1 SAMUEL 29 - PATHIEN LEKHABU THIENGTHO (BSI)

Israel te Dona a David Tel talo

¹ Khutichun, Philistia te chun a sepaihteu chengcheng Aphek ah a khawm khawm tau a; chun, Israel te chun Jezreel Guom a tuikhuk kieng ah panmun a khawh u a.

² Chun, Philistia lengte chu a sepaihteu tawh a za a za; a sang a sangin a kizawt zung zung mai u a. Chun, David leh a sepaihte chu Akish tawh nungdal in a pang u a.

³ Chun, Philistia sepaih lawiupate chun, “Zie Hebraite hin zie taka hi banga a hih uh?” a tiu a. Chun, Akish chun Philistia sepaih lawiupate kawm achun, “Zie hi David, Israel te lengpa Saul suokpa, zie chanpi hi ka kawma um ta a, ka kawma a hung puklut apat tutienga le a gitlohna ka muh loh pa chu hilo ahim?” a ti a.

⁴ Himahlele, Philistia sepaih lawiupate chun Akish chu a lungnat khum u a; Philistia sepaih lawiupate chun a kawmah, “Zie pa khu khuo na pieka chu chieh dingin sawl in, kidona ah I lak u ah telsak ki’n; dân leh kido lai in I melmateu lam ah pang kha’n a: a pu tawh a kihotheih kit na dingin I miteu luchang lak sanga lampi phazaw amah a dingin a uma ahim?

⁵ Lam kawma, ‘Saul in a sang a sang a that a, David in a sing a sing a that hi,’ ti a a chungchâng thu la a a sak u kha zie David hi hilo ahim?” a tiu a.

⁶ Ziephet chun Akish chun David chu a sama, a kawmah, “Kei dingin na ginum hi tih hi Lalpa min in ka gen hi; zie kidona hi nei do pih ding pha ka sa mah mah a, ka kawma na hung ni apat tuni tienga na chunga bangmah phatlohna himhim ka muh loh ziekin: himahlele lengte haw hin a hun muong zo puou hi.

⁷ Khutichun, thamuong takin a na chieh kit inla, Philistia lengte a lung-awih lohna ding uh bangmah hih ki’n,” a ti a.

⁸ Chun, David chun Akish kawmah, “Ahihleh, bang ka na hih a ahi? Na kawma ka um sung cheng tuni tieng hin ka pu lengpa melmate chu do lo a ka na vaihkitna ding hielin na suokpa chung ahin bang het na nei hi?” a ti a.

⁹ Chun, Akish chun a dâwng a, David kawmah, “Ka mitmuh in Pathien Angel bang hiela demna bei na hi tih ka hêi; ahih ziekin Philistia lengte hin, ‘Kidona ah I kawm u ah hung kihen,’ a hun tiu a.

¹⁰ Zieziekchun, a hun kitawnpih na pu suokte hi tawh zingkal leh vaima takin tho unla; vaima takin kipan unla, chun khuo a vak vak leh chieh tau in,” a ti a.

¹¹ Khutichun, zingkal vaima takin David leh a mite chu Philistia te gama vaikit dingin a kipan tau a. Chun, Philistia te chu Jezreel ah a chiehto tau a.