1 SAMUEL 31 - PATHIEN LEKHABU THIENGTHO (BSI)

Saul leh a Chapate Thihna

¹ Khutichun, Philistia te chun Israel te chu a do u a, chun, Philistia te ma achun a taisieu a, Gilboa tâng achun a chap zeng zung mai u a.

² Chun, Philistia te chun Saul leh a chapate chu a delh a delh zieng tau a; Philistia te chun Saul chapate Jonathan leh Abinadab leh Malkishua chu a that u a.

³ Chun, Saul kimvela chun kidona chu a hung huoisie ta mah mah a, thal kap mite chun a hun kap kha tau a; tichun huoisie takin a liem ta a.

⁴ Ziephet chun Saul chun a gâlvan puo-pa kawm achun, “Na chemzâm satdawk inla, ei sun let zieng ah; khutilochun zie zektan loh te hi hung untin un, ei sunlet untin un, nunsie taka kichepna’n ei nei kha’n au,” a ti a. Himahlele a gâlvan puo-pa chun a hih nuom puoh a; a lauh mah mah ziekin. Khutichun, Saul chun amah chemzâm ngêi chu a kilak a, a bawh ta a.

⁵ Chun, a gâlvan puo-pa chun Saul chu a thi tai tih a het phet chun a ma’n le amah chemzâm mah chu a bawh a, a thi khawm tau a.

⁶ Khutichun, Saul leh a chapa thum te leh a gâlvan puo-pa leh a mite chengcheng chu zie ni ngêi chun a thi khawm tau hi.

⁷ Chun, guom gâl langkhat lama Israel mi um, te leh Jordan khel lama umte’n, Israel sepaih haw chu a taisieua, Saul leh a chapate le a thiu hi tih a het phet u chun khuo haw chu nusieh in a taimang tau a; chun, Philistia te chun a va luoh tau a.

⁸ Chun, hiti hi ahi a, a zing chun Philistia te’n mi thiluong haw van sut sak dinga a va chieh u leh Saul leh a chapa thum te Gilboa tânga a na thi chu a va muu a.

⁹ Chun, a lu a tan u a, a gâlvan chu a sut sak u a, tichun, zie chanchin chu milim pathien In leh mipite kawma phuon dingin Philistia gam achun thu a thâk viel u a.

¹⁰ Chun, a gâlvan chu Asteroth pathien In ah a kawih u a; a luong chu Bethshan kulh bâng ah a tâk u a.

¹¹ Chun, Philistia te’n Saul a bawl dân uh chuh Jabesh Gilead a chêngte chun a het phet un,

¹² Mi hangsan cheng chengte chu a kipan tau a, zânkhuo’n a chieh u a, Saul luong leh a chapate luong chuh Bethshan kulh bâng apat chu a lau a; chun, Jabesh a hung tung u a, zie chun a hâl u a.

¹³ Chun, a guh hawu chu a lau a, Jabesh a tamarisk thing nuoi achun a vui u a, tichun, ni sagih sung an a ngâwl tau hi.