1 SAMUEL 3 - PATHIEN LEKHABU THIENGTHO (BSI)

Samuel Sapna

¹ Chun, naupang Samuel chun Eli ma achun Lalpa na a sem a. Zielai chun Lalpa thu chu a kikhât khawp mai a; alang a kilâkna haw a um puoh a.

² Chun, tihi ahung hi a, Eli chu a mit athim deuh ta a, khuo a muchien thei bêk ta puoh a, a um sekna mun ah a kuol a;

³ Pathien thaumei a mit ma deuh in Lalpa Ho-In a Pathien bawm umna mun achun Samuel chu a kuol a;

⁴ Lalpa’n Samuel chu a sama; amah chun, “Zie hin ka um hi,” a ti a.

⁵ Chun, Eli kawm achun ava tai a, a kawmah, “Zie hin ka um hi, nei sama,” a ti a. Chun, amah chun, “Ka hun sam dang e, va kuol kit ah” a ti a. Chun, a chieh a, a va kuol kit ta a.

⁶ Chun, Lalpa chun Samuel chu a sam kit a. Chun, Samuel chu a tho a, Eli kawmah a chieh a, “Zie hin ka um hi, nei sama,” a ti a. Chun, amah chun a dâwng a, “Ka hun sam puoi, ka chapa; va kuol kit ah,” a ti a.

⁷ Zielai chun, Samuel chun Lalpa chu a he nai puoh a, Lalpa thu a kawm a phuon ahi nai puoh him a.

⁸ Chun, Lalpa chun Samuel chu a sam kit a, zie chuh a thum veina ahi. Chun, a tho a, Eli kawm achun a chieh a, “Zie hin ka um hi, nei sama” a ti a. Tichun Eli chun naupang chu Lalpa’n a sap ahi tih ahun he ta a.

⁹ Zieziekchun Eli chun Samuel kawmah, “Chieh inla, va kuol kit inla, a hun sap kit chun, ‘Lalpa, thu gen in, na suok in a ngaithai ti’n,’” a ti a. Tichun Samuel chu a mun achun a va kuol kit ta a.

¹⁰ Chun, Lalpa chu a hung a, a dinga, a ma a a sap guol khan, “Samuel Samuel,” ti’n a sam kit a. Khutichun Samuel chun, “Thu gen in, na suok in a ngaithai,” a ti a.

¹¹ Chun, Lalpa chun Samuel kawmah, “Ngaitie, Israel gam ahin a he taphawtte bil a nih tuoka thawng zawk zawk dingin thilhih ding ka hi.

¹² Zie ni chuleh a insung chungthu ka gen chengcheng kha abul apat atawp chanin Eli chunga hih ding ka hi.

¹³ A chate’n Pathien a gensietnau gitlohna chu hezing ngâla, a khap loh ziekin a insung chu kumkhuo a dingin vaihawm khum ding ka hi tih ka hilh ta ngâl a.

¹⁴ Zieziekchun Eli inkawte sukkhelhna chu kithawihna ahim thilpiek in ahim bangmah tikin sukkiem theih hi puo’n a ti’n Eli insung a ding chun ka na kihâksiel ta ngâla” a ti a.

¹⁵ Chun Samuel chu zingkal chanin a kuol a, chun Lalpa In kawt haw chu a hawng a. Khutichun, Samuel chun zie kilâkna chu Eli hetsak chu a lauthawng a.

¹⁶ Khutichun Eli chun Samuel chu a sama, “Samuel, ka chapa,” a ti a. Chun, amah chun, “Zie hin ka um hi,” a ti a.

¹⁷ Amah chun, “ Lalpa’n na kawma a gen khah bang thil ahi? Ka kawmah bangmah îm kih aw; na kawma a gen chengcheng chu nei îm a um chun Pathien in a lawh-lawh hun lawh hen, zie sanga nasa chun le,” a ti a.

¹⁸ Chun, Samuel chun bangkim a hilh suok kêi a, a kawm achun bangmah îm a nei puoh a. Tichun, amah chun, “Lalpa ahi a, pha a sak dân dân in hih hen,” a ti a.

¹⁹ Chun, Samuel chu ahung khanglien deuh deuh a, a kawmah Lalpa a um zela, a thu gen himhim a guitung lo a um kha puoi.

²⁰ Tichun, Dan apat Beerseba tienga Israel te chengcheng chun Samuel chu Lalpa thiemgau dinga namdet ahi tih ahun he tau a.

²¹ Chun Lalpa chu Shiloh ah a kilak kit a: Lalpa ngêi chu thu’n Shiloh ah Samuel kawmah a kilak ngâla.