1 SAMUEL 5 - PATHIEN LEKHABU THIENGTHO (BSI)

Philistia Gama Pathien Bawm

¹ Khutichun, Philistia te chun Pathien bawm chuh a lau a, Eben-ezer apat Ashdod khuo ah a hun puou a.

² Chun, Philistia te chun Pathien bawm chuh a lau a, Dagon ho-in ah a la lut uh a, Dagon kieng achun a kawih tau a.

³ A zing zingkal mataka Ashdod khuo a mihaw chu a thawh phet u chun, ngaitie, Lalpa bawm ma achun Dagon chuh a maia lei si’n a na puk ta a! Himahleh, Dagon chuh a lau a, a umna mun mah ah a kawih kit uh a.

⁴ A zing kit mataka a thawh phet u chun ngaitie, Lalpa bawm ma achun Dagon chuh a maia lei si’n a na puktha kei kit ta a Dagon luchang leh a khut bawm nih tawngtha chu kawtbul tuohtil achun a na um lem lum mai ta a. Dagon taksa mai chu a ngâwng leh khut bawngsa chun a na um ta mai a!

⁵ Zieziekchun, Dagon thiempute ahim, a hihloh leh Dagon ho-in a hung sek haw himhim te’n le Ashdod khuo a kawtkhak bul chu tuni tieng hin le a tawh ngam puou hi.

⁶ Khutichun, Lalpa khut chun Ashdod khuo a mite chu a delh gikten ta a, a chung u ah sietna a tunsak ta a, Ashdod khuo leh a kimvela khuo haw chu âkngawn natna’n a gawt ta a.

⁷ Khuti- chun, Ashdod khuo a mite chun zie chuh a het phet un, “Israel te Pathien bawm hi I kawm uh ahin um zing kihen, I chung u leh I pathien uh, Dagon chunga a khutthak ana taluoi” a tiu a,

⁸ Khutichun Philistia lengte chengcheng chu a samkhawm u a, a kawm u ah, “Israel te Pathien bawm hi bang lawh ding I hi tau em?” a tiu a, Chun, Gad khuo mite chun, “Israel te Pathien bawm chu kei uh kawmah puoklut hi hen” ti’n a dâwng uh a. Tichun Israel te Pathien bawm chu zie chun a chawn tau a.

⁹ Chun, hiti hi ahung hi a, khutia a chiehpih lai u chun, Lalpa khut chun khuo chu a hun subuoi ta a, khuo a mi haw chu alien aneu in a gawt a, âkngawn natna hi a lênsak ta a.

¹⁰ Khutichun Pathien bawm chu Ekron ah a thak dawk tau a, a vatun phetin Ekron khuo mite chu “Israel te Pathien bawm chu eihaw leh I miteu sulum dingin I kawm u ah ahun puo tau hi” ti’n Ekron khuo a mite chu a kiko zak tau a.

¹¹ Khutichun, Philistia lengte chengcheng chu a samkhawm u a, “Israel te Pathien bawm hi sawlmang unla, keihaw leh ka miteu ei suklup lohna dingin a umna mun mah akhan chieh kit hen” a tiu a. Khawpi sung pumpi achun thihna khawpa buoina nasatak a um a, Pathien khut chun zie khuo chu a delh gik ta ngâl a.

¹² Chun, a thilo sun haw chuh âkngawn in a nau a; chun zie khawpi kahlemau git chun van a thawng hiel hi.