1 SAMUEL 7 - PATHIEN LEKHABU THIENGTHO (BSI)

¹ Chun, Kiriath-Jearim khuo a mite chu ava chieh uh a, Lalpa bawm chu ava la to uh a, tâng chunga Abinadab In a chun a lalut uh a, a chapa Eleazar chu Lalpa bawm enkawl dingin a kawihchuom uh a.

Samuel in Israel te chunga Vaihawm

² Chun, hiti hih ahi a, Kiriath-jearim a thuthun bawm a um sung chu sawttak ahi a, kum sawmnih hiel ahi: chun, Israel phung cheng chengin Lalpa lam chu a lunggulh kit tau a.

³ Chun, Samuel chun Israel inkuonte chengcheng kawmah, “Na lunggil tak zet uh a Lalpa lam hung nga na hih takzet u chun, gamdang pathien haw leh Ashtaroth chu na lak uh apat kawihmang kei unla, na lunggil u chu Lalpa dingin guonggalh unla, Amah na mai sem un; tichun Philistia mite khut apat hin hun hukdawk ding ahi,” ti’n a gena.

Mizpah a Israel te Gitloh Kisikna

⁴ Chun, Israel te chun Baal haw leh Ashtaroth chu a kawihmang uh a, Lalpa na mai chu a sem tau a.

⁵ Chun, Samuel chun, “Israel te chengcheng chu Mizpah ah samkhawm unla, Lalpa kawmah hun paucham sak ing ka,” a ti a.

⁶ Tichun, Mizpah a chun a chieh khawm tau a, tui a khâi uh a, Lalpa ma achun a sungthau a, zie ni chun an a ngâwl uh a, zie tak achun, “Lalpa chungah I na gilo tau hi,” a tiu a. Chun, Samuel chun, Mizpah achun Israel te vai a hawm a.

⁷ Chun, Philistia te chun Mizpah a chun Israel te a kikhawm ui tih a het phet un Philistia lengte chu Israel te do dingin a kuon to uh a. Chun zie chuh a het phet un Israel te’n Philistia mite chu a lau u a.

⁸ Tichun, Israel te chun Samuel kawmah, “Philistia mite khut apat ei hukdam dinga Lalpa ka Pathien uh nei sap sak chu hai ki’n,” a tiu a.

⁹ Chun, Samuel chun belamno nawicheplai khat a la a, hâlmang kithawihna thilpiek dingin Lalpa kawmah a pie a: Israel te dingin Lalpa chu a sama; tichun, Lalpa chun a dâwng a.

¹⁰ Chun, Samuel in hâlmang thilpiek a piek lai tak chun Philistia mite chun Israel te chu do guon a hun naih uh a: himahlele, zie ni chun Lalpa’n Philistia mite chung achun nasatak in van a gitsak ta dul dul mai a, chun, a buoi chiei chuoi zieng tau a; Israel te ma achun a guollah tau a.

¹¹ Chun, Israel te chu Mizpah apat chun a pawt uh a, Philistia mite chu a delh u a, Bethkar nuoi a tun chan un a that zel uh a.

¹² Khutichun, Samuel chun suong a la a, Mizpah leh Shen kikala chun a phut a, “Hiti tieng hin Lalpa’n ei na panpih ahi” ti’n a min dingin Eben-ezer a sa a.

¹³ Khutichun Philistia mite chu a guollah tau a, Israel te gamsung achun a lut kit kha ta puou a; chun, Lalpa khut chun Samuel damsung cheng Philistia mite chu a dal zing ta a.

¹⁴ Chun, Philistia mite’n Israel te khuo a lak hawu chu Ekron apat Gath tiengin Israel te a pie kit uh a, Philistia mite khut apat a gamsung u chu Israel te’n a hukdawk u a. Chun Israel te leh Amor te kal ale chamna a um ta a.

¹⁵ Chun, Samuel chun a damsung chengin Israel te vai a hawm a.

¹⁶ Chun, kum cheng leh Bethel, Gilgal leh Mizpah hi tawh kuol in a um viel viel a; zie mun haw ahin Israel te vai a hawm sek hi.

¹⁷ Chun, a In umna mun ahih ziekin Ramah khuo achun a chieh kit zel seka; zie chun le Israel te vai a hawm a; chun, zie chun Lalpa dingin maichâm a siem a.