1 SAMUEL 28 - PATHIEN LEKHABU THIENGTHO (BSI)

¹ Chun, zielai chun hiti hi a hung hi a, Philistia te chun Israel te do dingin a sepaihteu a samkhawm tau a. Chun, Akish chun David kawmah, “Nang leh na mite chu sepaih haw laka ka kawma na chieh tei dinguh ahi tih he’n,” a ti a.

² Chun, David chun Akish kawmah, “Awle, na suokpa thilhih theih dân he mai inla,” a ti a. Chun, Akish chun David kawmah, “Apha chu! ei venga pang zing dingin hun siem ing ka,” a ti a.

Saul leh Endor a Thitha zawlnei

³ Chun, Samuel chu a thi ta a, Israel te chengcheng in a sûn u a, amah khuo ngêi, Ramah khuo a chun a vui tau a. Chun, Saul chun thitha zawlnei haw leh dawithiem haw chu a nawhdawk suok kêi ta a.

⁴ Chun, Philistia te chu a kikhawm khawm u a, a hung u a, Shunem mun achun panmun a khawh u a: Chun, Saul chun Israel mi chengcheng a samkhawm a, Gilboa ah panmun a khawh u a.

⁵ Chun, Saul in Philistia sepaihte chu a muh phetin a lau a, a lungthim lauhna’n a dim ta a.

⁶ Chun, Saul in Lalpa a dawng a, ahih ziekin Lalpa chun mang ahim, Urim ahim, thiemgau ahim mang in a dâwng ta himhim puoh a.

⁷ Ziephet chun Saul in a suokte kawmah, “A kawma ka chieh a, thil ka dawt dingin thitha zawlnei numei ei hawldawk sak un” a ti a. Chun, a suokte chun a kawmah, “Ngaitie, Endor khuo ah thitha zawlnei numei khat a um ve” a tiu a.

⁸ Chun, Saul chu a kisiem danglam a puon chuom in a kivan a, zan in mi nih tawh numeinu kawm achun a chieh tau a: “Thitha phunsanna’n phun ei san sak inla, na kawma a min ka gen taphawt chu ei sap dawk sak in” a ti a.

⁹ Numei chun a kawmah, “Ngaitie, Saul thilhih chu na he a, gamsung a um thithazawl leh dawithiem haw cheng a subei zo ta a, bang zieka, ka awklup na ding leh ka hinna suksietna dinga thâng kam na hi?” a ti a.

¹⁰ Chun, Saul chu Hingzing Lalpa min salin, “Zie ziek hin na chungah gawtna tung hiel puo’n a,” ti’n a kawmah a kihâksiel ta a.

¹¹ Khutichun numei chun, “Kuo a ka hun sap dawk sak ding?” a ti a. Chun, amah chun, “Samuel ei hun sap dawk sak in” a ti a.

¹² Chun, numei chun Samuel a vak muh phet chun hahpi’n a kiko a; Saul kawmah, “Bang zieka ei thêm na hi? Lengpa Saul hila na hi zinga,” a ti a.

¹³ Chun, lengpa chun a kawmah, “Lau kih, banga na muh?” a ti a. Chun, numei chun Saul kawmah, “ Lei apat a thagau hung pawtdawk ka mui,” a ti a.

¹⁴ Chun, a kawmah, “Bang tawbang ahi?” a ti a. Amah chun, “Teksepu hi a hung pawt a, puonâk chuol a âk hi,” a ti a. Chun, Saul chun Samuel ahi tih a he a, a mai a lei si’n chibai a bûk a.

¹⁵ Chun, Samuel chun a kawmah, “Bang zieka ei sam dawk buoi na him?” a ti a. Chun, Saul chun a dâwng a, “Ka lung a zing bêka ahi: Philistia te chun ei do u a, Pathien in la ei kiheimang san ta a, thiemgau ahim, mang lam ahim in le ei dawng ta himhim puoh a; zieziekchun, ka hih ding ei hilh dinga ka hun sap na hi” a ti a.

¹⁶ Samuel in, “Khutia Lalpa’n a hun kiheimang sana na melma a hung hi tai tih hezing ngâla chu bang zieka thu ei dawng na hi?

¹⁷ Kei ei manga a gen guol khan Lalpa’n na chunga a hih a hita chu: Lalpa chun na khuta leng gam chu a hun lâksak ta a, na invengpa David ngêi chu a piek ahi tai.

¹⁸ Lalpa thu na nun loh ziek leh Amalek te chunga a lungnatna nasatak guola khah na thah suok kêi tâk loh ziekin tuhin zie thil hi na chunga a hih ahi tai.

¹⁹ Zielo chun le, Lalpa’n nang leh Israel te chu Philistia te khut ah hun pie’n a; chun, zing leh nang leh na chapate ka kawmah hung um in lau: Lalpa chun Israel sepaih haw le Philistia te khut ah pie’n a,” a ti a.

²⁰ Khutichun Samuel thu gen ziek chun Saul chu a lau mah mah zieng ta a, tuol ah a pûk tha zieng ta a; tha leh zung himhim a nei puoh a, nichangtum leh zankhuo’n bangmah a ne ta puoh a.

²¹ Chun, numei chu Saul kawm achun a hung a, a lungkham mah mah hi tih a he a, a kawmah, “Ngaitie, na suoknu hin na thu ka awi a, thih leh thih ti’n ka kawma na thugen haw chu ka zuih ahi.

²² Zieziekchun, nangin le na suoknu thu hi zui in; an neukhat hun pie’ng ka ting, tichun, na chieh tieng leh tha na neih theihna dingin ne’n,” a ti a.

²³ Himahlele a nuom puoh a, “Ne puo’ng ka” a ti a. Ahihziekin a suokte chun, numei chu tawh, a thêm hâmhâm u a; chun, a thuu chu a zui ta a. Khutichun, tuol apat chun a kipandawk a zâlkhun achun a chu ta a.

²⁴ Chun, numei chun bâwngno kivak thau a in achun a nei a, a va that vak a; chun changbuong a la a, a mêk a, chawl tello chângthâk a siem a;

²⁵ Chun, Saul leh a suokte ma achun a va lui a; a ne tau a. Khutichun, a kipan u a, zie zan chun a chieh tau a.