1 SAMUEL 30 - PATHIEN LEKHABU THIENGTHO (BSI)

Amalek te tawh Kidona

¹ Chun, hiti hi ahi a, David leh a mite chu a ni thum ni a Ziklag a tun u chun Amalek te’n Juda simlam leh Ziklag chu a na buluh zo tau a. Ziklag khuo chu a na zo u a, a na hâl u a;

² Numei haw leh zie khuo a um ta phawtte chu alien aneu in salin a man u a: kuomah that lo in a pui u a, a chieh tau a.

³ Chun, David leh a mite’n khuo chu a tun phet u chun, ngaitie, a na ka thieng kei ta a; chun a ziteu, a chapateu, a chanuteu chengcheng chu salin a na man tau a.

⁴ Khutichun, David leh a kawma umte chu hah kah in, chausie khawp hiel in a kap u a.

⁵ Chun, David zite nih, Jezreel mi, Ahinoam leh Karmel mi, Nabal thihsan meithai, Abigail chule salin a pui tau a.

⁶ Chun, David chu nasatak in a lungzîng a; a chapateu leh a chanuteu sala mat a hih ziek u a lungkham a mi chengcheng in amah chu suong a seh ding thu a gen zing u a; himahlele David chu Lalpa a Pathien achun a kisuhat a.

⁷ Chun, David chun Ahimelek chapa, thiempu Abiathar kawm achun, “Thiempu puonâk hun la tie,” a ti a. Khutichun Abiathar chun thiempu puonâk chu David kawmah a hun chawi a.

⁸ Chun, David chun, “Zie mi buluhte chu ka delhzui dem? Delh leng ka delhpha zo dem?” ti’n Lalpa chu a dawng a. Amah chun, “Delhzui ah; delhpha tei tei in na tin, sala a matteu le abawn un hukdawk ngêi ngêi ding na hi,” ti’n a dâwng a.

⁹ Khutichun, David leh a kawma mi za gupte chu a kipan tau a; chun Besor lui chu a va tung u a, zie chun a mi khenkhat te a nusieh tau a.

¹⁰ David leh mi za li te chun a delhzui u a, a chauh tâk ziekun mi za nih te chun Besor lui chu a kân zo ta puou a, a nusieh tau hi.

¹¹ Chun, gamlak achun Aigupta mi khat hi a va muu a, David kawmah a hun pui u a; chângthâk a pieu a, a ne a; chun, dâwn ding tui a pieu a;

¹² Chun, theipi gah kimek hel, a pheng a kisiem, kipho gaw tang khat leh grep gah kipho gaw bawk nih a pieu a; chun, ziehaw chu a nek phet chun a tha a hung um kita; ni thum leh zan thum hiel an nelo tui dawnloa um a na hih ziekin.

¹³ Chun, David chun, “Kuo lama pang na hi? Khawia hung kipan na hi?” ti’n a dawng a. Chun, amah chun, “Aigupta tangval ka hi a, Amalek mi khatin suok a ei neih ka hi; ni thum masanga kha ka na damloh zieka ka pu’n ei nutsieh mai ka hi.

¹⁴ Juda simlam a Kereth te gam leh Kaleb te gam ka buluh u a; chun, Ziklag khuo le ka hâl ui,” a ti a.

¹⁵ Chun, David chun a kawmah, “Zie mi buluh haw umna achun nei pui thei die?” a ti a. Chun, amah chun, “Ei that lo ding leh ka pu khuta ei pie kit lo dingin Pathien min lam zetin ka kawmah kihâksiel inla, khutichun, zie mi buluhte umna achun hun pui ing ka,” a ti a.

¹⁶ Chun, a kawma a vak puihsuk leh, ngaitie, Philistia gam leh Juda gama pat gâllâk thil tamtak a lak ziekun a neu in, a dâwn un, a lam u a, kithehzâk zeng zung zieng u a.

¹⁷ Khutichun, David in a zing thingzangvak apat nitâk chanin a do ta a, sangawngsau chunga chu a taisie tangval za lite tihloh chu kuomah dama suokcha himhim a um puou hi.

¹⁸ Chun, Amalek te’n a lak chengcheng u chu David in a la kit suok kêi a; chun, David in a zite nih chule a hukdawk a.

¹⁹ Khutichun, alien aneu in, a chapateu a chanuteu, a gâllâk thil u leh a thil lak chengcheng uh bangmah a kimlo um lo in David in a lâksak kit suok kêi ta a.

²⁰ Chun, David chun belam hawn leh gancha hawn cheng chu a la a, gancha dang haw ma ah a hâwi u a, “Zie haw hi David gâllâk thil ahi,” a tiu a.

²¹ Chun, mi za nih, a chauh ziek u a David zui thei ta lo a Besor luia a nutsieh teu kawm chu a hung tunga; chun, David leh a kawma um haw chu muok dingin a hung dawk u a; a kawmuh a tun phetin David in amau chu chibai a bûk a.

²² Ziephet chun, David kawma chiehte laka tel mi phalo leh mi thanghuoi te chun, “I kawm u a a hung loh ziekun gâllâk thil I lâksak kit hawu hi pie puoi ting un, a ziteu leh a chateu chiet a kipuih u a a chieh uh vang phal hitiu,” a tiu a.

²³ Himahlele David chun, “Unaute haw, Lalpa, ei humbit a ei do dinga hungte I khut u a ei pie Pa, thil ei piek haw hi khuti bawl thei puo’n lau.

²⁴ Zie thu a hin kuo a na thuu pawm ding? Kidonaa chiehte chan bang bang chu thuomphuo ngaka a na umte’n le a chan ding uh ahi: kibang chieta chan ding ahi,” a ti a.

²⁵ Tichun, zie ni apat a tutieng hin zie chu Israel te dingin thupiek leh dân in a siem ta a.

²⁶ Chun, Ziklag khuo a tun phetin David chun gâllâk thil khenkhat chu, “Zie hi, Lalpa melmate apat gâllâk thil kila, kipahman in ka hun thâk hi,” ti’n,

²⁷ Bethel a umte, Simlam Ramoth a umte, Jattir a umte;

²⁸ Aroer a umte, Siphmoth a umte, Eshtemoa a umte;

²⁹ Rakal a umte, Jerahmeel a khuo hawa umte. Ken mite khuo haw a umte;

³⁰ Hormah a umte, Bor Ashan a umte, Athak a umte;

³¹ Hebron a umte leh David leh a mite tatchakna mun cheng chenga um Juda upa, a guolte kawm achun a thâk tai.