma chu kilak in zie thu hi ana hilh a,

¹⁶ “Zing leh tuhun vel hin Benjamin gam a pat in pasal khat hun sawl ding ka hi a, ka mi Israel te chunga lawiupa hiding in thau nuh in na tin, amah chun Philistia mite khuta pat in ka mite hukdam ina: a kiko thawm uh ka kawm ahung tun tâk ziekin ka mite chu ka ngaihsak ahi,” ti’n ana gen ta a.

¹⁷ Chun, Samuel in Saul a muh phet chun Lalpa’n a kawmah, “Entie, na kawma ka mi gen pa khah; amah hin ka mite chungah thu nei ina” a ti a.

¹⁸ Khutichun Saul chun kulh kawt ah Samuel chu a va naih a, “Mutheipa In chu khawia um ahi, nei hilh tie?” a ti a.

¹⁹ Chun, Samuel chun Saul chu a dâwng a, “Kei hi mutheipa chu ka hi; ka ma ahin munsang lam zuonin chieh inla, tuni hin ka kawma an ne ding na hi; chun, zing zingkal leh hun chieh sak ing ka ting, na lungthima um chengcheng le hun hilh ing ka.

²⁰ Chun, na sabiltung ni thum mang ta haw khah lungthek in nei ta ki’n, a mu tau hi. Israel te’n a deih ten u chuh kuo chunga chu ahim? Nang chung leh na pa inkawte chungah hilo ahim?” a ti a.

²¹ Chun, Saul chun a dâwng a, “Israel nam laka a neupen, Benjamin nam hilo ka him? Chun, ka inkuon u le Benjamin nam a inkuon chengcheng laka neupen hilo ahim? Khutichuh hi ngâl a bang zieka ti a chu ka kawma thu gen na him?” a ti a.

²² Chun, Samuel chun Saul leh a suokpa chu a pui a, malzin pindan achun a pui luta, a mi chiel teu, sawmthum vel lak achun mun zah-um pên ah a chut sak a.

²³ Chun, Samuel chun anhuonpa kawm achun, “Na kawihchuom ding ti a na kawma sa chan ka hun piek kha hun la tie le,” a ti a.

²⁴ Khutichun, anhuonpa chun amal leh achung a um chu ahun la a, Saul ma achun ava lui a. Chun, Samuel chun, “Entie, ka na kawihchuom, chu na ma a kilui chu ahi! ûm inla neh le! ‘Mite ka chiel khawm ie,’ ka tih lai apat kha zie hun a dinga hi nang dinga ana kikawihchuom ahi,” a ti a. Khutichun zie ni chun Saul in Samuel tawh ankuong a um khawm tau a.

²⁵ Chun, munsang apat khuo a a hung suk phet u chun Samuel in In chung ah Saul a holimpih a, zie chun zâlkhun a dawh sak u a, ipmu dingin a kuol a.

²⁶ Chun zingkal vaima takin a tho u a: chun tihi ahi a thingzangvak velin In chunga Saul chu Samuel in a sama, “Ka hun thak dawk theihna dingin tho in,” a ti a. Khutichun Saul chuh a tho a, a nih u chun a chieh dawk u a amah leh Samuel chuh a pawt tau a.

²⁷ Khawpi pawlama a chieh suk lai u chun Samuel chun Saul kawmah, “Suokpa hi I ma lam ah chieh sak in (amah chu a chieh ta a) nang vang chu ding tadih inla Pathien thugen ka hun hilh theihna dingin,” a ti a.