1 SAMUEL 27 - PATHIEN LEKHABU THIENGTHO (BSI)

Philistia te Laka David Umna

¹ Chun, David in a lungthim in, “Ni khat chu Saul khuta hi hung thi tei ding ka hi hi: kei dingin Philistia te gama taihmang sanga phazaw bangmah umlo ding ahi; tichun Saul in Israel gamsung cheng chenga ei hawl hi hung lungdawng intin, tichun a khuta pat bit ding ka hi,” a ti a.

² Khutichun David chu a kipana, amah leh a kawma mi zagup um haw chu Maok chapa Gath lengpa Akish kawmah a chieh tau a.

³ Chun, David chu amah tawh a mite tawh, mi cheng a inkuoteu chiet tawh amah chule a zite nih, Jezreel mi Ahinoam leh Karmel mi Nabal zi Abigail tawh Gath khuo ah Akish kawmah a um tau a.

⁴ Chun, David chu Gath khuo ah a tai hi tih Saul a hilh u a, khutichun a hawl kit ta puoh a.

⁵ Chun, David chun Akish kawmah, “Na mit ka tun chun ka chênna dingin gamsung a khawpi khat ei pie’n: bang ziekin em na suok hi lengpa khawpi a na kawma a chen zing ding?” a ti a.

⁶ Khutichun, Akish chun zie ni chun Ziklag chu a pie ta a: zieziekchun, tuni tieng hin Ziklag chu Juda lengte a ahi den tai.

⁷ Chun, Philistia te gama David umsung chu kum khat leh tha li ahi.

⁸ Zie sung chun David leh a mite a kuon to u a Geshur te, Girzi te leh Amalek te a buluh sek u a. Malai a pat in zie mite hi zie gama hi a na cheng ahi tau a. Aigupta lama Shur chanin a gam u chu a buluh sek a.

⁹ Chun, David in a buluh na taphawt achun numei-pasal khat chale a hinghawih kha hiel puoh a; belam haw, bâwng haw, sabiltung haw, sangawngsau haw leh nîk leh puon haw a la zaw sek a; zie zawh chuleh vaikit a, Akish kawmah a chieh sek a.

¹⁰ Chun, Akish chun, “Tuni’n khawilam a na buluh?” ti a a dawt tieng leh David chun, “Juda gam simlam, ahihloh leh, Jerahmeel te gam sim lam, ahihloh leh, Ken te gam sim lam,” ti’n a dâwng sek a.

¹¹ David in amei-apa hinghawih nei lo in a that sek a, kuoma’n Gath khuo a va chieh a amah leh a sepaihte tawihdan diktak chu a genzak lohna dingun. Philistia te gama a chen sung cheng chun khutichun a tawi zing sek a.

¹² Chun, Akish chun David thugen chu taksang in, “Amah mi Israel te hi a kimuhdah sak ta ngâl in; zieziekchun, a damsung cheng chu ka suok in um ta lo ding ahim,” ti’n a ngaihtuoh a.