1 SAMUEL 4 - PATHIEN LEKHABU THIENGTHO (BSI)

Philistia te’n Pathien Bawm a Lâknau

¹ Chun, Samuel thu chu Israel te chengcheng lak ah athang suok ta a. Chun, Israel te chu Philistia te do dingin a kuon dawk u a. Eben-ezer kieng ah panmun a khawh u a; chun Philistia te chun Aphek ah panmun a khawh u a.

² Chun, Philistia te chu Israel te ana nang dingin a kithehzak u a: chun, a kido phet u chun Philistia te ma achun Israel te chu a guollah tau a, kidona muna chun sepaih sangli vel a that u a.

³ Chun, mipite chu a giehna mun u-a a va chieh phet un Israel upate chun, “Bang zieka tunia hi Philistia mite ma a Lalpa’n ei guollah sak ahi die aw? I kawm u a uma I melmateu khut apat ei humbit dingin Shiloh apat Lalpa thuthun bawm chu va lai tiu” a tiu a.

⁴ Khutichun mipite chun Shiloh ah mi a sawl u a, zie apat chu Cherub te chunga chu sepaihte Lalpa thuthun bawm chu ava la tau a: chun, Pathien Thuthun bawm a laknau achun Eli chapate nih Hophni leh Phinehas le a tel u a.

⁵ Khutichun Lalpa thuthun bawm a giehmun uh ahung tun phetin Israel te chengcheng chu ngeih tak in a kiko zuoh zuoh zieng u a; lei nasan le a thawnggi zung zung zieng a.

⁶ Chun, Philistia te chun a kiko git uh a zak phet un, “Hebraite giehmun a kikothawmpi hum hum khuh bang tihna ahi?” a tiu a. A giehmun u ah Lalpa thuthun bawm ahung tung hi tih ahun he tau a.

⁷ Chun, Philistia te chun a lau tau a, “Giehmun ah Pathien a hung ahi ta chu” a tiu a. “I chunguh agik ie! Tuma’n zie tawbang chu a um kha puoh ngâla.

⁸ I chungu agik ie! Zie pathien haw khut hattak apat chun kuon ei hukdawk thei ta die? Zie pathien haw chuh ahi Aigupta te gamthip a ana hihlum khah.

⁹ Aw, nang haw Philistia te haw, na suok u a aum guol u a khah Hebraite suok a na umloh na ding un hattak in um unla, kisupasal unla; kisupasal unla, do zel un,” a tiu a.

¹⁰ Tichun Philistia te chun a do u a, Israel te chu a guollah tau a, a puon-In lam chiet u ah a tai tau a tamtak a that u a, Israel te laka sepaih singthum a thiu hi.

¹¹ Chun, Pathien bawm chu a lâksak u a, chun Eli chapate nih Hophni leh Phinehas te chule a that tau hi.

¹² Sepaih haw lak a pat in Benjamin suon pasal khat a tai a, a puon haw ek zeng zung leh a luchang a lei bek neunou in zie ni mah mah chun Shiloh a va tung a.

¹³ Chun, ava tun chun ngaitie, Eli chun lamsîk a a chutna a chu kawmin ana gâl et zing a, Pathien bawm kha lauhthawngpih in a lungthim akilîng a. Chun, zie pa chu khawpi a tun a chanchin chu a gen phetin, a khawzang un a kiko vengvung zieng tau a.

¹⁴ Chun, Eli’n a kiko thawm u chu a zak phetin “Zie thawm gi vengvung khuh bang thu ahi ta?” a ti a. Chun zie pa chu kintak in ava chieh a, Eli chu ava hilh a.

¹⁵ Eli chu kum sawmkuo leh giet mi ahi ta a, a mit athim ta a, khuo a mu thei ta puoh a.

¹⁶ Chun, zie pa chun Eli kawm achun, “Sepaih haw lak apat hung ka hi, tuni hin sepaih haw lak apat hung tai ka hi” a ti a. Chun, amah chun, “Ka chapa, bangti’n thil a um hi leh?” a ti a.

¹⁷ Chun, thu puopa chun a dâwng a, “Israel te chu Philistia te ma ah a taisieu a, chun, mipi laka le kithahna nasatak aum a, na chapate nih Hophni leh Phinehas le a thiu a, Pathien bawm le mat in aum tai,” a ti a.

¹⁸ Chun, hiti hi ahi a, khutia Pathien bawm chanchin a vak gen phet chun kawtkhak bula a chutna apat chun a thalngadêk in a puk a, a ngâwng a bawng a, a thi ta a: amah hi a têk tâk zieka kipuozo talo ahi a. Israel te chunga kum sawmli vai ana hawm tai.

Phinehas Zi Thihna

¹⁹ Chun, a monu Phinehas zi chun nau a vawp a, nau nei ding kuon ahi ta a: Pathien bawm a lâksak thuu leh a talpupa leh a pasal a thi tau hi tih a zak phet chun a zawitha a, nau a hing ta a; a nauhanat chuh a lah mah mah a.

²⁰ Chun, a thih ding kuon ngût ngût chun a kawma ding numeihaw chun a kawmah, “Lau ki’n, chapa na nei ta hi,” a tiu a. Himahlele, a dâwng ta puoh a, ngaih le a ngaihsak diek ta puoi.

²¹ Chun, “Lopina chun Israel a nusieh tai,” ti kawmin nau min ding chun Ikabod a sa a: Pathien bawm chuh a lâksak uh a, a talpupa leh a pasal chule a thih tâk ziekun.

²² “Lopina’n Israel a nusieh tai, Pathien bawm chuh a lâksak ta ngâl u a,” a ti a.